Ukiunik qulinngortorsiortup Nunarput dieselimik 85 mio. liiterinik sipaaruteqartippaa
Imermik nukiliorfiup Ilulissat eqqaani Paakitsumiittup, ukiut qulit matuma siorna illoqarfimmut innaallagissamik pilersuisunngorpoq. Imermik nukiliorfiup illoqarfik tamaat aamma illoqarfimmi innaallagissamik kiassarnerata attaveerutsinneqarsinnaasup pingajorarterutaa pilersorlugit.
Ilulissat pingajorarterutaanik ullumikkut pilersuisup Paakitsup ukiunik qulinngortorsiornera Nukissiorfiit ukioq manna nalliuttorsiutigaa.
Paakitsup ingerlanneqarnera Nukissiorfiit 30. oktobari 2012-imi tiguaat, tassa imermik nukiliorfik Ilulissanut innaallagissamik pilersuilermat.
Nukissiorfiit nittartakkaminni taama allaaserisaqarput.
Nukissiorfiit nalliuttorsiornermut atatillugu Paakitsoq inuiaqatigiinnut dieselimik qanoq annertutigisumik sipaaruteqartitsinersoq naatsorsorpaat. Tamannalu annikigisassaanngilaq.
CO2-mik 200.000-init annertunerusoq sipaarneqartoq
- Imermit nukissiorfik inuiaqatigiinnut dieselimik 9 million literimik eqqussinissamik sipaartitsivoq, tassa 2012-imi aallartinneqaramili ukiumut 24.000 tons CO2 nalinganik, Nukissiorfiit allapput, nangillutillu.
- Allatut oqaatigalugu imermit nukissiorfiup inuiaqatigiit dieselimi 85 millionit literimik sipaartippai aamma avatangiiseq CO2-mik 226.000 tonsimik aniatitsinissaraluamik. Kalaallit Nunaanni mingutsitsinngitsumut ikaarsaariartornermut tunngatillugu iluartitsilluarnerusuuvoq, Nukissiorfiit allapput.
Taamanikkut Avatangiisinut Naalakkersuisuusup, Mette Lyngep, Paakitsumi imermik nukiliorfiup 2013-imi pisortatigoortumik ammarpaa, tassa imermik nukiliorfiup ingerlatilerneqarneranit ukioq ataaseq qaangiuttoq.
Nunatsinni imermik nukisiorfiit ammarneqarnerinik sulineq Naalakkersuisut nangippaat. Inatsisartut siorna ukiaanerani ataatsimiinnermi milliardinik aningaasaliissuteqarneq akuersissutigaat, taamaalilluni Qeqertarsuup Tunuani nutaamik imermik nukiliorfeqalissaaq. Imermik nukiliorfik Qasigiannguanut Aasiannullu innaallagissamik pilersuisussaq.
Suliniutit kingulliit piviusunngornerini pisortat ataavartumik nukissiornerat maanna 70 procentiusumit 90 procentinut qaffannissaa naatsorsuutigineqarpoq.