Aviâja Lennert igaffimmini kuanniusanit
kaagiliorlunilu, iffiugassani naqittarpaa savallu neqaanik siatassamik
uullilluni. Pulaartut illumut isaallutillu aniapput. Takornarianut 14-inut,
uinilu Klaus Frederiksenip Tasiusami savaateqarfiup eqqaani unnuisarfiutaanni,
unnuisussanut nerisassiorpoq.
Ukiualuit matuma siorna corona pissutigalugu
killilersuisoqarnerata atorunnaarnerata kingorna takornariartitsisartut
ulapputaaqqilerput. Taamaakkaluartoq siunissamut nalorninartorsiorneq
savaatilinnut isumakulutsitsivoq.
Aviâja Lennert igaffimmini kuanniusanit
kaagiliorlunilu, iffiugassani naqittarpaa savallu neqaanik siatassamik
uullilluni. Pulaartut illumut isaallutillu aniapput. Takornarianut 14-inut,
uinilu Klaus Frederiksenip Tasiusami savaateqarfiup eqqaani unnuisarfiutaanni,
unnuisussanut nerisassiorpoq.
MITTARFISSUARMIT QULIMIGUULIMMUT MITTARFIMMUT
Qaqortumi mittarfik 2026-mi ammarneqarpat
Narsarsuarmut Narsarsuarmiillu qulimiguulimmiinnaq angallassisoqartarlissaaq.
Naalakkersuisut maanna Narsarsuarmi mittarfik qulimiguulimmut
mittarfinngortinniarlugu pilersaarutaat ukiuni kingullerni nunaqarfiup
siunissaa pillugu isumaliutersuuteqalersitsisimaqaaq.
Ukiualuit matuma siorna corona pissutigalugu
killilersuisoqarnerata atorunnaarnerata kingorna takornariartitsisartut
ulapputaaqqilerput. Taamaakkaluartoq siunissamut nalorninartorsiorneq
savaatilinnut isumakulutsitsivoq.
- Ukioq manna takornariat amerlapput, aamma coronap
kingorna, siunissamili qanoq pisoqarnissaa eqqarsaatigisariaqarparput, Aviâja
Lennert oqarpoq, innersuussutigalugulu Qaqortumi mittarfik nutaaq pilersaarutit
malillugit 2026-mi ammarneqarpat Narsarsuarmi mittarfik qulimiguulimmut
mittarfinngortinneqassasoq.
- Takornariat Nuuk aqqusaarlugu angalanatik Kujataanut
toqqaannartumik angalarusupput, silallu kinguaattoorutaasarnera
ajornartorsiutaajuaannarpoq. Taamaattumik eqqarsarpunga Narsarsuaq matuppat
taamaatitsiinnarnerpassuarnik kinguneqarsinnaasoq, takornariat immaqa maanga
tikissinnaannginnamik, Aviâja Lennert oqarpoq.
Silap pissusiata allanngoriartornera
isumakulutsitsisoq
Mittarfiup matuneqarnissaanik aalajangerneq
politikerinit eqqarsaatigilluaqqaarneqarsimanngitsoq taanna isumaqarpoq.
- Illoqarfinni najugallit kisiisa eqqarsaatigigaat,
Kalaallit Nunaanni silap pinngortitallu qanoq sunniuteqartigisarnerat
siunissamilu silaannakkut angallannermut qanoq sunniuteqassanersut
eqqarsaatiginagu, Aviâja Lennert oqarpoq.
Aappariit savaatillit Tasiusamut takornariat
ikileriarnissaat kisiisa ernummatiginngilaat. Klaus Frederiksen aamma Aviâja
Lennert katillugit 1400-nik savaateqarput, taakkunannga 600-t arnaviaapput.
Maannakkut savanut nerisassat katersorneqarput, septembarimi oktobarimilu
qaqqanut qorsooqqissunut aaneqarnissaasa tungaanut. Ungasinngitsukkut savaaqqat
toqorarneqassapput, tassanilu Klaus Frederiksen aamma Aviâja Lennert
savaatiminnit ukiumut ataasiarlutik iluanaaruteqartarput.
- Aningaasanik isaatitsivigut tassani qaqqaniipput,
ukiumullu ataasiaannarluta akissarsisarpugut, taamaattumik aasakkut ukiukkullu
silarlukkaangat sunnerneqarujussuartarpugut, Aviâja Lennert oqarpoq.
Nunarsuarmi silap pissusiata allanngoriartornera silap
qanoq innissaanik siulittuiuminaallineranik kinguneqarpoq. Aviâja Lennert Klaus
Frederiksenilu nunaatiminni eqqaanilu panernersuaqarmat ivikkanik katersanik
ammalortunngorlugit poortukkanik ikinnerusunik pissarsisarput.
Inuussutissarsiut nalorninartorsiornarsissaaq
Ukiumi katersuiffimmi ingerlalluanngitsumi ivikkat
ataatsimoortillugit ammalortunngorlugit poortukkanik 200-t missaannaanniittut
aappariit katersortarpaat, ukiunili allani 600-t missaanni katersortarlugit.
- Ukiornissaa nalorninartorsiornartarpoq. Siusissukkut
nittaassinnaavoq apulli ingerlaannaq aassinnaasarluni. Allanngorarnerata silap
nikerarneranik kinguneqartarpoq. Nunaateqarnerput, uummasuutivut
inuussutissarsiuterpullu eqqarsaatigalugit isumaliutersuutigisariaqarpagut.
- Sila inuussutissarsiutitsinnut inuunittalu
ilarujussuanut aalajangiisuuvoq. Aasarissiorluartarallaratta suut tamarmik
allanngujaarnerupput. Ullumikkut sila allanngorartuarpoq siallernerulerneratalu
sunniuteqartarnera aamma malugisinnaavarput, Klaus Frederiksen Tasiusami
kinguaariit pingajuanni savaatilik oqarpoq.
Ukiup nikinnerata siuninngua Naalakkersuisut
aalisartunut, piniartunut savaatilinnullu silap pissusiata allanngoriartornera
pissutigalugu ajunaarnersuaqartillugu ikiorsiissutinik pilersitsipput.
Ukiorpassuarni ujartorneqarpoq ajunaarnersuaqartillugu silalluunniit
allanngoriartornera pissutigalugu aningaasarsiorsinnaajunnaaraanni
aningaasatigut ikiorsiissutinik pissarsisoqarsinnaanersoq.
- Inuussutissarsiuterput qangamut sanilliullugu
nalorninarninngorsimasoq eqqartortarparput. Sila naalagaraarput ukiunili qulini
kingullerni tamanna erseqqinnerulerpoq. Ullormut pisartut eqqarsaatigalugit
inuusariaqarpugut; atugassarititat taamaapput. Pilersaarusiortuaannarsinnaanngilagut
pinngortitarmi silalu aalajangiisuusarmata, Aviâja Lennert oqarpoq.
Isumakuluut annerpaaq
Aappariit nersutaasiviata silataani allagartaq “Urani
Naamik” nivingavoq, taannalu Tasiusami savaateqarfimmut sangutinnani qaqqap
qaaniit takuneqarsinnaavoq. Kuannersuarni, Tasiusamit 40 kilometerit missaanni
ungasitsigisumi, aatsitassarsiornissaq akerleriissutaasoq ukiorpassuarni
oqallisaavoq. Ingerlatseqatigiiffik Energy Transition Minerals, siornatigut
Greenland Mineralsimik ateqartoq, aatsitassanik qaqutigoortunik piiaaniarpoq,
tassani uran saniatigooralugu tunisassiarineqassalluni. Naalakkersuisulli ingerlatseqatigiiffiup
piiaanissamut akuersissummik qinnuteqaataa 2023-mi itigartippaat.
- Isumakuluuterpassuaqarpugut, Kuannersuarnulli
tunngasoq isumakuluutiginerpaasimavarput, Aviâja Lennert oqarpoq.
Kuannersuarni suliniut unitsinneqaraluartoq uranimut
tunngasut aappariit ulluinnarni eqqartortagaat uranimut apeqqut suli
initusinnaasarpoq, ingammik qinersisoqangajalernerani.
- Uranimik piiaanissaq akuerineqarpat savaateqarneq
unissaaq. Taakku ataatsikkut piusinnaanngillat. Pinngortitap pisuussutai
inuussutissarsiutigaavut, takornariallu aalisakkanik nutaanik
mamarisaqartaqaat, savaaqqap neqaanik uillunillu mamarluinnartunik mamarisaqarlutik.
Tamakkulu nungutinneqarumaarput.
- Uranimik piiaasoqalissappat maannakkutut inuunerput
ingerlatiinnarnissaa ajornakusuulissaaq, Aviâja Lennert oqarpoq.
Inooriaaseq
Nunami politikerit Kujataa puigortuartaraat aappariit
isumaqarput.
- Avinngarusimasumi savaateqarneq pillugu ilisimasat
killeqarmata inuppassuit pissutsit paasilluarsinnaanngilaat, taamaattumillu
politikkikkut aalajangiinerit ilaatigut isumaqatigineq ajorpagut.
- Politikerit ilisimasaqarluarlutik aalajangiissagunik
pissutsit qanoq innerat takuniaqqaariarlugu pisartuuppat
pitsaanerussagaluarpoq, Aviâja Lennert oqarpoq.
- Amerlasuut sunnerneqarsinnaanngitsutut misinnarput
eqqarsaatersuutaasarlutillu, Aviâja Lennert aamma Klaus Frederiksen oqarput.
Naak ullut tamaasa eqqarsaatigineq ajoraluarlugit isumakuluutit inuuneranni
initupput.
- Manna inooriaaseraarput, tassa inuunerput tamarmik
nalunngisagullu tamarmik. Savaateqarneq ukioq kaajallallugu ullut tamaasa
suliassaavoq, aappariit Tasiusarmiut naggasiipput.
