Tusaannga ammanerusalilerpoq: Imminut toqunnissamik eqqarsaateqartartut ikiorneqassapput
Tusaanngap ammanerusalernerata imminut toqunnissamik eqqarsaateqartartut ikiussavai. Maanna Tusaanngamut piffissami sivisunerusumi sianertoqarsinnaalerpoq.
![Tusaannga ammanerusalilerpoq: Imminut toqunnissamik eqqarsaateqartartut ikiorneqassapput](https://image.sermitsiaq.ag/131912.webp?imageId=131912&width=960&height=542&format=jpg)
Kisimiittutut misigisimagaanni eqqarsaatinillu nuanninngitsunik eqqarsaateqaraanni taava Tusaanngamut oqaloqatiginnittoqarsinnaavoq. Meeqqat, inuusuttut inersimasullu sapaatip akunnerata naanerani sivisunerusumik ikiorserneqarsinnaalerput ulluinnarnilu sivisunerusumik oqaloqateqarsinnaalerlutik.
Tusaanngap ammasarfii nutaat:
- Ataas. – Sisama.: nal. 09:00-miit 00:00-mut
- Tall. & Arf.: nal. 09:00-miit 04:00-mut
- Sap.: nal. 09:00-miit 00:00-mut
Tusaannga ulluinnarni sapaammilu oqatasuaatitik nalunaaqutaq 22.00 matusaraluarpaat, tallimanngornermi ullaakkut qulingiluaniit ullaasakkut sisamat tungaanut oqaloqateqartoqarsinnaalluni arfininngornermilu ualikkut sisamaniit ullaasakkut sisamat tungaanut sianerfigineqarsinnaasaraluarluni.
Tusaanngap maannamut imminut toqunnissamik eqqarsaatillit amerlasuut ikioreersimagai, kisitsisillu siulianeersut takutippaat imminut toqunnissamik eqqarsaateqartarneq pillugu Tusaanngamut amerlanertigut attaveqartoqartartoq. Imminut toqunnissamik eqqarsaateqarneq qaqugukkulluunniit takkussinnaammat Tusaanngap ammasarfii sivitsorneqarput.
- Imminut toquttartut amerlassusaat annikillisissavagut, taamaattumik inuit imminut toqunnissamik eqqarsaateqartartut ikiorneqarnissaannik piffissaq eqqorlugu nalaarluarneqarsinnaapput. Tusaanngap ammanerusalernerani alianartumik pisoqarnissaa pinaveersaartissinnaavarput, tassani inuup imminut toqunnissaa pitsaaliorlugu. Inuup aliasorujussuarnera pitsaaliorniarparput, taamaalisoqarpallu ikiuussinnaanerput tamaat ikiuutissaagut, Meeqqanut, Inuusuttunut Ilaqutariinnullu Naalakkersuisoq, Paneeraq Olsen oqarpoq.
Tusaannga ukiut pingasut ingerlaneranni 7.000-ingajannit sianerfigineqarsimavoq.
Kikkut tamarmik Tusaanngamut sianersinnaapput
2021-mi inuit 2.576-it sinnerlugit Tusaanngap ikiorpai, ukioq siulianiit 240-nik sianertunik qaffariarpoq. Siullermeertumik Tusaanngamut sianertut qaffariarujussuarput. 2021-mi sianertut 40 procentii siuliani Tusaanngamut sianernikuusimanngillat. Naalakkersuisut taama paasissutissiipput.
Oqarasuaatikkut siunnersuisarfik meeqqanit, inuusuttunit inersimasuniillu nuanninngitsunik eqqarsaateqartunut ernumassuteqartunulluunniit Tusaanngamut saaffiginnissuteqarsinnaapput.