Tunisisorpassuit unittoortitsipput
Uummap pigisaani qaleralinnik qaammatini siullerni pingasuni tulaassuisoqarnerpaaneragut toqqorsiviit ulikkaartoornerannik kinguneqarpoq taamalu tunisisoqarsinnaajunnaarlunilu tunisassiortoqarsinnaajunnaarpoq
Ukiuni pingasuni kingullerni qaammatini pingasuni siullerni tulaassukkanik kisitsisaatit ersersippaat qaleralinnik tunisineq marloriaatinngungajassimasoq.
Ukioq manna qaammatini pingasuni siullerniinnaq Uummannami nunaqarfiinilu Ikerasammi, Saattuni, Ukkusissani kiisalu Nuugaatsiami tulaassat 1.519 tonsiupput. Pineqartuni 2011-imi tunisat 810 tonsiupput 210-milu tunisat 724 tonsiullutik.
Takuuk "Video: Uummannami tunitsiviit matuneranit"
Tulaassuisoqarnerpaaneragut aammalu immap sikuuneragut taamalu nioqqutissanik umiarsuarmik assartuisoqarsinnaajunnaarneragut toqqorsivinnik imaajaasinnaajunnaarneq Uummannami pigisaanilu tunitsiviit unittoorutigaat, tunisiffiusinnaajunnaarlutik tunisassiorsinnaajunnaarlutillu. Tunisassiorfiillu ammasut kingulliit marluk Ummannamiittoq Saattuniittorlu poorskip kinguninngua aamma tunisiffiusinnaajunnaassapput.
Taama Royal Greenland ullumi nalunaaruteqarpoq.
Uummannami aalisartut ilisimatitsinerat naapertorlugu qaqugu sikuujunnaarnissaa siumut oqaatigiuminaappoq. Aalisartut naliliinerattut siku saappoq qaqugukkulluunniillu sikuujunnaarsinnaalluni. Issinnerulissappalli aatsaat upernarlualerpat umiarsuaqaqqinnissaa naatsorsuutigineqarsinnaassaaq.