Umiarsuarnik takornariartitsineq: Naalakkersuisut 1. juulimit atuisunut akiliisitsisalernissaminnut piareerput
Visit Greenlandip umiarsuarnik takornariartitsisarnermik misissuinerminik saqqummiussaqarnerata kingorna nunatsinni umiarsualiviit pitsanngorsarneqarnissaannik kissaateqartoqarnerani, Naalakkersuisut Kangerlussuup umiarsualiviani akiliisitsisalernissamik sulineq sukkatsippaa, ilaatigut taakku nunatsinni umiarsualivinni pitsanngorsaanermut atorneqartussaapput.
Umiarsuarnik takornariartitsisarnerup tulluarsarneqarnerunissaa Visit Greenlandimit aamma borgmesterinit arlalinnit sivisuumik kissaatigineqarpoq, taamaalilluni takornariarpassuit tuusintilikkaat Kalaallit Nunaata sineriaanut aasat tamaasa niusartut inuiaqatigiinnut, innuttaasunut aamma nunap aningaasaqarneranut pitsaanngitsumik sunniuteqannginnissaat pissammat.
Visit Greenlad taamaattumik umiarsuarnik takornariartitsinermik suliaqartut atajuartumik umiarsuarnik takornariartitsisarnerup ineriartortinneqarnissaanut innersuussutinik nalunaarusiorpoq, Naalakkersuisullu inatsit aqqutsigalugu naleqqussaanissamut arlaleriarlutik kaammattuipput.
Visit Greenlandip nassuiaataata kingulliup takutippaa, umiarsuakkut takornariartitsinermik suliaqartut nunatsinni umiarsualiviit allisarnissaannut aserfallatsaaliornissaannullu tapersiiniartut.
Pissutsit pitsaanerunissaannik kissaateqarneq paasisinnaagaat
Naalakkersuisullu tamanna tigulluarpaat. Aammattaaq umiarsualivimmi isumannaallisaanerup pitsanngorsarneqarnissaanut atoruminarsarnissaanullu suliamik aallartitsisoqarpoq.
- Sullitatik pitsaanerusunik atugassaqalernissaat siunertaralugu umiarsuakkut takornariartitsinermik suliaqartut aningaasaleerusuttut paasinarluinnarpoq. Naalakkersuisut sinnerlugit naqissuserusuppara, uagut aamma nunatsinnut tikeraat pitsaanerpaamik misigisaqarnissaat soqutigisarigatsigu, ineqarnermut attaveqaasersuutinullu naalakkersuisoq, Erik Jensen (S) oqarpoq.
1. juli akit piareerneqassasut
Umiarsualivimmi pissutsit pitsanngorsarniarneranni aningaasartuutit annertungaatsiassasut suliniutip aallartisarnerani paasinarsivoq. Taamaammat Sikuki Namminersorlutillu Oqartussat aningaasartuutit qanoq agguataarneqarnissaannut atatillugu oqaloqatigiipput.
Naalakkersuisut naatsorsuutigaat, siunissami qaninnerusumi akigititat allattorsimaffiannik akuerisamik saqqummiisoqarumaartoq, taakkulu juulip aallaqqaataaniit atuutilersinneqarsinnaassasut.
Akigititat allattorsimaffissaat nunani tamalaani umiarsualiviit niuernermik tunngaveqarluni ingerlanneqartut akigititaannut naleqqiunneqarsinnaanissaat naatsorsuutigineqarpoq, tamanna oqaatigineqarpoq.