Umiarsuit takornariartaatit ukioq manna aatsaat taama amerlatigisut
Nunatta karsiata umiarsuarnik takornariartaatinik takornariarpassuit iluanaarutigilaaginnartarpai, naak taakkua takornariat 50 procenterigaluaraat. Akitsuutit qaffanneqartariaqarput sullissinerlu pitsaanerusariaqarluni, umiarsuaatileqatigiiffinnit oqaatigineqarpoq.
Umiarsuarnik takornariartaatinik takornariat aappaluttunik sungaartunilluunniit assigiiaanik kavaajallit qaqqani pisuttarfinnilu angalaartut. Akunnittarfiit puttasut tikikkaangata takornarianillu tuusintinik marlussunnik nunaliaasitsigaangata illoqarfiit nunaqarfiillu ilaanni innuttaasut marloriaammik amerlassuseqalersarput. Kalaallit Nunaat umiarsuarnit nunaliallatsiarnernilu nunarsuarmiunit tamanit misigiumaneqarpoq.
Aviisi AG taama allappoq.
2023 umiarsuarnik takornariartaatinik suliaqarfimmut ukiutut rekordiliiffiusussatut isikkoqarpoq.
Kalaallit Nunaanni umiarsuarnik takornariartaatinik 421-riarluni 2022-mi tikittoqarpoq. Ukioq manna pilersaarutit malillugit umiarsuarnik takornariartaatinik 613-eriarluni nunarsuarmi qeqertat annersaannut tikittoqassaaq.
Umiarsuarnik takornariartaatinik takornariat pingaaruteqarput, takornariat 50 procentiisa missinginik amerlassuseqaramik.
- Umiarsuarnik takornariartaatinik takornariaqarneq nittarsaatinngilarput. Nalunngilarpulli najukkani suliffissanut pingaaruteqartoq, Visit Greenlandimi pisortaq, Anne Nivika Grødem, oqarpoq.
- Umiarsuarnik umiarsualivinnut arlalinnut tikittartunik pilerilersitsiniarluta suliaqarpugut Tikeraartoqarusuppugut pinngortitamut ataqqinninnermik takutitsisunik kulturitsinnillu soqutiginnittunik, takornariaqarneq piujuartitsinerusoq nunatsinni atugaalerniassammat, oqarpoq.
Takornariaq ataaseq qanoq naleqarpa?
Umiarsuarnik takornariartaatinik takornariarpassuusartut akuttunngitsumik isorinninnermik ersersitsivigineqartarput. Aamma najukkanut aningaasanik naammattunik tunniussaqartannginnerannik.
- Ilaasut amerlassusiisa najukkanilu inuiaqatigiit akornanni naapertuuttoqassaaq. Kisianni Visit Greenland takornariat amerlassusiisa killilersuiffiginissaannut piginnaatitaaffeqanngilaq. Umiarsuit takornariartaatit tunngaviatigut umiarsualivinnut tamanut tikissinnaapput, umiarsualivinni oqartussanut isumaqatigiissuteqaannarsimagunik, Visit Greenlandip pisortaa oqarpoq.
Aviisimi AG-mi atuarnerusinnaavutit. Aviisi uani pissarsiariuk:
