Verner Hammeken: Atortorissaarutit nutaaliat atulernissaasa tungaannut umiarsuaativut nukittuumik inissisimapput
Royal Arctic Linep malittassiat malippai 2029-llu tungaanut uuliamik imerpalanerusumik atuilissasoq, Royal Arctic Linep pisortaanera Verner Hammeken oqarpoq.
- Orsussaq atugarsi sumi pisiarisarpisiuk?
Aviisi Sermitsiap Royal Arctic Linep pisortaanera Verner Hammeken taama aperaa.
– Orsussaq atugassarput tamakkerlugu Polar Oilimi pisiarineq ajorparput. Kalaallit Nunaata avataani aamma uuliap kinertup (HFO) atukkatta ilaa aamma pisiarisarparput.
- Umiarsuaatissi CO2 aniatitaat appartinniarlugu qanoq iliuuseqarpisi?
– Aallaqqaammut 2022-mi CO2 -p aniatitatta tamarmiusup kisitsisitaanik naatsorsuineq aaqqissuunniarparput. Suliassaq tamanna annertuujuvoq, taamaaliornitsigummi kisitsit taanna kukkunersiuinermut ilaalersussaavoq. Kingorna kisitsit inissinneqareerpat, 2023-mit umiarsuarni nunamilu periarfissat ilisimaneqareersut iluaqutigalugit pitsannguinissamut toqqammavigilissavarput: Suleriaatsinik, teknologimik nutaami, sullissinermik ilusilersuinermi ilaalu ilanngullugit.
– Ungasissumik sammisumik imarsiornermut tunngasuni orsussanik allaanerusunik ingerlatinullu teknologimi pisorpassuaqarpoq. Umiarsuaatittalu umiarsuit kingulliit marluk tunniunneqareernerini agguaqatigiissillugu ukiunik arfinilinnik pisoqaassuseqartussap, teknologi nutaap naammattumik atorneqalernissaata tungaanut nukittuumik inissisimajumaarnera qularutissaanngilaq, taamaammallu umiarsuaatitta pisoqaassusianut tunnatillugu nukittuumik inissisimavugut. Umiarsuaateqarpugut aningaasaqarnikkut avatangiisinullu atuussinnaanermut 2030-kkut aallartinneranni atorneqalerumaartussatut naatsorsuutigisatsinnut naleqquttunik, pisortaaneq nassuiaavoq.
Aviisimi Sermitsiami atuarnerusinnaavutit. Aviisi uani pissarsiariuk: