Tusarniaaneq: Kim Kielsen kamaanneqartoq
Aalisarnermut Naalakkersuisup Kim Kielsenip aalisarnermut inatsimmut pisariusumut, sapaatip-akunneri arfineq-pingasut tusarniaassutigineqartussamut, iliuuseqarnera aalisartunit, najukkami politikerinit Sulisitsisunillu naammagineqanngilluinnarpoq. Sivikippallaarpoq, isornartorsiuisut oqarput.
Kim Kielsen aalisartunit, maannalu avannaata kommunianit isornartorsiorneqarpoq. Inatsit ukiut 20-t suliarineqarsimasoq, nunattalu inuussutissarsiutit isertitaqarfiillu annersaannut aalajangiisuusinnaasoq pillugu piffissaq sivisunerusoq atorlugu suliarineqarnissaa paasineqarnissaalu taakkua piumasaqarput.
Januaarip 24-at tusarniaanermut killigitinneqarpoq. Taamaalillutik aalisarnermik inuussutissarsiutillit atortussiamik 150-inik quppernilimmik taamaallaat sapaatip-akunneri arfineq-pingasut atorlugit misissuisariaqarput. Piffissamilu tamatumani juullerlunilu ukiortaarpoq.
Aalisartut annilaangasut
- Tusarniaanermut killissarititaq sivikippallaarpoq. Soorunalimi aalisartut inatsisip qanoq kinguneqarnissaa iluamik paasisinnassanerlugu annilaagatigaat. Atortussiaq annertoqaaq, aamma tamarmik naammaginartumik inatsit annertooq paasinissaanut kiisalu pisarialinnik isummernissaminnut periarfissaqassagunik killissarititaq sivitsortariaqarpoq, Avannaata Kommuniani borgmester Palle Jerimiassen, tusagassiuutinut nalunaarummi oqarpoq.
Qanittukkut Sisimiuni aalisartut piniartullu kattuffitsik ataatsimeeqatigigamikku pakatsisimanertik oqaatigigaat, aalisartullu peqataatinneqanngitsutut misigisimasut, Sermitsiaq.AG oqaluttuarpoq. Sermitsiaq.AG-llu tusagassiortua ataatsimiinnermi “akerleriittoqangaarsimasoq” oqaluttuarpoq.
Aalisartut kisimik isornartorsiuinngillat, aammali Sulisitsisuni aalisarnermik ingerlatseqatigiiffiit ataatsimiititaliaanni siulittaasoq Henrik Leth, Sermitsiaq.AG-mut oqarpoq:
Kingunissat nalunartut
- Inatsisissatut siunnersuutip taama pisariutigisup tusarniaassutiginissaanut piffissaliussaq sivikippallaarpoq, naatsorsuinerillu tunngaviusut tamanut isertuunneqarput. Naalakkersuisut tunngaviusunik ammanerusumik saqqummiussisariaqarput. Naatsorsuinerit oqaaseqaatinut tunngaviusut upperinngilakka. Aamma ernumassutigaara siunnersuutip kinguneri nalugilluunniit politikkikkut suliarineqassanersoq.
Avannaata Kommunia toqqaannartumik toqqaannanngikkaluamilluunniit
aalisarnermit isertitanut attuumassuteqartut, Palle Jerimiassenip oqaatigaa.
Inuussut kinaassuserlu
- Aalisarneq illersortussaavarput nutarterlugulu. Avannaata Kommuniani umiatsiaararsorneq inuussutissarsiutaavoq annertooq, inuussutissarsiut kisiat pinnagu aammali inooriaaseq kinaassuserlu tassani pineqarput. Ilaqutariippassuit sunnerneqartussaapput, pingaaruteqarporlu isumaat tusassallugit,
tusarniaanermullu iluamik peqataatittariaqarpavut, Palle Jerimiassen oqarpoq.
Taassuma tusarniaanerup sivitsorneqarnissaa, aamma Kim Kielsenip Uummannami, Upernavimmi Qaanaamilu aalisartut qanimut oqaloqatigissagai, piumasaraa.
- Ataasiaannarluni innuttaasunut ataatsimiisitsineq naammanngilaq. Aalisartut naatsorsuutigisinnaasariaqarpaat Naalakkersuisoq iluamik oqaloqatigissallugu, taamaalilluni inatsisip nutaap iluamik saqqummiunnissaanut aamma
aalisarnermut inatsimmut suliap ingerlateqqinnissaanut pingaarutilinnik ilanngussinissaminnut periarfissaqalissapput, borgmesteri oqarpoq.
Kielsenimut suliassaq pingaarutilik
Siumumeersoq Kim Kielsen aalisarnermut piniarnermullu naalakkersuisunngortinneqarmat suliassat annersaasa ilagaat aalisarnermut inatsisip inissinnissaa, taamaalilluni 2025-miit atuutilersussatut ukioq manna Inatsisartuni saqqummiunneqarlunilu akuersissutigineqarniassammat.
Tusarniaaneq sivitsorneqassappat pilersaarutip naammassinissaanut unammillertitsissanersoq nalunarpoq, qularnanngilarli Siumup qinersisartuisa akornanni suliap suliarineqarnera, aamma Kalaallit Nunaanni inuussutissarsiornermi pingaarnerpaami suliaqartut sivikitsumik peqataatinneqarnerat naammagineqanngitsut.