Umiatsiat atornikut piumaneqaqisut

Umiatsianik, motoorinik qamuteralannillu atornikunik tuniniaasut pisilersaartullu nunatsinni ukiukkut aasakkullu imaaginnalertarput, aamma Facebookimi gruppini alakkarneqarnerpaasartut ilaat 20.500-t missaannik ilaasortaliusoq aqqutigalugu. Ilaquttalli ilagalugit aasaanerani silagissioriaatissaqqissumik atornikumik umiatsiarsinialersaarnermi aquuteralassinialersaarnermiluunniit arlalinnik sillimaffigeqqissaagassaqartoq, eqqartuussissuserisoqarfik tamakkununnga tunngasunik aamma suliaqartartuusoq Nuna Law ilisimatitsisivoq.

Allakkatigut isumaqatigiissuteqarnissaq pingaaruteqartoq

Nunatsinni umiatsimik motoorimilluunnniit atornikumik pisinermi Nuummi Nuna Law-imi eqqartuussissuserisup Gutti Harrysonip oqarnera naapertorlugu arlaatigut nalorninartoqartuaannarpoq. Taamaammat atornikumik pisineq pillugu allakkatigut isumaqatigiissuteqarnissaq pingaaruteqarpoq – pisiarisimasarmi eqqartuussivilersuutigisariaqalissagaluarpat piginissaa pisariaqartussaammat.

– Inuit marluk niueqatigiinnerisigut umiatsiamik pisisoqartarpoq, pisinermullu inatsit kisimi pisinermut isumaqatigiissummi najoqqutarineqartarpoq. Najoqqutarineqanngikkaangalli qanoq isumaqatigiissanerluni nammineq aalajangerneqartussaavoq, taanna oqarpoq.

Nunatsinni umiatsiamik atornikumik pisinermut isumaqatigiissutit assigeeqqissaarneq ajorput, isumaqatigiissutillu taamaattut inuit marluk niueqatigiinnermikkut namminneq pilersitarisarmatikkik arlaannaalluunniit isumaqatigiissumik unioqqutitsisimanersoq nalileruminaassinnaasartoq, Gutti Harryson nassuiaavoq.

– Niueqatigiit iluanni isumaqatigiinngittoqaraangat, tamanna allakkatiguunngitsoq assersuutigaluguli messengerikkuinnaq sms-ikkuinnarluunniit allaqatigiinnikkut isumaqatigiissuteqarsimanerannik pissuteqakkajuppoq. Assersuutigalugu tuniniaasup tuniniakki allamik motoorilerneqarsimanerarsimasinnaasarpaa, pisisorlu taamaalilluni isumaqartarpoq pisiani nutaarluinnarmik motoorilerneqarsimasuusoq. Suliani taamaattuni ajornartorsiutit marluusarput: Siullermik – pisiap motooria nutaajunersoq nutaanngitsuunersorluunniit – aappassaanillu – tuniniaasup paasissutissiissutigisimasai uppernarsarneqarsinnaanersut.

– Tamanna inatsisitigut isumaqatigiissutigineqartariaqanngilaq, tuniniaasulli paasissutissiissutigisimasai pisinermut isumaqatigiissummi aamma allannissaat pingaaruteqarluinnarpoq, taanna oqarpoq.

Assersuutigalugu Facebookimi tuniniakkamik motoorisiniat umiatsiarsinialluunniit paasissutissat pisariaqartitatik allaqatigiinnikkut pissarsiarikkajuppaat. Tamanna iluaqutaasinnaasoq, Gutti Harryson oqarpoq. Tuniniaasormi eqqunngitsunik paasissutissiisimagaangat, tamanna suliassanngortitsinerup ilalernarsinnaaneranik kinguneqarsinnaasarpoq – ilumulli eqqunngitsunik paasissutissiisisoqarsimasoq uppernarsineqaqqaartariaqassalluni.

Pisiariniakkap misilittaqqaarnissaa pingaaruteqartoq

Umiatsiaq pisiariniagaq misilittaqqaarsinnaajumallugu motoorialu ajunnginnersoq paasiniarlugu singinneqareersimasuunissaa aamma pingaaruteqarpoq.

– Ajoquteqanngissorisamik motoorilimmik umiatsiarsereernermi motooriiartoqartarnera aamma tusarsaavoq. Taamaammat umiatsiarsitigani pisiariniakkap motoorilerinermik ilisimasalimmit misissorteqqaarnissaa pingaaruteqartorujussuuvoq. Taamaaliunngikkaanni pisiarisimasap pisiaritinnagu ajoquteqareersimasuunera uppernarsarneqartariaqartussaammat, Gutti Harryson oqarpoq.

Ungasissumit tuniniakkamik pisineq

Assersuutigalugu najukkameersuunngitsumik umiatsiarsiniaraanni tassunga akiliutissat eqqartuussissuserisup oqarnera naapertorlugu pisiariniakkap ajoquteqannginneragaanerata uppernarsinnaanissaata tigunissaatalu tungaanut aningaaserivimmiittuutigigallarneqarsinnaapput.

– Ikittuinnaalli taamaaliortarput. Pisisimasummi pisiartik motoorialuunniit ajoquteqartoq paasigaangamikku, eqqartuussivimmut suliassanngortitsisinnaasarput, tamannalu akisuvoq – suliassanngortitsinernilu taamaattuni aalajangiisoqarnissaanut utaqqineq ukiut marluk tungaannut sivisussuseqarsinnaasarpoq. Angalaarsinnaanngornissamullu taama sivisutigisumik utaqqinissamut naammagittarsinnaasut ikittuararsuupput.

– Taamaammat ungasissumit tuniniakkamik pisinermi aamma nalorninartoqangaatsiartarpoq, suliassanngortitsinerillu taammaattut tusarnartarinngilagut. Taamaattunik ukiut tamaasa suliassanngortitsisoqartarpoq, sulianili taamaattuni illuatungeriit namminneq aaqqiissuteqakkajummata suliassanngortitsinerit taamaattut qassiukannernersut oqaatigiuminaappoq.

– Ajoqutilimmik umiatsiarsisimasut ilarpassui isumaqartarput, pisiffigisartik politiinut unnerluutigisinnaallugu. Kisianni tassa taamaaliorsinnaanngillat, pisummi taamaattut illuatungeriit isumaqatigiinnginnerannik allaaviliusarmata. Tuniniaasuusaartoqarsorinnikkaannili taakkua politiinut suliassanngortillugit unnerluutigineqarsinnaapput, Gutti Harryson erseqqissaavoq.

Nuna Law umiatsiarsiamik ajoqutilimmik utertitsinissamut tunngasumik suliaqaqqammerpoq, suliami tassani sullitaata umiatsiarsiaa ajoquteqangaatsiarsimammat pisiffigisaalu eqqunngitsunik paasissutissiisimammat umiatsiarsiaminik utertitsinissaminut akuerineqarluni ajugaavoq.

Soqutigineqarluartoq

Carsten Raage Facebookimi gruppimi 20.500-t missaannik ilaasortalimmi umiatsianik, biilinnik qamuteralannillu atornikunik tuniniaaviusumi aqutsisooqataavoq. Kalaallit Nunaanni umiatsianik motoorinillu atornikunik ukiup imaalernerani pisinissamik soqutiginninneq annertunerpaaffianiittarpoq.

- Gruppi soqutigineqarluarpoq, ullullu tamaasa allaffigineqartuarluni. Umiatsiat, motoorit biililluunniit kisimik piumaneqanngillat, aammali atortussat assigiinngitsut kingoraartissanillu ujarlertut atortarpaat.

- Ilaannikkulli atuisut ilaat gruppi aqqutigalugu pisiatik pillugit maalaaruteqartut arlaatigulluunniit naammagittaalliuuteqartut nalaattarpagut, tamannali uagut akisussaaffitsinnut ilaanngilaq.

- Ataatsimulli isigalugu atuisut akornanni naammagisimaarinnittoqarnera naqissutigerusuppara, oqarpoq.

Peqquserluttut pillugit gruppimi aqutsisut atuisunit saaffigineqartartut Carsten Raage aamma oqaluttuarpoq - inuit tuniniaasuusaartut mianersoqqussutigalugit. Tuniniakkat taamaattut nalaanneqaraangata ingerlaannaq peerneqartarput.