Ups: Avaleraasartoortassanik agguaassinermi kukkusoqarsimasoq
Tunumi avaleraasartoortassat ammassassuartassallu aallaqqaammut agguaanneqarsimanerisa allanngortinneqareerneratigut, maanna inissinneqarsimalerput. Tamanna pisimavoq, aalisariutinut akuerisaasimanngitsunut kukkusumik pisassiissuteqartoqarsimanera pissutigalugu.
Avaleraasartuut 54.934 tonsit Tunumi ukioq manna aalisarneqarsinnaasut, agguaanneqarsimariarlutik agguaateqqinneqarsimapput.
Agguaassisimaneq siulleq apriilip qaammataata qiteqqunnerani tamanut nalunaarutigineqarpoq, angallataatillilli arlallit agguaasisimaneq tupiguutigisimavaat. Angallatimmi ilaat ataaseq pisassinneqarsimasoq, aalisakkanik pineqartunik aalisarnissamut akuerisaasimanngilaq. Taanna tassaavoq Arctic Prime Fisheriesip angallataataa Qavak, Kalaallit Nunaanni angallatit allattorsimaffiat malillugu nunami maani nalunaarsorneqarsimananilu aalisarsinnaanermut akuerisaasimanngilaq. Paasissutissat Sermitsiaq.AG-mit pissarsiarineqarsimasut naapertorlugit kukkusoqarsimasoq nassuiaatigineqarsimavoq.
Angallammut ataatsimut pisassiissutit qaffanneqartut
Agguaassinermi siullermi kukkussutaasimasoq tassaavoq, Arctic Prime Fisheries ApS-ip angallataataasa pingasut, taakkununnga ilaalluni Qavak, pisassinneqarsimanerat. Aalisarnermut, Piniarnermut Nunalerinermullu Naalakkersuisoqarfiup 2019-imi aggustusip qaammataani, Qavak Arctic Prime Fisheries ApS-imit aalisariutigineqarsinnaanera siumoortumik akuersissutigisimavaa, siumoortumilli akuersissuteqarneq piumasaqaatitaqarpoq naammassineqarsimanngitsumik. Tamatuma kinguneranik Qavammut siumoortumik akuersissut atorunnaarsinneqarpoq, taamalu ukioq manna pisassinneqarsinnaanani.
Agguaassinermi siullermi angallatit aalisarnissamut akuerisaasimasut tamarmik 5.493 tonsinik avaleraasartoortassinneqarsimapput, 2020-mi aalisarsinnaasaminnik. Kukkunerli iluarsiiffigineqarmat, aalisariutit pisassinneqartussat ataatsimik ikinnerulerput. Taamaammat angallatinut sinneruttunut pisassiissutit 6.104 tonsinut qaffanneqarput.
Avaleraasartuut 54.934 tonsit ingerlatseqatigiiffinnut, Kalaallit Nunaanni aalisariuteqarnissamut akuerisaasimasunut agguaanneqarsimasut 2020-mi aalisarneqarsinnaapput, avaleraasartoortassatut pisassiissutigineqartut tamarmik saniatigut ammassassuit 2.778 tonsit anallatinit pisassinneqarsimasunit aalisarneqarsinnaapput.