Upernavimmi qaleralilerngusaanneq
Jens Immanuelsenip Upernavik Seafood isornartorsiorpaa – Upernavik Seafoodip aalisartut ikiunngilai, Jens Immanuelsen oqarpoq.
Halibut Greenlandip siulersuisuini ilaasortap maanna Upernavik Seafood sakkortuumik isornartorsiorpaa. Tamanna pivoq mailikkut, Jens Immanuelsenip nettikkut ingerlateqqitaani.
Jens Immanuelsen ilaatigut allappoq sumiiffimmi tassani Upernavik Seafoodip sumiiffimmi tassani aalisariutinut pitsanngorsaanera aalisartunut malunnaateqanngitsoq.
Illuatungaatigulli Jens Immanuelsen isumaqarpoq Upernavik Seafoodip sumiiffimmi tassani kisermaassisuunini atorluaraa tamaanilu unammillerteqannginnini aningaasarpassuarnik pinnassutigisaraa. Aalisartut pitsaanngitsumik akilerneqartarput, erseqqissaavoq. Taamaattumik unammillerteqarneq pitsaasuuvoq.
Aamma isornartorsiorpaa Nuussuarmi tunitsiveqannginnera taamaallaalli marlunnik containerinik qerititsivittalinnik peqarmat.
Upernavik Seafoodimi pisortaq Flemming Andersen tassunga tunngatillugu oqarpoq Jens Immanuelsenip paasissutissiinera eqqunngitsuusoq. Erseqqissarpaa Upernavik Seafood ukioq naallugu tunitsiviusarmat inunnullu 200-nut nunami suliffissaqartitsimmat.
– Aalisartut aalisariutaasa nutarternissaannik ikiorpagut. Anginerusunik aalisariuteqalernissaat, motooreqalernissaat, snescooteritaarnissaat aamma aalisarnermi atortunik pisinissaannut aningaasaleeqataasarpugut.
Ilitsersuisarnitsigut aningaasaliisarnitsigullu ikiuuttarpugut, erseqqissaavoq ilisimatitsissutigalugulu Upernavik Seafood maanna 12 millionit koruuninik aalisartunut atukkeereersimammat angallatillu allat marluk sisammik sanaat 14 millionit koruunit missaannik akillit takkuttussanngortut.
Flemming Andersenillu Jens Immanuelsen eqqumiigaa, pingasoriarluni borgmesteriusimasoq, inuussutissarsiorneq ataasinnguamilluunniit tapersersorsimanngimmagu, illuatungaatigulli Upernavik Seafoodimik annertuumik akornusersuisimammat suliffeqarfillu matutinniarsarisimammagu.
– Kisianni kiap nunami tunitsiviit ukiukkut ammatiinnarnissaat qulakkiissavaa, Halibut Greenlandip? Flemming Andersen aperivoq ilanngullugulu oqaatigalugu Upernavik Seafoodip qaqugukkulluunniit pisiarineqarsinnaasoq aalisartut tamatuminnga soqutiginnippata.
Upernavik Seafood pillugu allaaserisaq atuaruk Sermitsiaq nr. 28-mi.