Unnukkut aliikkutaq inuussutissarsiutinngortoq

Nuuna Chemnitzip 2021-mi decembarimi illuaqqami aappalaartumi Nuup illoqarfiata qeqqaniittumi Ulaajuk Potterymik niuertarfik sannaviutigisoq ammarpaa, tassanilu marriani soorlu kaffisorfiik, puuguttat, ussiit, niaquusat qullilerfiit assigisaallu tamarmik Ulaajuk Potteryp ilisarnaatigisaanik ilusilikkat tuniniartarpai.

Nuuna Chemnitzip Air Greenlandimi Revenue & Inventory Managementitut suliffini qimallugu namminersortutut aallartinnini killissaminik qaangiiffigilaartutut misigaa.

- Suliffigissaaraluarama nuannaralugulu namminersortutut aallartinneq killissanik qaangiiffiuvoq. Nuanneqaarli. Ulapippunga neriuppungalu piffissaqarnerulissallunga isumassarsiorluarsinnaanerulerlunga naammattunillu sanaartorsinnaallunga, Nuuna Chemnitz oqarpoq.

Sannaveqarneq akeqanngitsuunngilaq, aningaasartuuteqarpoq aalajangersimasunik, akileraarutit soraarnerussutisiassallu aamma akilerneqartussaapput. Taannalu killissanik qaangiinermiippoq.

- Namminersortuulluni suliassarpassuaqartarpoq, suullu tamaasa kisermaallutik killissanik qaangiinarsinnaasarluni. Marriat tamarmik nammineq sanaajupput tuniniaanissamut piareertinnagit arlaleriarluni suliarineqartarlutik. Marraq qalipaatillu misilittarneqassapput, tuniniakkat nittarsaannissaat eqqarsaatigineqassaaq, eqqiaasoqassaaq, sakkut atortullu aserfallatsaalineqassapput, pisiniartoqassaaq, naatsorsuisoqassaaq aamma nutaaliornissaq piffissaqarfigineqassalluni.

Marriornermut nuannarisaqartuunera suliaasalu piumaneqarluarnerat namminersortutut aallartinnissaanut kajumilersitsipput.

- - Air Greenlandimi sulinera aliikkutaralugulu marriortarnera nuannareqaakka. Aamma Illorpumi unnukkut marriortitsisaleraluarpunga, tuniniakkakkali piumaneqartorujussuanngorput tunisassiornissannullu piffissara annikimmat ingerlaannaq nungunneqartarlutik. Piffissap ingerlaneqani toqqaasariaqalersimavunga eqqarsaatigereerlugulu naggataatigut aalajangerpunga Ulaajuk Potterymi marriortarnera tamakkiisumik ingerlatiinnarniarlugu. Aamma sannaveqalernissannik tuniniaaviutigisumik peqalernissannik periarfissaqalerama, Nuuna Chemnitz oqarpoq.

- Ullumikkut ullut tamaasa sannavimmini sulisarpoq, tallimanngornernilu arfininngornernilu ammasarluni. Tassanilu sapaatip-akunnerata ingerlanerani suliani tuniniartarpai.

Marraq nuannarigaa

2017-imi oktobarimi unnukkut atuarfimmi aallartippoq, tassani peqataasussaagaluit ilaat pisinnaajunnaarmat inissaqalerluni.

- Sapaatip-akunneranut ataasiarlunga peqataasarpunga. Marlunngornerit tamaasa angerlarama eqqarsartarpunga marlunngornerup tullia ungasittoq. Sapaatip akunneranut ulloq ataasiinnaq marriorfigalugu naammanngilaq.

- Taava marriornermut pikkorissartitsineq alla sapaatip-akunneranut marloriarluni ingerlanneqartoq nassaaraara. Qaammatit pingasut qaangiummata atuisutsialanngorpunga. Taamaattunngoraanni sannavik allanit atorneqartinnagu atorneqarsinnaalertarpoq. Sulernerma avataani piffissaq tamapajaat unnukkut weekendinilu sannavimmiittalerpunga, Nuuna Chemnitz oqarpoq.

Aallaqqaammulli marriorneq nuannarigaa

- Aallaqqaataaniilli nuannarisorujussuuara, sulilu maanna uummateqarfigalugu. Marriorneq nukissaqassutigilertangaarallu unnuakkut nalunaaquttap-akunneri sisamat taamaallaat sinittarpunga. Marriornermi periuseq tamaat, kukkunerit iluatsitsinerillu tamaasa, ineriartorneq ilikkagaqartuarnerlu suli alutorisarpakka, Nuuna Chemnitz oqarpoq.

Marrarmik Kalaallit Nunaanneersumik Nuuna Chemnitzip nammineq Nuup eqqaani kangerlummiit aanikuusaanik aamma sannavimmiittoqarpoq. Marrarmik suliaqarneq sivisusarpoq. Marraq minguiarlugu, arlaleriarlugu sioraajarlugulu ujaraajarlugu taavalu panertillugu. Taava tullinnguuttarpoq marraap panertup silami aserorternissaa, taava imermut akuliuteriarlugu naqittariarlugu kaavisillugu.

- Marraq kingorna uninngatinneqassaaq, immaqa ukiumi ataatsimi sivisunerusumilluunniit. Ukiup affaa qaangiuppat misilinneqarsinnaasumik pe qalissaanga. Misileeraassaanga tassa qanoq iliornissamik aalajangersimasumik malitassaqanngimmat, Nuuna Chemnitz oqarpoq, taannalu aamma ilusilersuinermut piffissaqarnerorusukkaluarpoq.

Ulaajuk ilusilersorluagaq sanalluagarlu

Nuuna Chemnitz ilaquttanilu illu iluarsaalluagassaq 2019-imi pisiaraat. 2020-mi covid-19-ip nunarsuaq tamakkerlugu tuniluunnera pileruttormat suut tamarmik, aamma unnukkut atuartitsisarnerit Illorpumilu marriortarnerit, matuneqarmata nammineq marrionermut atortumik kaavititsivittaarpoq

- Ajorsuaarpoq, marriorsinnaajunnaarluni kaavititsisinnaajunnaarlunilu. Illorpumi ilinniartitsisuugaluaraanniluunniit sannavik atoqqusaajunnaarpoq, Nuuna Chemnitz oqarpoq, sanilinilu attaveqarfigaa paasiniarlugu kaavititsivimik tuniniagaqarnersoq.

Peqarpoq.

- Pisiaraara. Illumi iluarsaanneqartumi sannavittut isikkulimmi atorluarsinnaakutsoorpara. Qaammatialunnilu kaavititsiviga inimiippoq marrioqqissinnaanngorlungalu. Kissaasinnaanngilangali. Ullut ilaanni iterniariarlunga oqarpunga kissarsuummik pisiniarlunga. Taamaaliortariaqarpunga suliakkami kissassinnaannginnakkit. Taamaasillunga kissarsuuteerannguamik siullerpaamik pisivunga, taannalu igaffiup affarlianiippoq, Nuuna Chemnitz oqarpoq.

Illumi marrarmik puussiat, sakkut qalipaatillu assigiinngitsut takussaapput. Piffissallu ingerlanerani quiminiit tuniniaasalerpoq, pisiniat unnukkut weekendinilu alakkaasarlutik.

- Marriortakkama ilaat Facebookimi saqqummiuppakka, marriortakkakkalu pillugit ilisarisimanngisannit ikinngutigiumaneqartalerpunga. Taamaattumik marriortakkakka taaguusertariaqalerpakka namminneq qupperneqalerniassammata. Isumaqarpunga sammineqarpallaalerlunga uangami marriorusuinnarpunga, Nuuna Chemnitz oqarpoq.

Ukiorpassuarni ateq Ulaajuk nuannarisimavaa, kingusissukkulli paasivaa ateq taanna isumaqartoq iluserissoq aamma/imaluunniit sanalluagaq

- Tulluarluinnarpoq marriama Ulaajuk Potterymik taaguusernissai.

Kunngikkunnik pisisartulik

Nuuna Chemnitzip Facebookimi Instagramimilu Ulaajuk Pottery saqqummiuppaa, tassanilu malinnaasorpassuaqalerpoq pisinissamillu soqutiginnittoqarluni. Allaat Dronning Mary aasaanerani angalanermini kunngikkormiut pilersaarutaasa saniatigut marriorfimmut tassunga pisiniarpoq

- Dronningi Maryp aperivaanga inniminniisoqarsinnaanersoq. Nassuiaappara inniminniisoqarniartillugu tamatigut itigartitsisarlunga, tassami tuniniagassaarutissagama. Dronningilli tunuaniittoq eqqumiitsumik kiinnakkut isikkoqalermat naqqipallappunga oqarlungalu: "Aap, taamaaliorsinnaavunga“, Nuuna Chemnitz oqaluttuarpoq.

Dronningi Mary pisiniarfimmi pisivoq, annikitsumillu inniminniilluni taannalu naalagaaffiup sinniisaata kingusinnerusukkut aasussanngorlugu.

Nuuna Chemnitzip aamma inniminniisitsisannginneranut pissutaasoq alla tassaavoq pisisartut inniminnikkaminnik naatsorsuuteqartarmata.

- Suliakka pitsaanersut qalipaatigissaarnersullu aamma sullitama kissaatigisaatut naammassinnginnissaat uannut uippakajaarnarsinnaavoq. Taakku pissutigalugit inniminniititsineq ajorpunga, Nuuna Chemnitz oqarpoq.