Uninnganermi akiliutit: KAIR nassuiaamminik allannguivoq
Mittarfinnik ingerlatseqatigiiffik Kalaallit Airports (KAIR) erseqqissaavoq, akiliutaasussaq akitsuutaasussaanngitsoq akiliutaasussaasorli, 1. majimiit taxanut akiliutigitinneqartartussaq, taakku immikkut aqqusiniliuunneqassammata mittarfiup utaqqisarfiata saavaniittussamik.
Kalaallit Airports ajuusaarluni nalunaarpoq, ingerlatseqatigiiffiup Namminersorlutik Oqartussat pigisaata taassuma aningaasat 1. majimiit taxanut mittarfissuassaq aqqutigalugu tikittussanik aallartussanillu angallassisartunut akiliutigitinneqaralersussat pillugit erseqqissumik attaveqaqatigiinnissamik isumaginnissimannginnini pillugu.
- Siusinnerusukkut – aammalu suliffiup iluani paatsooqatigiinneq pissutaalluni – akitsuusiinissaq tassani pineqartoq nalunaarutigisimavarput. Kisianni tassa tamanna eqqunngilaq. Matumani pineqartoq mittarfimmi atortorissaarutinik atuinermut akiliut. Ilanngullugu oqaatigisinnaavara akiliummik atuutsitsilernissamut akiliisitsisalernissamullu akuersissutinik pisariaqartunik KAIR-imi piniareeratta. Peqatigisaanik piffissaq iluatsillugu paatsuuganeq, paatsooqatigiinnerup malitsigisimasaa, ajuusaarutigaara, Kalaallit Airportsip paasissutissiisarnermut pisortaa, Mikkel Bjarnø Lund tusagassiuutitigut nalunaarummini oqarpoq.
Nassuiaat
Nuummi mittarfiup utaqqisarfiata saavani uninnganerit tamaasa taxanut 10 koruuninik akiliuteqartitsisalernissamik pilersaarut pillugu aatsaat maannakkut KAIR nassuiaateqarpoq, Nuuk Taxa akiliuteqartitsisalernissap nassatarisaanik allaffissornikkut suliassanik annertuunik pilersitsisoqarnissaa pissutigalugu marloriaatinngortittariaqarsimasaa pillugu nalunaaruteqareersorlu.
- Ukiuni aggersuni Nuummut aamma Nuummiit timmisartumik angallanneq annertuumik annertusiartussasoq naatsorsuutigaarput. Taamaattumik mittarfimmi siunissamut isumannaarinissaq aammalu taxat aqqutissaannik pilersitsinikkut taxaatileqatigiiffinnut sullissinerup annertusitinnissaa, aalajangiuppagut. Biilit amerliartuinnarneranni inissaqartitsinissaq aammalu ilaasut amerliartuinnartut sullinneqarnissaat qulakkeerniaannarneqarlutik, attaveqaqatigiinnermut pisortaq nassuiaavoq.
Taannalu nangippoq:
- Sanaartorneq aserfallatsaaliuinerlu aningaasalersorniarlugu taxat aqqutissaannik atuinermut akiliummik atuutsitsilernissaq aalajangiupparput. Soorlu nunarsuaq tamakkerlugu mittarfippassuarni allani aamma taamaalluinnartoq.
Inuit namminneq biiliminnik uninngatitsisinnaanerat suli nipaarluutigineqarpoq
Inuit namminneq biiliminnik aallariartortartut angalanerminnilu biiliminnik mittarfiup biilinut uninngasarfiani uninngatitsisartut akiliisinneqartassanersut pillugu apeqqut suli akineqanngilaq taamaalillunilu suli ilisimaneqanngilaq akiliisinneqartalissanersut.
- Biilinik uninngatitsisarneq pillugu kingusinnerusukkut nalunaaruteqarumaarpugut - taamatuttaaq mittarfittaassap ammarneqarnissaanut atatillugu pissutsit allarpassuit qanoq ittuussanersut pillugu - siunissami qaninnermi nalunaaruteqarumaarpugut, maannamuugallartoq attaveqaqatigiinnermut pisortap oqaatigiumasai taakkuupput, taannali neriorsuivoq siunissami qaninnermi paasissutissiineq tamanut saqqummiunneqarumaartoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...