Utoqqaat illui ammariartuaarneqartut

Avannaata Kommunia sisamanngornermi februaarip pingajuani aalajangerpoq, utoqqaat utoqqaat illuini najugallit ammaakkiartuaarneqassasut. Kommunip utoqqarnut illuutaani tamani utoqqaat piffissami aalajangersimasumi pulaartoqarsinnaanngeriarlutik maanna ilaquttaminnik marlunnik pulaartoqarsinnaalerput.

- Ukiup aallartinnerani Avannaata kommuniani innuttaasut amerlasuut Coronamik tunillatsipput. Tamassuma aamma utoqqaat illua kalluarpaa, sulisut atuisullu tunillanneqarlutik. Tamanna pissutigalugu ilaqutaasut pulaaqqusaajunnaarsimapput. Ullumikkut pissutsit allaanngorput, sulisut najugaqartullu Coronareersimalerput. Taamatuttaaq innuttaasut amerlasuut Coronamik tunillatsereerput, taamaattumik maannakkut utoqqarnut pulaarnissaq periarfissatut ammaanneqaqqilluni, sulili piumasaqaateqartumik, kommuni nittartakkamigut ilisimatitsivoq.

Najugaqartoq ataaseq marlunnik ataatsikkut pulaartoqarsinnaavoq, kommunimiilli suli mianersortoqarnissaa kaammattuutigineqarpoq. Qanermut assiaqut atorneqartassaaq aamma assat errorlugilluunniit spritserneqartassapput.

Kommune Qeqertalimmi ipadsit ilaqutaasunut attavittut atorneqartut

Kommuni Qeqertalimmit sapaatip-akunnerata matuma siuliani nalunaarutigineqarpoq, Aasianni utoqqaat illuani tuniluuttoqalersimasoq. Kommunillu taamaammat pulaartoqarsinnaaneq unitsissimagaa.

- Najugaqartut sulisullu akornanni tunillatsittoqarsimasoq paasigatsigu, pulaartoqartarneq unitsissimavarput. Tamatumunngalu peqatigitillugu ipadsinut arlalinnut attaveqaammik ikkussisimalluta, najugaqartut ilaqutaaminnut ullut tamaasa sianerlutik oqaloqatiginnittarniassammata, Aasianni pisortaq Arne Sandgreen Reimer oqarpoq.

Kommuni Qeqertalimmit naatsorsuutigineqarpoq, Aasianni utoqqaat illuanut pulaarsinnaaneq sapaatip-akunnerata naalernerani ammaqqinneqassasoq. Kommunimit erseqqissaassutigineqarpoq, illoqarfinni assigiinngitsuni assigiinngitsunik malittarisassaliortoqartartoq, illoqarfimmi pineqartumi qanoq tuniluuttoqartiginera apeqqutaatillugu. Assersuutigalugu Qeqertarsuarmi utoqqaat ullormut ataasiinnarmik pulaartoqaqqusaapput, pulaartorlu qanermut assiaqummik atuisussaalluni aamma inimi isersimaartarfiusumi taamaallaat isersimasinnaalluni.

- Illoqarfinni assigiinngitsuni piffissami aalajangersimasumi assigiinnik malittarisassaliortoqarsinnaanngilaq. Qanoq tuniluuttoqartigineri assigiinngimmata. Taamaammat ullut tamaasa utoqqaat illuini sulisunik ataatsimeeqateqartarpugut. Soorunami aamma upalungaarsimasoqarpugut, tuniluuttoqarnerulissagaluarpat atorsinnaasatsinnik, Kommuni Qeqertalimmi illoqarfiit pisortai tamaasa sinnerlugit illoqarfinnut pisortaq Arne Sandgreen Reimer oqarpoq.

Kommuni Kujalleq tamanut ammaasoq

Qaqortumi utoqqaat illuat Ajarsivasik sapaatip-akunnerisa pingasut missaanni pulaarfigineqarsinnaasimanngilaq. Kujataani januaarimi februaarillu allartinnerani tuniluuttoqangaatsiarpoq. Utoqqaalli sapaatip-akunneri pingasut qaangiummata pulaartoqaqqissinnaalerput.

- Utoqqaat illuat Ajarsivasik kikkunni tamani pulaarfigineqarsinnaanera ammaqqissimavarput. Erseqqissaatigissavarpulli, puigortunngortunut immikkoortortaqarfik pulaartoqaqqusaanngimmat. Qanorluunniit amerlatigisut pulaarsinnaapput, pulaartulli qanermut assiaquteqassapput mianersuussissallutillu, Qaqortumi utoqqaat illuani pisortaq Naja Kriegel oqarpoq.

Nuummi utoqqaat illuini pulaartut killersorneqarunnaartut Kommuneqarfik Sermersuup aamma paasissutissiissutigaa. Pulaartartullu tunillatsissimanermik ersiuteqarnerlutik maluginiartassagaat kommunip kaammattuugaa.

Qeqqata Kommuniani utoqqaat illuinut pulaarnissamut inerteqquteqartoqarsimanngilaq.

- Utoqqaat qanigisaminnik ilaquttaminnillu takunninnissartik pisariaqartittarpaat. Taamaammat utoqqaat illuanut pulaartoqarnissaanut inerteqquteqarsimanngilagut. Soorunami pulaartut mianersornissaat assatillu errorlugilluunniit spritsertassagaat kaammattuutigisarparput, kommunimi pisortaq Juliane Henningsen oqarpoq.