Umiarsuaq tunitsivik nunami tunitsivinnik unitsitsivoq

Upernavik Seafoodip, sapaatit akunnerani kingullermi tunitsivimminik arfinilinnik matusisup, ukiuunerani tunitsivinnut tunisinissaq taamaatiinnartariaqassagunarpaa, aamma tunitsivik ataaseq imaluunniit arlallit aasap sinnerani matoqqatiinnartariaqassagunarput. Taamatut ilisimatitsivoq pisortaq Flemming Andersen.

Tunitsivinnik matusinermi suliffiit 200-t missaanniittut atorunnaarput, tamaanilu aalisartut tunitsivissaarupput. Nioqqutissiornermik taamaatitsineq pivoq umiarsuarmik tunitsivissamik Rubinimik, aalisakkanik nioqqutissiorfimmit Halibut Greenlandimit Tasiusap avannaani qeqertap Saattup eqqaanititaqartumit, sakkortuumik unammillerneqarnerup kinguneranik.

Umiarsuarmik tunitsiviliinerup kingunerlutsitsineranik borgmester Jess Svane marsimili ilisimatinneqareersoq Flemming Andersenip ilisimatitsissutigaa.

– Ilisimatitsissutigaarput tunitsivissamik umiarsuliineq unammillersinnaanngikkipput, taanna nunami tunitsivittulli aningaasartuuteqartanngilluinnarmat. Aamma umiarsuaq tunitsivik taamaallaat ukiumi pissaqarfiunerpaami atuuttarpoq sikuunerani pinnani, tassani pisariunerusaqaaq aningaasartuuteqarnarnerusarlunilu, Flemming Andersen erseqqissaavoq.

Borgmester Jess Svaneli isumaqarpoq umiarsuaq tunitsivik aamma Upernavik Seafoodip tunitsivii imminnut suleqatigiilluarsinnaasut. Tamannami tunngavigalugu Qaasuitsup Kommuniata aalajangerpaa Halibut Greenland qaleralinnik ukiumi ataatsimi 1.000 tonsinik pisassinneqarpoq, taamatut oqarpoq.

– Selskabi alla qaleralinnik pisassinneqarnera akigissaartitsinerulaarneralu piinnarlugit selskabi pioreersoq eqqissiviilliortitsisariaqanngilaq. Taamatut iliorneq akuerineqarsinnaanngilaq. Eqqaamaneqartariaqarpoq aalisartut arlaqartut tunitsivinnik tigusinissaminnut pisinissaminnulluunniit piareersimammata, Jess Svane erseqqissaavoq.

Selskabi Halibut Greenland aningaasatigut tapersersorneqarpoq Kalaallinit Namminersortunit pigineqartumit Greenland Venturemit.