Timmisartumi imerpalasunut malittarisassat EU-p sakkukillivai

Timmisartorluni nassatani tigumiartakkani imerpalasunik inerteqquteqarnerit tamaasa atorunnaarsinnissaannut EU kigaatsumik qaninnerujartortitsivoq.
Tallimanngormat EU-Kommissioni nalunaarpoq januaarip 31-annit allannguinerit ilaasunit, Europap avataani mittarfinni akitsuuteqanngitsunik pisiniarusuttuni, malugineqarsinnaalissasut.
Manna tikillugu imaassimavoq, assersuutigalugu Hong Kong-imi whisky-mik akitsuuteqanngitsumik pisiguit, tamatumalu kingorna Helsinki-mut aqqusaarlutit Københavniliassallutik, taava puiaasaq Helsinki-mi arsaarinnissutigineqassaaq.
Tamanna nalinginnaalluinnartumik malittarisassaasimavoq, tassa EU-p qularutigissanngimmagu whisky sumiiffimmit isumannaatsumeersoq.
Maanna puiaasat pisiffimmi immikkut pooqartalissapput immikkut isumannaatsumik puussiamik naqissusikkamik, taavalu Europami aqqusaarfimmi arsaarinnissutigineqarunnaartalissapput.
Tamanna teknikkikkut imatut pissaaq, EU-p iluani mittarfeqarfiit atortoqassallutik tigummiarlugit nassatani imerpalasunik 100 milliliter-inik sinnilinnik annertussusilinnik screenerisinnaallutik.
Imerpalasunik nassatat siullermik killilersorneqalerput tuluit poolitiivisa 2006-imi pinerliiniarneq paasimmassuk, tamatumani timmisartoq Tuluit Nunaannit USA-liartoq imerpalasumik qaartartuliamik qaartinniarneqarsimalluni.
Kommissioni naapertorlugu mittarfinni imerpalasunut skannerit nutaat ilaasut ikinnersaasa malugisassavaat.
– Siunissami imerpalasunut killilersuutit tamaasa atorunnaarsinnissaannut alloriarneq pingaaruteqartorujussuuvoq, taavalu isumannaatsuuneq qaffassassavaa, tassa manna aallarniutaassammat EU-mi imerpalasunik tamanik screenerisalernissamut, kommissioni tusagassisorfinnut nalunaarutikkut allappoq.
Alloriarneq siulleq tamanna iluatsilluassappat imerpalasut allat screenerneqartalersinnaapput, misilittakkat maanna atuutilersut tunuliaqutaralugit, taavalu 2016-imiit imerpasunut malittarisassat sakkortuut atorunnaarsinneqarsinnaapput.
Qaammatialunnguit ingerlanerinnaanni aappassaa timmisartumut ilaalluni malittarisassarpassuit ilaat sakkukillilaarneqarpoq.
2013-imi decembarimi EU-Kommissioni nalunaarpoq europami timmisartortitseqatigiiffinni aallarnerup minnerullu nalaani elektronik-it qaminngatinneqartarnissaannik inerteqqut atorunnaarsillugu. Timmisartortitseqatigiiffiit ataasiakkaat namminneq malittarisassanut nutaanut naleqqussassapput.
Aallaqqaammulli piumasaqaataavoq telefoni, tabletti qarasaasiarluunniit timmisartumi atorsinnaasutut taaneqartumut inissinneqassasoq.