United aqqutigalugu timmisartoq siulleq Nuummut arfininngorpat tikissaaq
USA-mit nunatsinnut toqqaannartumik timmisartuussineq siulleq arfininngornermi 14. juni pissaaq. Tassami United Airlinesip timmisartua Nuummut arfininngorpat tikissagami.
Sapaatip akunnerata naanerani USA-p Nuullu akornanni silaannakkut aqqut nutaaq ammarneqassaaq. United Airlinesip timmisartua siulleq Nuummut arfininngorpat tikittussanngorpoq.
Assi: Greenland Airports
Silarsuamut aqqutissat nutaat.
Amerikamiut New Yorkimi timmisartortitseqatigiiffiata Newark Liberty International Airportimiit Nuummut toqqaannartumik timmisartuussisarnini arfininngornermi juunip 14-ianni siullermeerluni aallartissavaa.
Angallannermut aqqut takornariaqarnermut, niuernermut allatigullu suleqatigiinnermut periarfissanik nutaanik ammaassissaaq – aammali Kalaallit Nunaata nunarsuarmi pingaaruteqarneruleriartorneranik takutitsisuulluni, Greenland Airports tusagassiuutinut nalunaarummi allappoq.
- Mittarfittaap ammarnerani anguniagaqarnigut qaffasissorujussuarmiitippagut, aammalu timmisartuutileqatigiiffimmit United-itut ittumit soqutiginninnerup takutippaa Nuuk maannakkut piviusumik nunarsuarmi nunap assinganiilersimasoq. Taanna timmisartuinnaanngilaq – taanna Kalaallit Nunaanni kapitalip nutaap aallartinneriinnarpaa aammalu nunani tamalaani niuersinnaanitsinnik, angalasinnaanitsinnik suleqataasinnaanitsinnillu nukittorsaanerulluni, Greenland Airportsimi pisortaaneq Jens Lauridsen oqarpoq.
Aallaqqaammut aasaanerani sapaatip akunneranut marloriarluni timmisartuussisoqartassaaq, taamaalillunilu ilaasut silarsuarmi timmisartuussisarfinnut annerpaanut tikeriaannanngussapput. Newark Airport USA-mi nunanilu allani tikitassanut hundredelikkuutaanut qitiusumik aqqusaarfiusarpoq, taamaalillunilu Kalaallit Nunaat maanna nunarsuarmi attaveqaatinut toqqaannartumik atassuserneqarnerulissaaq.
- Mittarfittut timmisartuutileqatigiiffiit periarfissatsinnik takunninnissaat aammalu attaveqartarfimminnut ilanngutsikkusussagaatigut, pinngitsoorsinnaanngilagut. United USA-mi nunarsuullu sinnerani angallavimminni asseqanngitsuni Kalaallit Nunaannut aamma Kalaallit Nunaannit angalanerit ataqatigiissinnissaannut periarfissanik killeqanngipajaartunut neqerooruteqarpoq, Jens Lauridsen oqarpoq.
Silaannakkut nutaaq atoqqaarfissiorneqarpat Sermitsiaq tikittunut siullernut malinnaassaaq.
