Nuuk
Unammilleqatigiinnermut inatsit ataatsimiissutigineqassaaq
Hotel Hans Egedemi Nuummiittumi ataatsimeersuartoqassaaq
Pissusilersuutit suulluunniit unammilleqatigiinnermik equtitsisut Sulisitsisut akerlerilluinnarpaat.
Suliniaqatigiiffik, assersuutigalugu isertorluni isumaqatigiissuteqartarnerit suliffeqarfiillu suliarinnittussarsiuussinerni unioqqutitsisarneri pinngitsoortinniarlugit, pimoorussilluni sulivoq, tassami taamaaliortoqartarnera Nunatsinni inuussutissarsiornikkut ineriartortitsinissamik nammineq suliffiutillit kissaataasa akerlerluinnaraat.
Sulinermut tamatumunnga atatillugu unammilleqatigiinneq pillugu inatsit pillugu ullumi pingasunngornermi Sulisitsisut ulloq tamaat ataatsimiititsissapput. Taamaatut aaqqissuussisoqassaaq unioqqutitsisoqannginnissa anguniarlugu inatsisit atuuttut inuussutissarsiummik ingerlatalinnut paasisitsiniutiginiarlugu.
Ataatsimiinnermi sammisassat ilagaat kalaallit unammilleqatigiineq pillugu inatsisissaat pillugu aqutsisoqarfimmi pisortap Nicolai Odgaardip saqqummiinissaa. Sammisassat allat tassaassapput unammilleqatigiinneq pillugu inatsisit, assersuusiortarlunilu ajutoorfiusinnaanerpaat saqqummiunneqassallutik.
- Minnerunngitsumik paasissutissanik unammilleqatigiinnermut tunngasunik imminut paasissutisseeqatigiittarneq qaqugukkut inerteqqutaanersoq pingaartillugu sammineqassaaq. Suliarinnittussarsiuussinermi qaqugukkut unioqqutitsisoqartarpa? Tamanna pillugu suliassaqarfiit assigiinngitsut peqatigiiffiisa malittarisassaat qanoq ippat?, Sulisitsisut Kattuffiat tusagassiutinut nalunaaruteqarpoq.
Ataatsimiinnermi saqqummiinerit isiginnaagassanngorlugit immiunneqassaput, taamaaliornikkut oqariartuutit nuna tamakkerlugu siaruaassinnaaniarlugit, aammalu Sulisitsisut pisortaat allattoqarfimmilu pisortaq najukkami peqatigiiffinnut piffissami aggersumi tikeraalerpata oqallisigineqarsinnaaniassammata.