Timmisartortartoq oqummik pissuteqartumik sulisinnaajunnaarnerminut millionilikkaanik taarsiiffigineqarpoq
Timmisartortartoq sulisinnaajunnaarnerminut 4 millionit koruuningajaat Air Greenlandimit taarsiiffigineqarpoq. 2014-imi Air Greenlandip inissiaataata oqoqarnera pissutigalugu timmisartortartup puakkut ajornartorsiuteqalernini eksemilerninilu pissutigalugit taarsiiffigineqarpoq.
Qulimiguullip timmisartortartuata sulisinnaajunnaarnini pissutigalugu 4 millionit koruuningajannik akilerneqarpoq.
FPU-mi ilaasortaq sulisinnaajunnaarnerminut 3.950.000 koruuninik taarsiiffigineqarpoq. Ilaasortaq qulimiguulimmik timmisartortartuusoq, piffissap ilaani Air Greenlandip inissiaani najugaqarsimavoq.
Sulisitsisut kattuffiillu ukiorpassuarni isumaqatigiinngissuteqareerlutik, timmisartortartoq sulinermini oqummik nalaanneqarsimasoq maanna isumaqatigiissuteqarput. Atuagassiaq Luftfart nittartakkamini taama allappoq.
Aviisip allaaserisaa naapertorlugu timmisartortartoq Kujataani Air Greenlandimit inissiami inissinneqarmat pisoq aallartippoq, naak inissiaq oqoqartoq iluarsaanneqartariaqartorlu timmisartortitseqatigiiffiup nalusimanngikkaluaraa. Tassani timmisartortartoq puaminik ajornartorsiuteqalerlunilu eksemilerpoq, tamatumalu kingunerisaanik peqqissutsimut allagartani nutartersinnaasimanngilaa.
Peqqissutsimut akuersissut nutartersinnaasimanngilaq
- Sillimmasiisarfiit suliaq unitsinniaraluarpaat tunniutiinnarnissarlu neriuutigalugu, qujanartumilli FPU eqqartuussissuserisorlu Martin suliamik isumaginnilluarput, timmisartortartoq kinaassutsiminik isertuussisoq Fagbladet Luftfartimut oqarpoq. Atuagassiap kinaanera ilisimavaa.
- Ajornarsimaqaaq. Ukiorpassuarni timikkut ajoquteqarnera pissutigalugu sinilluarsimanngilanga, suliarlu isumakuluutigisimaqaara. Qasunarsimagaluarpoq, tunniutiinnarusussimanngilangali, ullumikkullu angusaqarluarpunga.
Timmisartortartup puakkut ajornartorsiuteqarnini eksemerninilu pissutigalugit timmisartuussisinnaanermut allagartani nutartertissinnaanngilaa, tamatumalu kingunerisaanik sulisinnaajunnaarpoq.
