»Umiarsualivimmi inissamik pisariaqartitsivissortoqarpoq«
Eimskip umiarsualivimmi inissamik annerusumik pisariaqartitsivoq, Aarhus Havnillu allilerneqarnissaanut tapersersuivoq. Umiarsuaatileqatigiiffik taamaanngippaat Danmarkimi umiarsualivimmik allamik nassaarniartariaqassaaq. Royal Arctic Line oqaaseqarnianngilaq.
Eimskip, Royal Arctic Linep Atlantikukkut assartuisarnermi suleqataa Aarhus Havnimi inissamik pisariaqartitsivissorpoq. Inissaqarnerulinngippat umiarsuaatileqatigiiffik Danmarkimi umiarsualivimmik taarsiisariaqalissaaq. Pisortaq Jesper Sandahl, Eimskip Danmarkimi pisortaasoq taama oqarpoq.
Aviisi AG allappoq.
Eimskip Denmark pitsaasumik ineriartortikkumallugu, Eimskip Aarhus Havnimi inissaqarnerulernissaa pingaaruteqartoq, Jesper Sandahl, AG-mut oqaatigaa. Inissaaleqisoqangaarmat containerit akuersissuteqarfigineqarnikkut tallimanut taarsiullugit arfineq-pingasunngorlugit qaleriiaarneqartarput.
- Nunaminertamik allilerinissamik pinasuartumik pisariaqartitsisoqarnera pillugu Aarhus Havn sivisuumik oqaloqatiginikuuarput, allilerinissamullu pilersaarutit saqqummiunneqartut naammassineqarnissaat neriuutigalugulu naatsorsuutigaarput, Jesper Sandahl oqarpoq.
Nunguttut
Umiarsualiviup annertuumik allilerneqarnissaa maanna tusarniaassutigineqarpoq, kisianni innuttaasut annertuumik akerliugaluartut, allilerinissaq unitsikkallarneqarniarpasinngilaq.
Aarhus Havn Danmarkimi umiarsualiviit annersaraat, Aarhusillu illoqarfiata qeqqatut angitigivoq. Maannali umiarsualiviup tatisimaneqarnera ima annertutigaaq, Østhavnenip (containereqarfiup, aaqq.) Aarhusip kangerluanut talittarfilinnik nutaanik aamma nunatanik arsaattarfiit 140-t angeqqataannik allilerneqarnissaanut pilersaaruteqarpoq.
Allaaserisaq tamaat uani AG-mi pisiarisinnaasanni atuaruk: