Tusagassiorfimmi siulittaasunngorlaaq: Atuisut akiliuteqartinneqartalersinnaanerat misissorneqassaaq
Lars Vesterøkkep Sermitsiaq.AG-p siulersuisui ataatsimiikkaagangata aqutsisartussap tusagassiorfiup digitalikkut ineriartortinneqarnera nukittorsarniarpaa.
Ullumikkut nutaaliaasut aqangu pisoqalereersimasinnaapput. Tusagassioriaaseq sukkasuupilussuarmik ineriartorpoq. Tamanna aamma maani nunatsinni malugisimavarput, ukiunilu aggersuni suli sukkanerusumik ineriartulertussaalluni.
Tusagassiorfik ilanngutassiarpassuaqartarpoq pitsaasunik inuaqatigiinnuullu attuumassuteqartunik, tamatumalu atoruminartumik tunngavissaqarluartumillu atorneqarnerusalernissaa isumagissavarput. Tusagasseeriaaseq ukiuni aggersuni allanngortinneqarluinnartussaavoq, Ritzauimi pisortaq tusagssiorfimmilu Sermitsiaq.AG-mi siulersuisunut siulittaasunngorlaaq Lars Vesterløkke oqarpoq.
Tusagassiorfiup aviisit Sermitsiaq AG-lu, atuagassiat Arnanut Sulullu, inoqutigiinnut agguaanneqartartoq Nuuk Ugeavisi, atuakkat nutaarsiassatigullu nittartagaq Sermitsiaq.AG saqqummersittarpai.
Aviisit naqitat ajornartorsioriartuinnarnerat ilutigalugu nittartakkatigut nutaarsiassat tusagassiorfinnit arlaannaannulluunniit attuumassuteqanngitsunit saqqummiunneqarnerusalertussat ilaattut oqaatigineqartarput.
Tusagassiortarneq akeqartoq
Nunani allani nittartakkatigut nutaarsiassiisartorpassuit nutaarsiassaatimik atuarneqarnissaannut akiliuteqartitsisarput. Tusagassiorfiup Sermitsiaq,AG-p akiliuteqartitsisalernissaa eqqarsaatigineqassasoq isumaqarpit?
- Tusagassiorneq tusagassiallu imaasa pitsaasuunissaat akeqartarput, ussassaarutitigullu unammilleqatigiinneq sakkortulluni, ilaatigut digitaliseeriinerup piumasaqaatinik allanngortitsisimanera pissutigalugu, tamatumalu tusagassiorfiit ussassaaruteqartartunik, aviisit imaasa ilaannik aningaasaliissuteqartartunik attassiinnarniarnerat ajornarnerulersissimavaa.
- Aviisit naqitat digitaliusullu atuisut akiuliuteqartinneqartarnerisigut tunisarpavut, atuagassiat naqitat tunisarpavut, atuisuniillu toqqaannartumik aningaasanik qanoq pissarsiniarsinnaanerput eqqarsaatigissallugu pissusissamisoorpoq. Nunarsuarmi tamarmi nittartakkatigut tusagssiorfiit amerliartuinnartut atuisut akiliuteqartinneqartarnissaat piumasarisalersimavaat, periarfissarlu tamanna aamma uagut misissorniarparput, Lars Vesterløkke oqarpoq.
AG-p tusagassiorfiup siulersuisuini siulittaasunngorlaap apersorneqarsimanera sapaatip-akunnerata tulliani saqqummiutissavaa, tassani tusagassiornermut atatillugu apeqqutit nutaarsiassiisarnermut oqartussaaqataanermullu pingaarutillit arlallit oqaaseqarfigissavai.