Ulluinnarni nioqqutissat akii: Iluanaarutit qummut killeqartinnissaannut inatsit Siumumit siunnersuutigineqalersoq
Inatsisartunut qineqqusaarnermi Siumup anguniarnerarpaa ulluinnarni nioqqutit niuerutigineqarnerini iluanaarutit qummut killeqartinneqalernissaat. Maanna aalajangiiffissatut siunnersuut qaqinneqartussanngorpoq. Siumup politikkikkut oqaaseqartartua Doris. J. Jensen uppernarsaavoq Inatsisartut upernaakkut ataatsiminneranni siunnersuummik qaqitsissalluni.
Atuisartut illersorneqarnissaat pillugu nunatsinni iliuuseqarsinnaaneq tikinneqaraangat misikkariffigineqarluinnartarpoq, piffissallu ingerlanerani nunatsinni naalakkersuinermik suliaqartut kissaatigiuartarpaat atuisartut sapinngisamik annerpaamik illersorneqassasut aammalu nioqqutissanik akit aalajangersarneqartarneri isertuaatsumik tamanut takussutissiorneqartassasut kissaataasarluni.
Piffissami matumani nunatsinni innuttaasorpassuit aningaasaqarnikkut oqimaatsorsiorput, isertitakinnerpaaginnaanngitsut aammali akunnattumik isertitallit angummassinnaajunnaalersutut inissisimalersimallutik. Aningaasarliornerup nassataanik Naalakkersuisut Inatsuisartullu inuiaqatigiinnut aningaasanik siammarteriniarsaripput, assersuutigiinnarlugu neqit neqinillu nioqqutissiat akitsuutaasa piivinneqarnerisigut.
Taamaakkaluartoq ulluinnarni atugassanik, pingaartumik inuussutissanik nioqquteqartuni pisiniarfinni akit qaffasissorujussuupput, pingaartumik tamanna nunaqarfinni isorliunerusunilu ulluinnarsiutaalluni. Tassunga tunngatillugu aningaasaqarnermut Naalakkersuisoq, Erik Jensen ilimasaarereerpoq pisortat suliffeqarfiutaat akiliisitsillutik innuttaasunut sullissisartut akinik qanoq aalajangersaariaaseqarnersut pillugu misissuisoqassasoq aammalu akitsuutikillisaanerit akitsuutinillu atorunnaarsitsisarnerit najoqqutaralugit nioqqutissanik ilumut akikilliliisarnersut misissoqqissaarneqassasoq.
Doris J. Jensen: Iluanaarutit qummut killeqartinnissaat pillugu inatsit avaqqunneqarsinnaajunnaarpoq
Parteertik sinnerlugu siunnersuummik saqqummiussisussaq tassavoq Doris J. Jensen. Taassuma erseqqissaatigaa oqimaaqatigiissaariniartoqartariaqartoq, tassami illuatungaani namminersorlutik inuussutissarsiuteqartut ineriartortitsinissaminnut periarfissaat annikillisaarniagassaatigaluni illuatungaanilu aamma atuisartut ullumikkumut sanilliullugu illersorneqarnerunissaat anguniagassaalluni:
- Piffissanngorpoq pingaartumik ilummut qissiminnissarput, tassami pisortat suliffeqarfiutaat qanoq annertutigisumik aningaasarsiorlutik iluanaartassappat? Sooruna assersuutigiinnarlugu piniarnermut atortut nunaqarfinni marloriaammik, amerlasuutigullu suli annerusumik akeqartinneqartut illoqarfinni akinut sanilliullugu? Akinik aalajangersaasarneq naleqquttumik tunngaveqarpa naapertuilluarpalu? Akit qanoq inissinneqassanersut qanoq aalajangersaasoqartarpa? Qanoq ililluta pisortat suliffeqarfiutaasa naapertuilluanngitsumik namminersortunut unammillertarnerat unitsissinnaavarput, tassami illoqarfinni nunaqarfinnilu avinngarusimasuni pisiniarfeeqqat pilersinneqartaraluartut sukkasuumik matoqqiinnartarput pisortanit unammillerneqarlutik? Tamakku pisarput atuisartut illersorneqaratik imminiiginnakkatut inissisimatinneqarlutik inissisimaneranni, tamakku iluarsiivigineqartariaqalerput, iliuuserineqarsinnaasorlu tigussaanerpaaq tassaavoq iluanaarutit qummut killeqartinnissaannik inatsiseqalerneq, Doris J. Jensen nassuiaavoq.
Akit qummut killeqartinneqarnerat atuisartunut pisiniarfinnullu oqimaaqatigiissitsinerulissaaq
Oqimaaatigiinnerusumillu inissittoqarnissaa anguniarlugu pisiniarfiit iluanaarutigisinnaasaata qummut killilerneqarnissaa tamanut atuuttussanngorlugu siunnersuutigineqassasoq Doris J. Jensen erseqqissaavoq. Taassuma innersuussutigaa siunittaasumi, Erik Jensen-ip ernumassuteqarnera akinut apparsaataasussanik iliuuseqartoqartaraluartoq sunniuteqangaarneq ajornera pillugu:
- Qangaanerusoq atuisut ersarilluinnartumik illersorneqarput, atuisartut sinnerlugit pisiniarfinni akit aalaakkaasumik misissorneqartaarput aammalu naapertuilluanngitsutut iluamillu nassuiaatissaqartinneqanngitsumik qaffasissumik akeqartitsisoqartutut naliliisoqaraangat uparuaasoqartarluni, taamatuttaaq kommunit tamarmik (taamanikkut 18-iusut) atuisut illersortissaannik ingerlatsiveqarnikuullutik. Maannali suna tamarmi qitiusumit ingerlanneqalernikuuvoq, isumaqarpungalu tamanna nalileqqittariaqaripput ilumut atuisartut illersorneqarnerat iluamik isumagineqarnersoq. Taamaattorli ataatsimut isigalugu aamma akinik apparsaataasussanik iliuuseqartoqaraluartoq akit apparatik qaffakkaluttuinnartarnerat takussaaqisoq iliuuseqarfigineqartariaqarmat pisiniarfiit nioqqutissaatitik aqqutigalugit qanoq annertutigisumik iluanaarsinnaanerat pillugu inatsisitigut aaqqiisariaqalerpugut, taamaaliornikkut pingaartumik ulluinnarni nioqqutit pisisartut pinngitsoorsinnaanngisaat qanoq annertutigusumik iluanaaruteqarluni tuniniarneqassanersut killilersimaarneqarsinnaassammat, pingaartumik iluamik nassuiaatitaqanngitsumik qaffaasarnerit pinaveersimatinneqartariaqarmata, siunnersuuteqartoq Doris J. Jensen (S), Inatsisartut 2024-mi upernaakkut ataatsimiinneranni saqqummiissamaartoq tunngavilersuivoq.