Ukiup affaanut naatsorsuutit amigartoorfiusut: Royal Greenlandip aningaasarsiornera tatineqarpoq
Royal Greenland 2023-p affaani siullermi 113 millioner koruuninik amigartooruteqarpoq.
Aalisartitseqatigiiffissuaq Namminersorlutik Oqartussanit pigineqartoq 2023-mi aningaasarsiornikkut aallartinnerliorsimavoq.
Taamaalillutik ukiup affaanut naatsorsuutit tamanut saqqummiunneqaqqammersut 113 millioner koruuninik amigartooruteqarsimanermik takutitsipput. Aalisartitseqatigiiffik siorna piffissami tassani 96 millioner koruuninik sinneqartooruteqarsimavoq.
Angusat naammaginanngitsut, aalisartitseqatigiiffik tusagassiuutitigut nalunaarummi allappoq.
Royal Greenland naapertorlugu nunat tamalaat akornanni pisut arlallit aalisartitseqatigiiffiup aningaasaqarneranut sunniuteqartorujussuusimapput. Assersuutigalugu raajanik tunisinermi Royal Greenland isertitani 160 millioner koruuninik annaasaqarsimavoq:
Niueqateqarunnaarneq akisooq
- Ruslandimut niueqateqarunnaarnikkut niuerfimmut tassunga raajat qalipaajarneqanngitsut 1.000 tonsit missaanniittut tunineqartarunnaarsimapput, tamatumalu peqatigisaanik Norgemi Sverigemilu aningaasarsiorneq tatineqarsimalluni aningaasat nalingisa appasinnerat pissutaalluni. Tamatuma akerlianik Kinami niuerfimik raajanik qalipaajarneqanngitsunik piumasaqarluarsimavoq, Royal Greenland allappoq nangillunilu:
- Raajat uutitikkat qalipaajarnikullu nioqqutissiani Europami aningaasarliornermit Tuluit Nunaannilu Brexitimit, Kalaallit Nunaannik killilersugaanngitsumik niueqateqalernissap atuutilernissaanut piffissap sivisuup suli atuuffigisassaani, sakkortunerpaamik eqqugaasimapput.
Aalisartitseqatigiiffik tamatuma peqatigisaanik aningaasartuutinit qaffakkiartortunit eqqugaavoq:
Aningaasartuutit qaffakkiartortut
- Ukiup aallartinnerani aningaasat nalikilliartupiloornerisa nukissiuutitigullu ilungersunartorsiornerup malitsigisaannik Royal Greenlandip toqqaannartumik aningaasartuutai siorna piffissamut tassunga sanilliullugit 240 milllioner koruuninik qaffasinnerusimapput. Taakkua taamaallaat iluarsiissuteqarfigineqarsinnaasimapput tunisat akiisa 130 millioner koruuninik qaffaaviginerisigut, nalunaarummi allassimasoqarpoq.
Taamaattorli ukiumut tamarmiusumut akileraarutit suli ilanngaatiginagit minnerpaamik 100 millioner koruuninik sinneqartooruteqarnissaq Royal Greenlandimit suli naatsorsuutigineqarpoq.
(nutarterneqassaaq..)