Tulukkanik akissarsiat
Aasiaat Sisimiullu tulugaqarpallaaqaat. Taamaattumik kommunit tulukkat isigaat akissarsiassalersimavaat, tulugarniartut 25 koruunit angullugit pissarsisinnaapput
Ukiumut marloriarluni Sisimiut illoqarfianni tulukkat ima amerlisartigaat, kommunip qimmilerisua tulukkat aallaammik ikilisarujussuartariaqartarlugit.
Ukiunili kingullerni illoqarfimmi tulukkat imatut amerlatigisarsimatigaat kommuni maanna inunnik ujaasilerluni tulugarniartartussanik. Taamatut oqarpoq Sisimiut kommuneanni qimmilerisoq David Møller, knr.gl-imut.
Tulugarniat illoqarfiup iluani aallaasersorsinnaanermut politiinit akuerineqarnissamik qinnuteqassapput, Sisimiunilu tulukkat isigaat tulugarniat 10 koruuninnassutigisarpaat.
Aasiaat kommuneata aamma tulukkat illoqarfimmi ajornartorsiutigai. Ukiut marluk matuma siornatigut kommunip tulukkat isigaat 25 koruuninut akitsorpai, tulugarniartartunut marlunnut, illoqarfiup avataani tulugarniartartunut nuannaarutaasumik.