Umiatsianik ukiumut piareersaaneq

Ukiulerpoq, umiatsiallu qaqissimanngikkukku maanna piffissanngorpoq. Sannavimmi FIX IT-imi umiatsianik asaaneq ukiumullu qulakkeerinninneq ulapputigileruttorpaat.

- Ulapittorujussuugatta suliassanut itigartitsisaleqqavunga, Lars Lauridsen, ukiut marluk matuma siornagut biilileriffiutitaartoq Lars Lauridsen oqarpoq.

Suliassanik ulikkaartut 

Lars Lauridsenip lastbiilini allanngortitersimavaa. Sarfaliuuserlugu, silaannalersuuserlugu, kiassaaserlugu, qullilerlugu, nerrivimmik sannavilerlugu sakkunillu assigiinngitsorpassuarnik atortulerlugu. Taamaalilluni ornigulluni nalinginnaanerpaanik iluarsaassisinnaanngorluni. Lastbiilimi saniatigut sannaveqarpoq umiatsianik motoorinillu sivisunerusumik iluarsaatassanik suliaqarsinnaalluni.

– Nuummi umiatsiat amerliartupiloorsimapput, taamaattumik ingerlalluaqaagut, qaammatinilu tulliuttuni tallimani arfinilinnilu suliassanik ulikkaarama suliakkerneqaqqissinnaanngilanga.

Sullitat namminneq umiatsiamik qaqinnissaat umiatsialivimminnullu inissinnissaa isumagisarpaat Lars Lauridsenillu ornigulluni umiatsiaq upernaakkut atorneqaqqinnissaanut piareersartarlugu. – Motoori salittarpara, perusuersartarfik qerinaveersaasertarlugit, imiisivik kissartumillu imiisivik imaarlugit batteriilu peerlugit. Umiatsiat sakkortuumik supoortumik imermik seqqartartarpakka aamma imermik kissartumik. Taamaalillunga imiinnarmik saliummillu piiarneqarsinnaanngitsut, soorlu immap naasui allallu piiartarlugit. Umiatsiat ulii iluarsaanneqartartut

Umiatsiat ulii tupillu iluarsaannissaat

 FIX IT-p aamma neqeroorutigisalerpaa. Piumaneqarluarmat Lars Lauridsen sulisumik ataatsimik singissartulerisussamik, igalaanik iluarsaassinermik, ulinik tupernillu taamaallaat suliaqartussamik atorfinitsitsivoq.

– Sunulluunniit uliusinnaasut sanaartorlugillu iluarsaattarpagut, umiatsianulli atugassat amerlanerupput. Ulit nutaat tamarmik umiatsiaq malillugu ilusilersorneqartarput, sullitallu immikkut kissaatai malillugit uliliortoqartarluni. Immikkut ittunik igalaanut ninngusuunik assiaqutsiisarpugut, tassa igalaanut assiaqutit siulliullutik aserortartut misilittagarigatsigu. Igalaamut assiaqutip aseroqqanerani anorersualisappat umiatsiap uliata sinnera ajorsisinnaaviq iluarsaanneqarsinnaajunnaarluni nutaamillu sanasoqartariaqalerluni, Lars Lauridsen oqarpoq, umiatsianullu ulit nutaat tamarmik Kalaallit Nunaanni pissutsinut naleqquttunngorlugit manngertornersinnaanngitsunik naatiffiliorneqartartut ilanngullugu oqaatigalugu.

Umiatsiat motooriinik iluarsaassinerit taarsersuinerillu qaammatini tulliuttuni suliarineqassapput.