Timmisartoqarfiup illorsuassaata naammassinissaa kinguaattoorfiugaluartoq, pilersaarutit malillugit ingerlasoqarpoq

Timmisartoqarfiup illorsuassaata atorneqalernissaa sioqqullugu suliassat suliarineqaqqaartussat pillugit qatserisartut oqaaseqaateqarnerat pissutigalugu, timmisartoqarfiup illorsuassaa kinguaattoorfiuvoq. Timmisartoqarfiup illorsuassaa ataasinngormat ammarneqartussaagaluarpoq, kinguaattoornerullu sivikitsuinnaanissaa naatsorsuutigineqartoq, Greenland Airportsimit nalunaarutigineqarpoq.

Ammaanerup kinguartinneqarnera novembarip 28-ani Atlantikoq qulaallugu timmisartuussinermut siullermut sunniuteqarnavianngitsoq, Greenland Airports Sermitsiamut allakkatigut akissuteqarluni naqissusiivoq.

Angallannermut aqutsisoqarfimmit isumannaallisaanermut tunngatillugu misissuinerit naammassineqarmata, ingerlatseqatigiiffiup siullertut nuannaarutigaa. 

Timmisartoqarfiup illorsuassaata ammarneqarnissaa Greenland Airportsimut naammassinissamut alloriarneruvoq pingaarutilik, taamaalilluni Air Greenlandip timmisartua Tuukkaq novembarip 28-ani siullermeerluni mittarfimmut missinnaaniassammat.

Isumannaallisaanermut misissuinerit amerlanerussapput

Sapaatip-akunnerata naanerani timmisartoqarfiup illorsuassaa isumannaallisaanikkut misissorneqarmat, Danmarkimi angallannermut aqutsisoqarfimmit akuerineqaqqaarpoq. Akuersissutigineqarnerata kingunerisaanik qatserisartut oqaaseqaataata saniatigut timmisartut angisuut aallarsinnaanissaannut missinnaanissaannullu, mittarfik 2200 meteri kisimi amigaatigineqarpoq.

Novembarilli 28-at sioqqullugu, Atlantikoq qulaallugu timmisartoqarfittut nutaatut aallartiffiusussami, isumannaallisaanikkut misissuinikkut akuersissutinik amerlanerusunik pissarsisoqarpat pitsaanerussaaq.

Ilaatigut timmisartoqarfinni isumannaallisaanermik nakkutilliisut piffissami aalajangersimasumi sungiusarneqartariaqarlutillu angalasunik sullissisariaqarput, taamaalillutik isumannaallisaanermik nakkutilliisut „ataasiakkaatut“ isumannaallisaanermik nakkutilliisinnaalersinnaaniassammata.

Tamanna nunani tamalaani nalinginnaavoq, angalasullu Københavnimit ingerlaannaq nunamut allamut ingerlaqqinniarlutik millatsiartartut isumannaallisaanikkut misissuiffigineqartariaqannginnerinik tamanna isumaqarpoq.

Sapaatip-akunneratali naanerani angallannermut aqutsisoqarfimmit akuersissummik tunineqarneq mittarfissap nutaap naammassineqarnissaanut alloriarnerujussuuvoq.