Ukiuunerani umimmanniartoqassanngilaq: Piniartut akerliupput
Qeqqata Kommuniani umimmannik pisassiisoqanngilaq, taamaallaat aasakkut pisarinngitsuukkat ukiukkut piniarneqarsinnaallutik. Taama tusarniaanermi allassimavoq. Naalakkersuisorli umimmannik kisitsisoqarnissaanut neriorsuivoq.
Hotelli Sisimiuniittoq saneqqullugu igalaakkut takuneqarsinnaapput inuppassuit eqqissillutik issiasut. Taakkuupput piniartut aalisartullu.
Saavani nikorfavoq Aalisarnermut Piniarnermullu Naalakkersuisoq, Kim Kielsen, saniani immikkoortortaqarfimmi pisortaq Pollas Lyberth issiavoq ataatsimiinnermi aqutsinissaminut piareersimalluni. AC fuldmægtigi Nuka Møller Lund tunuani nikorfavoq, apeqqutigineqartunut paasissutissanut tunngasunik akissuteqarnissaminut piareersimalluni.
Nalunaaqutaq unnukkut arfineq-marlunngorpoq. Ataatsimiinnerlu umimmattassanut tusarniaanermut tunngavoq.
Qaqugukkut umimmaqassutsimut kisitsinissaq pitsaanerpaava? Qaqugukkut umimmaat naleqarnerpaasarpat? Ilaatigut tamakku apeqqutit ataatsimiinnermi sammineqarput.
Maniitsumi ukiukkut umimmannik pisassiisoqassanngitsoq naalakkersuisunit kissaatigineqarpoq, Sisimiunilu taamaallaat aasaq umimmatassat pisarineqarsimanngitsut ukiuunerani piniarneqarsinnaallutik.
Kisitseqqaartariaqarpusi!
Kisitseqqaartariaqarpusi matuinnarnagit, ataatsimiinnermi piniartuniit oqaatigineqarpoq.
Nangillunilu:
Ukiuunerani umimmanniarneq matuinnarsinnaanngilarsi nalullugu umimmaat qanoq amerlatiginersut.
Umimmaat ikiliartortut
Tusarniaanermi ilaatigut allassimavoq piniartut atuisullu ilisimasaat malillugit aqutsiveqarfimmi umimmaat ukiuni kingullerni takuneqartartut ikiliartortut, tamannalu ukiuunerani umimmanniarnerup assartuutit motoorillit atuiffiusup umimmaqatigiinnut ajortunik kinguneqartarneranut takussutissaasoq. Martsip qaammataani aamma 2018-imi qulimiguulimmik kisitsisoqarnerani paasineqartoq, taamani nunaminertani assartuutinik motoorilinnik ingerlaarfigineqarsimasuni umimmannik takussaasoqanngitsoq.
Taannaannaanngilarli.
- Piniartut atuisullu Kangerlussuarmeersut ilisimasaat malillugit ukiuni kingullerni pisarnermut naleqqiullugu nittaannerujussuusarpoq, tamannalu pillugu pingaartumik ukiuulernerani 2023-mi nunaminertarujussuit sermeqartiterlutik uumasullu taamaalillutik pisarnertut neriniarsinnaasimanatik. Tamanna kulavaat ilumioqartut ukiuni kingullerni akuttusigaluttuinnarnerannut peqqutaaqataasimasinnaavoq, tusarniaanermi ilaatigut taama allassimasoqarpoq.
Ukiuuneranili umimmanniarneq kisitsisoqaqqaartinnani matuneqassanngitsoq piniartuniit kissaatigineqarpoq. Umimmaat ukiukkut mamarnerusartut, ukiukkullu qivioqartarmata naleqarnerusartut ataatsimiinnermi oqaatigineqarpoq.
Naalakkersuisoq ataatsimiinnermi kaagillerpoq, kaffillerluni tiillerlunilu. Isersimasut kaagisuupput najoqqaallutillu, taamaanneranni inersuaq silaannarissarneqarpoq igalaat ammarlugit. Naggataatigut sukkuaqqanik pillerfigitipput.
Kisitsisoqassaaq
Umimmaqassuseq januaarip 26-ani kisinneqassaaq, Aalisarnermut Piniarnermullu Naalakkersuisoq Kim Kielsen oqarpoq.
Piviusunngortinniarlugu aningaasanik ujaasisoqarpoq, nassaarineqarmatalu pilersaarusiorneqarpoq. Sumi sunalu atorlugu kisitsisoqassanersoq akuerineqarpat aajangerneqassaaq, ilanngullugu oqaatigaa.
Kisitsisoqartussanngormat piniartuniit nuannaarutigineqarpoq.
Kisitsisoqarnissaa tusarlugu nuannaajallannarpoq, kisianni ilaannakortumik kisitsisoqassanngilaq!, piniartunik oqaatigineqarpoq.
Ataatsimiinneq nalunaaquttap akunnerani marlunni pisussaq sinnerlugu ingerlavoq. Ataatsimiinnerlu naammassiartuaalermat piniartut isaanni takuneqarsinnaalerpoq qasusut.
Naalakkersuisoq Kim Kielsen piniartunut takkuttunut qujavoq. Immikkoortortamilu pisortap ataatsimiinnermi oqaatigineqartut allattorpai.
Qarasara immersorluarparsi, Kim Kielsen ataatsimiittunut naggataatigut oqarpoq.
Ilanngullugu neriorsuutigaa Aalisarnermut inatsisissap tusarniutigineqarnera naammassippat sisimiunukaqqinniarluni.
Umimmattassanut tunngatillugut tusarniut decembarip 18-ani saqqummersinneqartoq januaarip 15-ani killeqarpoq.