Ulluinnarni pisiassat: Pilersuisoq akinik akuttunngitsumik nalimmassaasarniarpoq
2022-mi septembarimiilli aammalu qanittoq tikillugu ataatsimut isigalugu akinik iluarsiisoqarsimanngilaq, taamaattumillu Pilersuisoq piffissami sivisunerusumi inuussutissanut pissusiviusuni akigititat inorlugit akeqartitsisimalluni. Tamannali allanngussaaq.
Nunalerinermut, Imminut Pilersornermut, Nukissiuutinut Avatangiisinullu Naalakkersuisup Kalistat Lundip (IA), Peter Olsenip (IA) nuna tamakkerlugu Pilersuisup pisiniarfiutaani inuussutissanut akit assigiinnginnerujussuat pillugu paragraf 37 naapertorlugu apeqqutaanut akissuteqarniarluni KNI-mut paasissutissanik pissarsiniarsimavoq.
Taamak allaaserinnippoq aviisi Sermitsiaq.
Kingullertigut akit nikerartorujussuupput, naak ukioq manna KNI akileraarutit suli ilanngaatiginagit 239 millioner koruuninik iluanaaruteqaraluartoq, aammalu kiffartuussinissamut isumaqatigiissut ukiut siuliini 5 millioner koruuninik aningaasartaqarsimasoq 13 millioner koruuninut qaffanneqarsimagaluartoq.
- Akigititat qaffanneri pisisartutta maannakkorpiaq kingusinaartumik misigisaat, nunarsuarmi akigititat qaffannerannut aammalu assartuinermut aningaasartuutit qaffannerannut attuumassuteqarpoq. Ataasiakkaat eqqaassanngikkaanni Danmarkimi - nunarsuarmi inuussutissanut akigititat ukiuni marlunni kingullerni malunnaatilimmik ingerlaavartumillu qaffassimapput, tassani inuussutissanut akigititat agguaqatigiissillugu piffissami 21 procentit sinnilaarlugit qaffassimallutik.
- Pilersuisumi nioqqutissat amerlanerpaartaat Danmarkimiit pisiarineqartarmata, akigititat qaffannerat taanna aamma Kalaallit Nunaanni atuutilerpoq. Inuussutissanut atuisartunut akigititanut naleqqersuut 2023-mi juulimi 132,9-mut killippoq - tamannalu Danmarkimi uuttorneqartuni aatsaat taama qaffasitsigilerpoq. Inuussutissanut assigiinngitsunut ataasiakkaanut akigititat qaffanneri annertoorujussuarnik assigiinngissuteqarput.
Allaaserisaq tamaat aviisimi Sermitsiami atuaruk:
