Tusassip maannakkorpiaq Starlinkip Kalaallit Nunaanni sullissinermik ammaanissaa pillugu isumaqatiginninniarfigileruttorpaa. Tamatumani Tusassip kaaviiaartitaminik annaasaqarnissaa kingunerissavaa, tamannalu isertitaanut eqquissaaq, John Strand, nunani tamalaani digitalimik attaveqaasersuinermi siunnersorti, nunarsuarlu tamakkerlugu digitalimik isumannaallisaarnermi misilittagaqartoq naliliivoq. Tusassip sullissineq Starlinkip tigusaa annaassagaa taassuma ersissutigaa.
– Starlink ammaakkaanni, taamaalilluni inuit tigooraassummik taakkunannga pisisinnaalerlutik, internetikkullu akiliisalerlutik, taava aningaasat Starlinkip Tusassip pissaralui tigussavai, Tusassip imminut akilersinnaassusia appassaaq, aningaasaliinissamullu periarfissai, sinneqartoorutiminillu namminersorlutik oqartussanut tunniussisinnaanera annikinnerulissaaq.
Tusassip maannakkorpiaq Starlinkip Kalaallit Nunaanni sullissinermik ammaanissaa pillugu isumaqatiginninniarfigileruttorpaa. Tamatumani Tusassip kaaviiaartitaminik annaasaqarnissaa kingunerissavaa, tamannalu isertitaanut eqquissaaq, John Strand, nunani tamalaani digitalimik attaveqaasersuinermi siunnersorti, nunarsuarlu tamakkerlugu digitalimik isumannaallisaarnermi misilittagaqartoq naliliivoq. Tusassip sullissineq Starlinkip tigusaa annaassagaa taassuma ersissutigaa.
– Starlink ammaakkaanni, taamaalilluni inuit tigooraassummik taakkunannga pisisinnaalerlutik, internetikkullu akiliisalerlutik, taava aningaasat Starlinkip Tusassip pissaralui tigussavai, Tusassip imminut akilersinnaassusia appassaaq, aningaasaliinissamullu periarfissai, sinneqartoorutiminillu namminersorlutik oqartussanut tunniussisinnaanera annikinnerulissaaq.
– Starlink aningaasanik Kalaallit Nunaannit annissuilissaaq, taakkullu inuiaqatigiinnut kalaallinut sunniutaat Carimiami ITmik suliffeqarfissuit sunniutaattulli ilissaaq. Taakku aaqqissuussineq atornerluppaat pisisartullu attaveqaatinut akiliutaat inuiaqatigiinnut utertitsinngivillutik annissorlugit, John Strand, Caribiami qeqertaaqqani techimik suliffeqarfissuit atornerluinerannit annertuumik misilittagaqarpoq, taakkulu Kalaallit Nunaata anginerujussuunera paasissutissanillu digitalinik siaruarteriffigalugu akisunerujussuunera eqqaassanngikkaanni, Kalaallit Nunaannut assersuunneqarsinnaapput.
– Sullitakka aqqutigalugit arlalinnik misilittagaqarpunga. Digicel sullitaannut ilaavoq, taannalu nunani Caribiamiittuni mikisuaqqani 25-ni nalunaarasuarnermik ingerlatsivoq. Taakku pinngortami ajunaarnersuisut nalaattarpaat (anorersuit nunallu sajuttarneri), ilaatigut Haitimi, nunarsuullu immikkoortuani tassani piffinni allani. Kalaallit politikeriisa Starlinkip Tusassimut unammillernissaanik isumaqarlutik oqaluttut tusaagaangakkit qungujuinnartarpunga.
– Aningaasat sumut tunnissaat isumaliutigisimanngilluinnarpaat, soorluttaaq aningaasat qanoq amerlatigisut Tusassip Namminersorlutik oqartussanut ingerlateqqittarnerai imalluunniit aningaasat qanoq amerlatigisut attaveqaasersuutinut aningaasaliissutigisarnerat isumaliutigisanngikkaat.
– Sullitat ullumikkutut amerlatigippata, 5.000-inilluunniit ikinneruppata Tusassip ingerlanneqarnerata akia nikinnavianngilaq. Sullitat 5.000-t kaaviaartitaat Tusassimit Starlinkimut ingerlatsisumulluunniit allamut nuunneqartut, Tusassip karsimini isertitaminit annaasassarai, tamatumalu taakku akiitsuminnik isumaginnissinnaanerat, attaveqaatinik piffinnut mikisunut aningaasalersuisinnaanerat, taakkulu sinneqartoorutinik, namminersorlutik oqartussat innuttaminnut atorsinnaasaannik pilersitsinissamut periarfissaat sunnerneqassapput, tassanilu mittarfinnut nutaanut aningaasalersuinerit ilaapput, John Strand oqarpoq.
Starlink akikinneruvoq
Nalunaarasuarnermik sullitat politikerillu qujageqqusaaginnartut ussernartorsiorfigisaat tassaavoq Starlinkip atornerata akikinnerunera. Tusass piffinnut mikisunut digitalimik attaveqaatissanut periarfissanik aperigaanni, taakku tuluit satellitinik suliffeqarfiat OneWeb, Tusassip Kalaallit Nunaanni imarsiortunut sukkanerusumik internetiliinissamut isumaqatigiissuteqarfigisaa, Tusassillu Pituffimmi suleqatigisaa innersuuttarpaat.
Sullitap OneWebimik Kalaallit Nunaanni umiarsuarni marlunni attaviliisup ikkussineq 300.000 koruuneqartoq, qaammammullu 12.500 koruuninik akiliisarnissaq, minnerpaamillu qaammatini pingasuni sullissinermik pisisarnissaq oqaatigaa, taannalu 2024-mi upernaakkut Sermitsiami allaaserisami atuarneqarsinnaavoq. Starlinkimut antiinip 3400 koruuneqarnera qaammammullu 485 koruuneqarnera assersuutigineqarsinnaavoq.
Alla Starlinkimik atuisinnaannginnermik naammaginninngitsoq tassaavoq Tasiilami siusinnerusukkut nakorsaanerusimasoq, Starlinkikkut attavilerneqartoq, tamannalu Tasiilami peqqinnissaqarfimmut ajunngilluinnartuusimavoq. Kisermaassinermullu unioqqutitsisuunerarlugu peerneqarpoq. Kingorna Tusassip OneWeb aqqutigalugu aaqqiissutaanut utertoqarpoq, taannalu Tusassip ajunnginnerarpaa.
Martin Gjødvadilli Inu:IT-meersup isumaa malillugu Starlink pitsaalluinnartuuvoq.
– Maannakkut satelliterpassuaateqalereernerat pissutigalugu unammillertiminnit siuarsimanipilussuupput (maannakkut satellitit 7.086-it atorneqarput). Starlinkili kisimi naammanngilaq. Isumarput malillugu Kalaallit Nunaat Tusassilu ingerlatsisunik imminnut attuumassuteqanngitsunik marlunnik toqqammavilimmik periuseqartariaqarpoq – taamaanngippat attaveqaatit qajannartumik inissisimassapput, Martin Gjødvad Sermitsiamut oqarpoq.
