Umiarsualiorfik nutaaq umiarsuarnik alapernaarsuutinik sanaartussasoq

Sakkutuut imarsiortut issittumi umiarsuaat alapernaarsuutit nutaat, maannakkut umiarsuarnik pisoqaallutillu nungullarsimasunik Thetis-klassimeersunik taarsiisussat umiarsualiorfimmi nutaarluinnarmi Frederikshavnimi sanaartorneqassasutut isikkoqarput.

Illersornissamut isumaqatigiissummut partiit tallimanngorneq juulimi sisamaani Frederikshavnimi sakkutuut umiarsuaasa anginerusut sanaartornissaannut timitalittut toqqammavissiortoqassasoq isumaqatigiissutigaat – umiarsualiornermut atortorissaarutitut taaneqartoq, politikerit oqaasiini umiarsualiorfimmut taaguutigititaq atorlugu.

Umiarsualiorfissatut Frederikshavnip angerlarsimaffiussanera toqqarneqarpoq, illoqarfik umiarsualiornermik suliffissuaqarfeqareermat – aammalu danskit sakkutuut umiarsuaqarfiisa marluk aappaannut illoqarfittut angerlarsimaffiunera pissutigalugu. Frederikshavnimi sakkutuut umiartortut inissisimaffigisaat ilaatigut tassaavoq sakkutuut imarsiortut 1. eskadreannut tunngavigisaq, tassaniillutik Thetis-klassimi umiarsuit alapernaarsuutit sisamat pisoqalisut, umiarsuit alapernaarsuutit nutaanerusut Knud Rasmussen-klassimiittut pingasut, imartamik uuttortaatitut angallatit marluk, aammattaarlu Kunngip umiarsuaa Dannebrog, tassaasoq danskini orlogsflådimi umiarsuit ingerlatarisaasut pisoqaanersaat.

Sakkutuuni sulianut tunngasutut inassuteqaat

Frederikshavnimi sakkutuut umiartortut stationiannut qanittuunerup umiarsuarnik aamma sakkutuut atortuinik kingornatigut ingerlatsinermi aserfallatsaaliugaqarnermilu sanaartornerup nalaani ilisimasanik iluaquteqarnissamut periarfissatsialannik tunisissanera sakkutuuni aamma atortorisanik sulianut tunngasunik ingerlatsisuni inassuteqaataavoq, tusagassiorfinnut nalunaarummi Illersornissamut Ministereqarfik allappoq.

Sakkutuunut umiarsualiorfiup nutaap Frederikshavnip Umiarsualiveqarfiani nunaminertami 135.000 m²-it missaanni inissinneqassasoq naatsorsuutigineqarpoq. Sumiiffik umiarsualiveqarfittut siunertanut atugassiarineqarpoq, aammalu sissiukkamut tamaaneereersutullu attaveqaasersuutinut toqqaannartumik attaveqarpoq, tamakku umiarsualiorfimmi suliarisanut naleqqulluinnartitsisuullutik, tusagassiorfinnut nalunaarummi allami Frederikshavnip kommunia allappoq.

Pilersaarutigisat ullulerneqanngitsut

Umiarsualiorfiup nutaap qaqugu piareerluni sakkutuut umiarsuaannik nutaanik sanaartornermik aallartitaqarsinnaanera suli ilisimaneqanngilaq.

Politikkikkut piffissami sivisunerusumi oqallinnerup kingornatigut umiarsualiorfik nutaaq pillugu aalajangiussineq takkuppoq, tassalu danskit illoqarfii arlallit suliassamut imminnut neqeroorutigisimallutik – ilaatigut Esbjerg, tassanilu Folketingimi siulittaasoq Søren Gade, Esbjergip umiarsualivianut siulitaasuunera pissutigalugu marloqiusatut inissisimaffeqarneranik isornartorsiorneqarsimavoq.

Aalajangiussaqarneq arlallit isornartorsiorsimavaat – ilaatigut sakkutuut imarsiortuni siusinnerusukkut kontreadmiralimit, Torben Ørting Jørgensenimit, taanna isumaqarmat Danmarki umiarsuarnik orlogsskibinik nammineq sanaartugaqarnissamut mikivallaartoq – taamatuttaarlu umiarsualiorfimmi aatsaat sanaartugaasussami Frederikshavnimi taakkuninnga sanaartugaqarnissaq suliassap pinasuartussatut iluseqarneranut tulluartuunngitsuunnginnerarlugu.

Umiarsualiorfik nutaaq nutaanik sanaartugaqarnermut, imaluunniit katiterussiffittut suliffissuaassanersoq, tassalu danskit suliffeqarfiinit allanit, ajornanngippallu nunanit allanit suliffeqarfinneersunit modulit atorlugit umiarsuit katiterlugit naammassineqartarlutik, Folketingimi partiit aatsaat aasakkut sulinngiffeqarnerup kingornatigut aalajangiutissavaat.

Aamma issittumi umiarsuit alapernaarsuutit taakku pingasut saniatigut fregattinik nutaanik, Sakkutuut imarsiortut hjemmeværniannut angallatinik nutaanik 21-nik, aamma imartami avatangiisit pillugit umiarsuarnik nutaanik sisamanik, aamma imartanik nakkutiginninnernut aamma immami qaartartunut inississuisarnernut sakkutuunit atorneqarsinnaasunik ilaqartut sakkutuut umiarsuaannut katersaatit anginerpaat pillugit Folketingimi partiit suli aalajangiussaqarnissartik amigaatigaat.

Angallammik orlogsfartøjimik nutaamik sanaartugaqarnissaq ukiunik sisamanik sivisussuseqassasoq missiliuutaavoq.

Issittumut isumaqatigiissutip ilaa

Issittumi umiarsuarnik alapernaarsuutinik nutaanik pingasunik sanaartornissaq pillugu aalajangiussaqarneq Issittumut aamma Atlantikup Avannarpasissortaanut isumaqatigiissutip ilaani siullermi januaarimi suliaavoq, tamanna savalimmiormiuni naalakkersuisut, aamma Nunatsinni Naalakkersuisut qanimut suleqatigalugit danskini naalagaaffimmi naalakkersuisut illersornissamullu isumaqatigiissummut partiit isumaqatigiissutigineqarluni.

Taamanikkut Namminersornermut Nunanullu Allanut Naalakkersuisoq Vivian Motzfeldt oqarpoq:

- Kalaallit Nunaat piffissami aarleqquteqarfittut isikkoqarfiup allanngorsimasup sioraaniippoq. Kalaallit Nunaanni eqqaanilu isumannaatsuutitsinerup nukittorsarnissaanut isumaqatigiissutip ilaanik matuminnga siullermik alloriarsimanerput nuannaarutigaara. Danskini naalagaaffimmi naalakkersuisunik oqaloqateqarnertik nangissallugu Naalakkersuisut qilanaaraat, Vivian Motzfeldt, Namminersornermut Nunanullu Allanut Naalakkersuisoq oqarpoq.

Umiarsuit taakku nutaat pingasut pillugit isumaqatigiissutip saniatigut aamma nakkutilliinermut droninik amerlanernik, qaammataasatigut piginnaasarisamik, aamma nunami maluginiutinik, kiisalu Issittumi Tunngaviusutut Ilinniagaqarnermut inissanik amerlanernik isumaqatigiissut imaqarpoq.