Ujarassiuup kuultisiorfimmit nalunaarut apeqquseraa
AEX Goldip kuultisiornini kusanartorujussuanngorlugu saqqummiuppaa, ujarassiooq Ole Christiansen oqarpoq.
Aatsitassarsiutileqatigiiffimmit AEX Goldimit sapaatip-akunnerani kingullermi saqqummiunneqarpoq, ingerlatseqatigiiffik Kujataani Nalunami kuultisiornermini neriuuteqartitsisumik angusaqarsimasoq.
Ujarassiuulli aamma Nuna Mineralsimi pisortaasimasup Ole Christiansenip aatsitassarsiutileqatigiiffimmit nalunaarut qularnartoqartinneqarpoq.
Ole Christiansenip tusagassiorfitsigut nalunaarut børsimut nalunaarummik "kusassaasimanertut" taavaa. Ujarassiuup ilanngullugu oqaatigaa, nammineq isummani malillugu tusagassiorfitsigut nalunaarutip kuultisiorneq isumalluarnarpallaartutut isikkoqartilersimagaa.
- Nalunaarut eqqortoq atuaraanni isumaqarnarsinarpoq, Nalunami kuultisiorniarnerup siunissaqarnera qularnartoqartoq, Ole Christiansen Sermitsiaq.AG-mut allakkatigut oqaaseqaateqarluni oqarpoq.
Taassuma oqaatigaam tusagassiorfitsigut nalunaarummi allassimasoq, AEX Goldip qillerisimanerata takutissimagaa "ujarak en ton-iugaangat kuulti 139 grammiusartoq, nunalli iluai aatsitassarsiornermi pitsaassuseq agguaqatigiissillugu 4-6 g/t.-iusoq"
AEX Gold: Suliniut annertullunilu suliassarujussuuvoq
- Børsimut nalunaarut atuarsiuk, tassa allassimavoq tonsimut 139 grammimik kuultitaqarneranik oqaaseqarsimaneq eqqortuunani, tonsimut 61,43 grammimik kuulitaqartoq, nalunaarummilu misissueqqissaarsimanerit marluk ataatsimoortinneqarsimallutik, Olse Christiansen allappoq.
Sermitsiaq.AG-mit AEX Goldimut isornartorsiuineq saqqummiunneqarsimavoq, suliffeqarfimmiillu oqaaseqartitap oqaatigaa, suliniut suliassarujussuusoq, nalilipilussuillu saniatigut naleqarpianngitsunik nassaartoqarsinnaasartoq:
- Nalunaq misissuiffiuvoq annertullunilu suliassarujussuusoq, taamaammat pitsaavallaanngitsut saniatigut 'Pitsaalluinnartunik' sukkut tamaanna nassaartoqarsinnaavoq, oqaaseqartitaq allakkatigut akissuteqarluni oqarpoq.
Oqaaseqartitap erseqqissaassutigaa, ingerlatseqatigiiffiup tusagassiorfitsigut nalunaaruteqarsimaneratut, kuultimik nassaartoqarsimasoq:
- AEX-imit misissuinermi nutaamik periuseqalerniarluni paasissutissatut nassaarineqarsimasut qaammatini 18-ini kingullerni nalilersorneqarsimapput. 2021-milu suliaqarnermi periutsip tamatuma sunniuteqarluarnera uppernarsarsimallugu, maannalu siusinnerusukkut suliaqarsimasunit ilisarineqarsinnaanngitsumik nutaarluinnartut aatsitassarsiortoqarsinnaalluni. Isumalluutit annerutillugit aatsitassarsiorneq sivisunerusumik ingerlanneqarsinnaavoq, oqaaseqartitaq oqarpoq.
AEX Gold ilaatigut Namminersorlutik Oqartussat ingerlatseqatigiiffiutaannit Greenland Venturemit Kalaallillu Nunaanni soraarnerussutisiaqarnissamut katersivimmit SISA-mit miliuunilikkaanik aningaasaliiffigineqarsimavoq. Suliaq pillugu AG-mi sapaatip-akunnerani matumani saqqummersumi paasisaqarnerusinnaavutit, akiliillutit ugguuna iserfigisinnaavat: