Upernaviarsummi misileraalluni naatsiivimmi aasaq aallartippoq, naatitanut qeritsaaliutit peerneqarsimapput, naatsiivilerisullu Kim Neiderip naatsiivilerinerup inerititai kiisami katersorsinnaanngorpai.
Tamanna malunnartinniarlugu arfininngormat kingullermik juulip 20-ani inuit tamarmik orniguffigisinnaasaannik aaqqissuussisoqarpoq. Inuit amerlasuut umiatsiaaqqamik tikipput, ullormilu tamatumani nioqqutissanik pisinissamut periarfissaqarput, Kim Neider oqaluttuarpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Upernaviarsummi misileraalluni naatsiivimmi aasaq aallartippoq, naatitanut qeritsaaliutit peerneqarsimapput, naatsiivilerisullu Kim Neiderip naatsiivilerinerup inerititai kiisami katersorsinnaanngorpai.
Tamanna malunnartinniarlugu arfininngormat kingullermik juulip 20-ani inuit tamarmik orniguffigisinnaasaannik aaqqissuussisoqarpoq. Inuit amerlasuut umiatsiaaqqamik tikipput, ullormilu tamatumani nioqqutissanik pisinissamut periarfissaqarput, Kim Neider oqaluttuarpoq.
– Salatit, naasut mamarsaatissat aamma jordbærit nuannarineqarnerpaallutik nungoqqissaartut tuniniarneqarput. Angerlarsimaffimmili naatitsisarnermik soqutiginnilersitsisoqarnissaa taamaalillunilu imminut pilersornerulernissaq uani pingaaruteqarnerpaavoq. Soqutiginninnerujartuinnarneq malugisinnaavara, Kim Neider oqarpoq.
Imminut pilersornermik aallarnisaaneq
Nunatsinni imminut pilersornissaq Naalakkersuisut aamma ukkatarinerusalerpaat. Kalaallit Nunaanni imminut pilersornissamut periusissiamik siullermik Namminersorlutik Oqartussat suliaqarput, inuussutissanut tunngatillugu imminut pilersornerup annertusinissaa siunertaralugu. Periusissiaq naapertorlugu nunaqavissut inuussutissaataannik assartuineq inuiaqatigiinnullu tuniniaanissaq ajornannginnerulissaaq.
Ukioq manna siusinnerusukkut Kim Neiderip karsit naatitanik imallit siulliit Tasiilamut Narsarsuarmullu orpiit nassiuppai. Imminut pilersornerunissaq anguniarlugu blomkålinik, forårsløginik broccolinillu assigiinngitsunik naatitassanik akeqanngitsumik Upernaviarsummi misileraalluni naatsiivik neqerooruteqarpoq.
– Pingaarnertut Kujataani imminut pilersornerup aallartinnissaa siunertaavoq, tamattami tamanna kissaatigigunarparput. Soqutiginnittoqartorujussuuvoq, tamannalu pingaartumik siorna malugisinnaavarput, tuniniaanerit tikeraarneqarnerillu ajunngitsumik ingerlammata. Imminut pilersornerup aallartinnissaa suliassaraara, mannalu pitsaasumik periaasiuvoq, Kim Neider oqarpoq.
Ukioq manna issittoq
Kim Neiderip apriilip aallaqqaataani 2022-mi Upernaviarsummi misileraalluni naatsiiviliaq tiguaa, taamanimiilli ingerlalluarpoq.
Broccolit, hvidkålit qerisissinnaasut, rabarberit, rødbedet, jordbærit salatillu assigiinngitsut arlallit Kim Neiderip katersuiffimmi siullermi naatitat katersugaasa ilaannaraat.
Taamanimiilli soqutigineqartorujussuupput, oqaluttuarpoq.
– Maanili isserujussuarsimammat ukioq manna naatitat kingusinaaqqalaarput. Upernaviarsummi misileraalluni naatsiiviliornissamut tapersersuineq Kim Neiderip nuannaarutigaa, aammali assartuinermut tunngatillugu ajornartorsiuteqartoq erseqqissarpaa, tamannalu politikkikkut iliuuseqarfigineqarsinnaanerarpaa.
– Nunatsinni assartuinermi akit qaffasippallaarput. Misissuinikka naapertorlugit naatitanik palletinik Islandimiit Kalaallit Nunaannut nassiussinermut akigititat Kujataaniit Nuummut nassiussinermut akigititat assigingajappaat.