Tusass sinneqartooruteqalaartoq

Tusass-imi siulersuisut 2021-mut naatsorsuutit akuerisimavaat, naatsorsuutit takutippaat akileraarutit suli peernagit 112 millioner koruuninik sinneqartooruteqartoqarsimasoq. Tassa ukiup siulianut sanilliullugu 55 millioner koruuninik ikinnerusunik.

Tusass nittartakkamigut taamatut ilisimatitsissuteqarpoq.

- Nunarsuatsinni pissutsit allanngorartuartuupput, teknologiimullu tunngatillugu siuariarnerit assut annertupput. Atuisut datamik annerusumik internetimillu aalajaannerusumik kissaateqarput. Taamaattumik Tusass periusissami uani isumannaallisaaneq attaviillu patajaannerusut annertuumik aningaasaliiffigai, nittartakkami allassimavoq.

Iluarsartuussinerit sinneqartoorutinut ikilisaasut

- Tusassimi 2021-mi ukiumut angusaq 2020-mut sanilliullugu 55,0 millioner koruuninik annikinnerusimavoq. Nuummiit Qaqortumut imaatigut kabelimik sarfatigut ajutoortoqarnermi iluarsartuussinissamut aningaasat immikkoortinneqarsimanerinit 19,0 millioner koruuninik naleqarsimavoq, Tusass allappoq.

Inuussutissarsiortunut atuisunullu iluarsartuussinerup pitsaanerpaamik ingerlanneqarnissaa qulakkeerniarlugu iluarsartuussinerup aasaru 2022-mi ingerlanneqarnissaa pilersaarutaavoq.

Cyberi aqqutigalugu saassussisoqartartoq

Cyberilu aqqutigalugu saassunneqarsinnaanissaq Kalaallit Nunaata nalunaarasuartaateqarnikkut attavilersugaaneranut navianartunut ilaavoq, amerliartuinnartut pitsaanerusumik attaveqarnissamut pisariaqartitsineranni. Tusass-ip siulersuisuini siulittaasup Stine Bossip tamanna ilungersunarluinnartutut isigaa, erseqqissaassutigalugulu ukioq 2021 isumannaallisaanermut atorneqarsimasoq.

- Nunarsuaq tamaat cyberikkut saassussinernit navianartorsiorpoq, Kalaallillu Nunaat tamatumani mininneqanngilaq. Navianartumit illersorsinnaajumalluta teknologiitta sapinngisamik isumannaatsuunissaa ingerlatattalu ajornanngitsumik paasiuminartumillu ingerlannissaat pingaaruteqarpoq, siulittaasoq oqarpoq.

Kaaviiaartitat ikinnerulersimasut

Tusass-ip kaaviiaartitai ukiup siulianut sanilliugit 16,1 millioner koruuninik ikinnerusimapput. Allakkat nassiunneqartartut ikiliartornera, aammali tamatuma saniatigut atuisut amerlasuut atuisuuffinnit akiligassaqarfiunerusunit nuutsernerat, ass. qangatut angerlarsimaffinni oqarasuaateqarnermit Tusassimi neqeroorutinut akikinnerusunut flatrateusunullu nuussornerat tamatumunnga pissutaanerpaavoq.

Tusass-imit qangatut angerlarsimaffinni oqarasuaateqartarneq bredbåndinillu pisoqaanerusunik atuisarneq atorunnaariartortinneqarput.

- Legacyteknologi”-mik taasartakkatsinnik atuiunnaarnitsinnut peqqutaavoq atuisutsinnut neqeroorutitsinni teknologiit isumannaannerpaat atorneqarnissaannik qulakkeerinninnissarput, tamanna atuisutsinnut uagutsinnullu iluaqutaammat. Atuisut taamaalillutik aamma qaammammut aalajangersimasumik akiliillutik killeqanngitsumik oqaluussisinnaaneq periarfissarilerpaat, pisortaaneq Kristian Reinert Davidsen oqarpoq.

Legacyteknologimik atuiunnaarnissamut pisariaqartitsineq aasami 2021-mi annertusineqarpoq, tassanimi Tusassip inuussutissarsiortunut oqarasuaateqarnermut platformia silataaniit saassunneqarsimavoq. Saassutsinneq katillugu 0,5 millioner koruuninik akeqarsimavoq, atuisunilli ingerlatsinikkut aningaasatigullu eqquinani.

Neqeroorutinik teknologiinillu nutaanngilisunik atorunnaarsitsiartorneq Tusassillu attaveqaataani isumannaallisaaneq 2022-mi suli ukkatarineqassaaq, naatsorsuutigaarpullu 2021-mi angusat assigalugit angusaqassalluta, Tusass-imit ilisimatitsissutigineqarpoq.