Torben M.: Kalaallit Nunaat ajutooriaannaavoq
Aningaasaqarnermut Siunnersuisoqatigiit siulittaasuat professori Torben M. Andersen, Kalaallit Nunaat coronap tuniluunneranit eqqugaavallaarsimanngikkaluartoq mianersoqqusivoq.
- Akiuussutissalersuinerup ingerlalluarnera aamma Kalaallit Nunaani annerusumik maannamut tuniluuttoqarsimannginnera nuannaarutissaavoq, aningaasaqarnermi professori aamma Aningaasaqarnermut Siunnersuisoqatigiit siulittaasuat Torben M. Andersen Sermitsiaq.AG-mit apersorneqarami oqarpoq.
Aningaasaqarnermut Siunnersuisoqatigiit Kalaallit Nunaata aningaasaqarnera pillugu nalunaarusiaq nutaaq tallimanngormat saqqummiuppaat, tassanilu nalunaarutigineqarpoq pissutsit ilisimaneqanngitsut arlallit ukiuni arlalinni aningaasaqarnerup ajunngitsumik ineriartorsimaneranut akornusiisinnaasut.
Taassuma erseqqissaatigaa, at ”suli ajutumeertoqarsinnaanera eqqaamaneqassasoq”.
- Peqqinnissatigut mianernartoqaqaaq, coronalu allanngorsimasoq alla tuniluutileriasaassagaluaruni kingunerluuteaqarajussuarsinnaavoq. Ulorianarsinnaasut tamarmik qaangiussimanerarlugit oqaaseqarnissamt siusippallaarpoq, professori Danmarkip ammaqqinneqarnissaa eqqarsaatigalugu piffissamut ungasinnerusumut periusissiornermi immikkut ilisimasallit isumannanik tunioraasussat siulittaasussattut Danmarkimi naalakkersuisunit sapaatip akunnerani kingullermi toqqarneqartoq erseqqissaavoq.
Amigartooruteqangaatsiarneq
Aningaasaqarnermut Siunnersuisoqatigiit nalunarusiaminni saqqummiuppaat, 2020-mi pisortat aningaasaqarnikkut 189 millioner koruuninik amigartooruteqassagatinneqartut. Amigartoorutit ”anngajaajusutut” nalilerneqartut.
- Kalaallit Nunaanni ukiuni kingullerni sinneqartoortoqartarsimavoq. Annertunngikkaluartunik, taamaattoq sinneqartooruteqartarnikkut ikiorsiissutinut immikkut akiligassat isumagineqarsinnaanerat qulakkeerneqartarsimalluni. Tamatuma eqqaamaneqarnissaa pingaaruteqarpoq, Torben M. Andersen oqarpoq.
Coronali allanngorartoq pissutaalluni tuniluuttoqaleriasaarsinnaammat Aningaasaqarnermut Siunnersuisoqatigiinnit kissaatigineqarpoq, aningaasanut inatsisit ukiuni sisamani amigartooruteqarfiunatik sinneqartooruteqarfiusarnissaat.
Sinneqartooruteqartoqartariaqartoq
- Ukiualuit matuma siornatigut oqaatiginikuuarput sinneqartooruteqartoqartariaqartoq. 189 millioner koruuninik akiligassaqarnerup innuttaasullu utoqqaaneruleriartuinnarnerisa pisortat aningaasaqarnerat siunissami artukkersinnaammassuk sinneqartooruteqartarnissaq pimoorunneqartariaqarpoq, aningaasaqarnermi professori Aarhusimiit oqarpoq.
Coronap nunarsuarmi tuniluunnera pingaartumik takornariartitsisarnermik inuussutissarsiuteqartunut suliffeqarfinnullu takornarianik sullissisartunut eqquisimavoq.
- Nunani tamalaani ilisimasallit oqaatigisarpaat, takornariartitsisarneq angallassisarnerlu ukiut marluk-pingasut qaangiuppata aatsaat nalinginnaasumik ingerlaqqilersinnaasut. Taamaammat mianersortoqartariaqarpoq, Aningaasaqarnermut Siunnersuisoqatigiinni siulittaasoq erseqqissaavoq.