Visit Greenland aatsaat taama amerlatigisunik tikittoqarnissaanik ilimasuttoq
Killilersuutit atorunnaarneranni 2022 rekordiliiffiusinnaasoq Visit Greenlandip pisortaa eqqoriaavoq.
Takornariartitsinermik inuussutissarsiortut umiarsuit takornariartaatit tikittarnerannut coronamik killilersuutit 2. marts atorunnaarsinneqarnerisigut pissutsinut nalinginnaasunut uteqqikkiartulerput. Aviisi Sermitsiaq allappoq.
Taamaattoqarneralu Visit Greenlandip pisortaata Hjörtur Smárasonip soorunami nuannaarutigaa. Isumalluarpoq, 2022-milu takornariartut amerlasussaat 2019-mi rekordiiliinermitulli amerlatiginissaat eqqoriarpaa.
- Siorna suliffinni aallartikkama 2022-mi 2019-misulli amerlatigisunik takornariartoqarnissaanik anguniagaqarnera nalunaarutigaara. Akiuussuserneqarsimanissamik piumasaqaatip saniatigut killilersuutit kingulliit atorunnaarnerisa, anguniakkatsinnik attassiinnarnerput angusinnaaneranillu neriulluarnitsinnik tamanna kinguneqarpoq, Smárason Sermitsiamut oqarpoq.
- Nunarsuup sinnera qiviarutsigu, 2024-mi 2019-mitulli inissisimaqqilernissaq naatsorsuutigineqarpoq, tamatumali timmisartukkut umiarsuarnillu takornariat tikeraqqilernerani 2022-iinnartoq angusinnaanissaanut ilimasunnissatsinnut pissutissaqarpugut.
Borgen iluaqutaavoq
- Siorna Islandimi Vestnordenip ingerlanneqarnerani Kalaallit Nunaata annertuumik soqutigineqarnera malugaarput, ilaatigullu Borgenip Against the Icellu, Kalaallit Nunaannik nittarsaassineratigut TV-iikkut sammineqarluarpugut, ilaatigut taama Hjörtur Smárason oqarpoq.
Allaaserisaq tamaat uani Sermitsiami pisiarisinnaasanni atuaruk: