SAKKORTUUMIK ISORNARTORSIUISOQAREERSOQ
Tusass Starlinkimik oqaloqateqarnerarpoq
Starlinkip suleqatigisinnaanera misissorniarlugu oqaloqatigiittoqartoq, Tusassip erseqqissarpaa, ingerlatseqatigiiffik nakorsamit isornartorsiorneqareerluni ilisimatitsivoq.
Arkivfoto
Leiff Josefsen
Tasiilami
nunap immikkoortuani nakorsaanerup Hans Chr. Florian Sørensenip
pingasunngornermi Tasiilami napparsimmaviup internetimut Tusassikkut
attaveqarnera sakkortuumik isornartorsiorpaa, Starlinkikkullu
attaveqarneq pillugu nuannersumik misigisaqarnini oqaluttuaralugu.
Tusassip
isornartorsiuineq sisamanngornermi tusagassiuutinut nalunaarummi
akissuteqarfigaa, tassanilu erseqqissarneqarpoq Starlink
suleqatigineqarsinnaanersoq oqaloqatigineqartoq, kisianni Tusassip
pitsaanerpaamik aaqqiissutissamik nassaarnissaminut aamma allat
peqataatinneqartut oqaatigaa:
Nipangersimanissamik
isumaqatigiissut
-
Tusassip arlaleriarluni Starlink oqaloqatigisarsimavaa. Tusassip
oqaloqatigiinnerup aallartinnerani nipangersimanissamik
isumaqatigiissut atsiorsimavaa, taamaattumik massakkorpiaq
taamaallaat oqaatigisinnaavarput, suleqatigiinnissamut periarfissanik
ujartuigatta.
-
Tusassimut pingaaruteqarpoq Nunatsinni atortulersugaaneq
pingaarutilik, Nunatsinniillu aqunneqarnissaa, namminersortuniillu
akisussaaffigineqannginnissaa, Tusassimit tusagassiuutinut
nalunaarummi tamanna oqaatigineqarpoq.
Suliffeqarfiup
nassuerutigaa qaammataasatigut attaveqaatit unammillernartoqartut,
eqqaasitsissutigineqarporli juunip sisamaani qaammataasatigut
attaveqaatit nutaat saqqummersinneqassasut.
Tusassip
erseqqissarpaa Starlinkip Kalaallit Nunaanni ingerlannissaanut
akuersissummik tunineqarnissaanut apeqqut attaveqaqatigiinnermut
inatsimmut tunngasoq, taannalu Inatsisartunit kisimi
aalajangiiffigineqarsinnaavoq, aamma Nalunaarasuartaateqarnermut
Aqutsisoqarfimmit ingerlanneqartussaasoq.
Unammilligassat
suleqatigiissutigineqartut
Tasiilami
napparsimmaviup Starlink atorlugu attaveqalersinneqarnerani
ikiorneqarsimanertik pissutigalugu ingerlatsivik politiinut
unnerluutiginiarlugu aqutsiveqarfik aalajangersimavoq.
Nakorsap
oqarnera naapertorlugu Tusassip attavianit attaveqaat alla sulinermi
piffissamik sipaarfiungaatsiarsimavoq.
Tusassip
isornartorsiuineq tamanna qisuariarfigigamiuk oqaatigaa
peqqinnissaqarfimmi aqutsisut unamminiarnartut pillugit
suleqatigiittoqartoq.
Tamanna
Kalaallit Nunaanni Peqqinnissaqarfimmi pisortap Tina Amondsenip
Tusassimit nalunaarummi uppernarsarpaa:
-
Ukiuni kingullerni sumiiffinni amerlasuuni
pitsanngorsaanerujussuaqarpoq, Tasiilamilu ajornartorsiutit
aaqqiissutissamik ataavartumik Tusass suleqatigalugu
nassaarineqarsinnaanissaat qilanaaraara, pisortaq oqarpoq.