Timmisartuussinermi suliumajunnaartoqassanngilaq
Air Greenland aamma Dansk Metal isumaqatigiissummik nutaamik arfininngornermi atsiorput. Suliumajunnaarnissaq taamaatinneqarpoq.
Poorskip nalaani angalanissat isumannaarput. Air Greenland aamma Dansk Metal akornanni akissarsiat pillugit isumaqatigiissummik nutaamik arfininngornermi atsioqatigiittoqarpoq. Air Greenland tusagassiorfinnut nalunaaruteqarluni taama ilisimatitsivoq. Timmisartunut mekanikerit akissarsiaannut isumaqatigiissut isumaqatiginninniutaasimavoq.
Illuatungeriit isumaqatigiinneq ajulermata sulisut akornanni suliumajunnaartoqarnissaa aarlerisaarutigineqarnikuuvoq. Air Greenlandillu taamaattoqassappat sulisunik mattussinissamik aamma aarlerisaarisimalluni. Suliumajunnaarnissarli taamaatinneqarpoq timmisartullu poorskip nalaani angalaannartussanngorput.
Illuatungeriit isumaqatigiissutip nutaap imarisaasa oqaaseqarfiginissaat kissaatiginngilaat, Isumaqatigiissitsiniartarfiullu ikiuunneratigut isumaqatigiissuteqarnertik nuannaarutigalugu, tusagassiorfinnut nalunaarummi allassimavoq.
Illuatatungeriillu oqaatigaat, piffissami sivisuumi isumaqatigiinniarnerit arlaqartut naggataatigullu Isumaqatigiissitsiniartarfimmi nal. akunnerit 24-t ataatsimiinnermi, isumaqatigiinniarnerit pissuserissaartumik ingerlasimasut.