- Nuummi mittarfiup nutaap
atulerneratigut Avannaanit timmisartumut billetit akitsorujussuarput.
Nuliaralu aasaanerani sulinngiffeqarnerup nalaani Ilulissanit
Kangerlussuaq aqqusaarlugu 2023-mi 5.816 koruuninik akiliilluta
Danmarkiliarpugut tamatumalu saniatigut Kangerlussuarmi unnuilluta.
Ukioq manna Nuuk aqqusaarlugu taama angalaneq arlaleriaammik
akisuneruvoq, atuartartoq Sermitsiamut allappoq.
- Nuummi mittarfiup nutaap
atulerneratigut Avannaanit timmisartumut billetit akitsorujussuarput.
Nuliaralu aasaanerani sulinngiffeqarnerup nalaani Ilulissanit
Kangerlussuaq aqqusaarlugu 2023-mi 5.816 koruuninik akiliilluta
Danmarkiliarpugut tamatumalu saniatigut Kangerlussuarmi unnuilluta.
Ukioq manna Nuuk aqqusaarlugu taama angalaneq arlaleriaammik
akisuneruvoq, atuartartoq Sermitsiamut allappoq.
-
Tamatuma kinguneranik
ukioq manna aasaanerani
sulinngiffeqarluta
angalanissarput taamaatiinnarparput, naak ilaquttavut
Danmarkimiittut tikeraartaraluarlutigik.
Ukioq allortarlugu
tikeraartaraluarpavut. Tamanna ajuusaarutigaarput, ilaquttavummi
uatsinnut pingaaruteqartorujussuugamik.
Nuummiit
Københavnimut timmisartumut billetit
akiisa
assigiinnginnerujussuat
Sermitsiaq normu 29-mi allaaserereeripput, atuartartoq
Sermitsiap
aaqqissuisoqarfianut allagaqarpoq. Atuartartoq kinaassutsiminik isertuusserusuppoq, kisianni
aaqqissuisoqarfimmit kinaanersoq ilisimavarput. Atuartartup
2023-mi aasaanerani
sulinngiffeqarnermini angalanerminnut
akilikkami
uppernarsaataa ilanngullugu
nassiuppaa.
Tamanna
annerusumik
paasisaqarfiginerujumallugu
Sermitsiap Air Greenlandip nittartagaanut
apeqquteqaateqarpoq, taamaalillunilu inersimasut
marluk Ilulissanit Nuuk aqqusaarlugu Københavnimut angalanerat
sapaatip akunnerinilu
marlunni aggustimi tikeraarnissaannut akikinnerpaaq nassaarineqarpoq.
Taamaalillunilu
paasineqarluni billetit akikinnerpaat 25.128 koruuneqartut – tassa
akit sisamariaammik amerleriarsimapput.
Ilanngulluguli
oqaatigineqartariaqarluni akinut assersuutitut naatsorsuinermi
pineqarmat, ullormi pineqartumi aqqutaa tamaat timmisartuussinissaq,
siumut utimullu Kangerlussuarmi unnueqqaanngikkaluarluni. Tamatuma
saniatigut ilanngunneqartariaqarluni 2023-mi akit immikkut
neqeroorutigineqartumut ilaammata, tamatumani Kangerlussuarmi
nammineq akilikkamik unnuineq neqeroorutigineqartumut
ilaatinneqarluni.
Uppernarsaatissaqartut
Nunatta
Danmarkillu akornanni timmisartuussinerit Kangerlussuarmit Nuummut
nuunneqarnerisigut Avannaani innuttaasut eqqugaanissaat
naluneqanngereerpoq, maannali tamatuma kinguneri erseqqissumik
takuneqarsinnaalerlutik.
Aamma
Air Greenlandip akit aalajangersimasut atorunnaarmagit, akit
allanngorartut atortalermagit – tassa akit ullormiit ullormut
allanngortartut, piumaneqarnerat
qaqugukkullu
pisisoqarnera apeqqutaatillugit – akikinnerpaanik
nassaarsinnaanissaq
ajornakusoornerulersimavoq.
Sermitsiap
Air Greenlandimi akigitinneqartartut pillugit assersuut
saqqummiuppaa, tassanngaanniillu timmisartumut billetimut
akigitinneqartartut allanngorartuartut taamaaginnartussaasut Air
Greenlandimit isertuunneqanngilaq.
“Akit
allanngorartuartuummata
ilumoorpoq – tassa
akit qanoq
pisiumasoqartigineranut
naapertuuttuaannarlutik.
Akit appasinnerpaaffiata
qaffasinnerpaaffiatalu
assigiinngissutaat
amerlanerpaamik
arfinileriaataasarpoq,
timmisartuutileqatigiiffinnili allani marloriaammik
qaffasinnerusartoq,”
timmisartuutileqatigiiffik Namminersorlutik Oqartussanit pigineqartoq
Sermitsiamut allakkatigut akissuteqarluni taama
allappoq.
Ilulissani
mittarfik nutaaq atulerpat
Avannaani pissutsit allanngornissaat ilimagineqarpoq,
Air Greenlandilli maannakkut tamanna qanoq kinguneqassanersoq
oqaatigiumanngilaa.
“Ilulissani
mittarfittaarnissaq eqqarsaatigalugu, sapaatip akunneranut
marloriarluta Kalaallit Nunaannut Kalaallit Nunaanniillu
timmisartuussisarnissaq pilersaarutigaarput. Angallassisarnissaq
nalilersortuarneqarlunilu niuerfimmi piumaneqarneq naapertorlugu
naleqqussarneqartassaaq,” Air Greenland allappoq.
Sermitsiap
Avannaani timmisartumut billetit akii sapaatip akunnerini tulliuttuni
misissuiffiginiarpai.
