Pituffik
USA-p Pituffimmi suliariumannittussarsiuussineq kukkuluttorfigaa
Amerikamiut eqqartuussiviata amerikamiut timmisartortartui arlaleriarlutik suliariumannittussarsiuussinermi sianiilliorsimanerannik, kukkuluttuutinillu aaqqiisimannginnerannik assuarai
Danskit kalaallillu suliffeqarfii Amerikamiut sakkutuuisa Kalaallit Nunaanniinnerannit iluaquserneqartariaqarput. Taamatut Pituffimmi sakkutooqarfeqarnermi ingerlatsinermi toqqammaviusut anersaavat siunertarisatullu oqariartuutit nipeqarput. Amerikamiullu sakkutuuisa timmisartortartut anersaarineqartoq tamanna sapinngisamik naammassiniarsimavaat, arlalitsigulli kukkussuteqarput.
Tamanna amerikami Court of Federal Claimsimi eqqartuussinerup inernerata takutippaa.
Sakkutooqarfimmi ukiuni arfineq marlunni tullerni sullissinissamik isumaqatigiissut pillugu suliariumannittussarsiuussineq aallaqqaataaneerneqartariaqartoq, eqqartuussinerup inerneratigut piumasarineqarpoq. Tamanna amerikamiut suliffeqarfiutaata pappiaraannakkut atuuttup Exelis Servicesip aallaqqaammut akikinnerpaajulluni suliariumannittussarsiuussinermi ajugaareerneratigut pivoq. Suliffeqarfiilli allat pingasut suliassamut neqeroortut, Per Aarsleff, Greenland Contractors Copenhagen Arcticilu, danskit kalaallilluunniit suliffeqarfiisa kisimik suliassamut neqeroorsinnaanerannik suliariumannittussarsiuussinermi toqqammavinnut Exelis Servicep naammassinninnginnera naammagittaalliuutigaat.
Tamannalu amerikamiut eqqartuussiviata isumaqatigaa.
Aatsaat suliarineqaqqissaaq
Nalaatsornerinnaallunilu periataarnerusoq Suliariumannittussarsiuussinerup ingerlanneqarnerani kukkunerpassuit pisimanerat aalajangiinermi ersersinneqarpoq.
Suliap ingerlanerani suliffeqarfiit danskit suliffeqarfiisa qitiusumik nalunaarsorsimaffiannut (CVR) nalunaarsorsimagaangata, taava amerikamiut sakkutuuisa timmisartortartut suliffeqarfik nunani allamiunit pigineqartutut suliffeqarfiunani, danskit kalaallilluunniit suliffeqarfiviattut isigineqarsinnaasoq amerikamiut kukkusumik isummiuppaat.
Naatsumik oqaatigalugu Pituffimmi sullissinissamik isumaqatigiissummik Exelis Servicemut tunniussineq, nalaatsornerinnarmik periataarnerinnakkullu pivoq, taamaammallu nalagaaffeqatigiit inatsisaannut naapertuunnani. Eqqartuussisoq Charles F. Lettow.
CVR-imullu tunngatillugu paatsoorneq, amerikamiut Danmarkimi aallartitaqarfianni sulisup, suliap ingerlanneqarnerata nalaani danskit oqaasiat immikkoortortaq kukkusumik suliffeqarfittut suliffeqarfimmik allamit pigineqartumik nutsermagu pitsaanerulinngilaq.
Exelis Servicesimut, amerikamiut suliffeqarfissuannit Vectrus Servicemik pigineqartumut eqqartuussiviup naliliiineratut ataqatigiinngitsumik eqqunngitsumillu tunngaveqartumik amerikamiut isumaqatigiissusiorsimanerat, eqqartuussivimmit sakkortuumik isornartorsiorneqarpoq.
Akerleriissut unitsinneqartoq
2014-imi juunimi aggustusimilu amerikamiut sakkutuui timmisartortartut, Exelis Servicesip suliariumannittussarsiuussinermi toqqammavigineqartuni danskinit kalaallinilluunniit pigineqavinnissamik piumasaqaatit malinneqannginnerannik erseqqissaavigineqarpoq. Tassungalu tunngatillugu amerikamiut iliuuseqannginnerat eqqartuussivimmit isornartorsiorneqarpoq.
- Suliffeqarfiup amerikamiut suliffeqarfissuannit tamakkiisumik pigineqartuunermik erseqqissumik paasissutissiineratigut, Exelis Servicesip suliariumannittussarsiuussinermut peqataasinnaajunnaartinneratigut, amerikamiut sakkutuuisa timmisartortartut akerleriinneq aallartinngitsorli unitsissimasinnaagaluarpaat”, eqqartuussivoq Charles F. Lettow oqarpoq.