Visit Greenlandip takornariaqarneq pillugu nunaqavissut ilisimasaqarnerulersikkusuppai

Nuummi mittarfissap nutaap novembarip 28-ani ammarnissaa kikkut tamarmik qilanaaraat. Mittarfiit nutaat – Nuummiinnaanngitsoq aammali Ilulissani Qaqortumilu mittarfissat nutaat – nunami tamarmi takornariaqarnerup ineriartorneranut pingaaruteqarluinnarput. Visit Greenlandip Kalaallit Nunaat nunani tamalaani takornariarfissatut akuerineqartussatut ukiuni qulikkuutaani sulissutigisimavaa. Suliniut tamanna maanna nuna tamakkerlugu attaveqatigiinnermik oqaloqatigiinnermillu nukittorsarneqartumik taperserneqassaaq.

- Nunarput takornariarfiunerulerpat takornariaqarneruneq tamatta malugisussaavarput. Taamaattumik pingaaruteqarpoq innuttaasutut takornariartitsinerup naleqartitaanik paasinninnissaq ineriartornermullu qanoq tapersersuisinnaanitsinnut isumassarsisinneqarnissarput, Visit Greenlandimi pisortaq Anne Nivíka Grødem oqarpoq.

Takornariaqarneq pillugu oqaloqatigiinneq

Taamaattumik takornarialerinermik ingerlatsivik Facebookimi qupperneq Nunarput Nuan pilerseqqippaa, quppernermi kikkut tamarmik oqaloqatigiissutigisinnaavaat Kalaallit Nunaanni takornariaqarneq qanoq ineriartortinneqarsinnaanersoq – inuiaqatigiinnut, takornarialerinermut inunnullu ataasiakkaanut iluaqutaasumik.

- Naatsumik oqaatigalugu takornariaqarnerulernissaq kisiat pineqarnani aammali ataatsimoorluta takornariaqarnerup pitsaanerulersinnissaa pineqarpoq, Anne Nivíka Grødem nassuiaavoq.

- Nalunngilarput takornariaqarneq pitsaanerpaamik ingerlasartoq innuttaasut peqatigalugit ingerlanneqaraangat. Nunarput Nuan atorlugu ataatsimoorluta takornariaqarneq akisussaassuseqarluta siuarsarsinnaavarput.

- Takornariaqarneq siuariartortillugu, attaveqaatit nutaanngortillugit allanngortoqartillugulu inuiaqatigiit takornariartitsinerup ineriartorneranik paasisaqarsinnaalernissaannut peqataanissaminnullu kajumilernissaannut oqalliffiliornissaq pingaaruteqartutut isigaarput.

- Nunarput Nuan taamaammat takornariaqarneq pillugu ilisimasanik avitseqatigiiffiusinnaasoq inuiaqatigiinni oqallinnermi assigiinngisitaartumik ilanngussaqartitsisinnaasoq, tamatumalu saniatigut ineriartornerup qanoq ingerlaneranik paasisaqarfiusinnaasoq, najukkamilu takornarialerisut pikkorissut ilaannik naapitsiffiusinnaasoq. Takornariartitsinermi aallarnisaasorpassuupput aamma minnernik akunnattunillu suliffeqarfiutillit arlaqarput, taakkulu imminnut isumassarsiorfigisinnaapput, takornariaqarneq Kalaallit Nunaanni piviusunut naleqqussarsimasoq ineriartortillugu suleqatigiissinnaallutik.

Oqaluttuaq nuannersoq

Nunarput Nuan takornarialerisut akornanni nuannarineqarluarpoq.

- Nuannersunik oqaluttuassaqarpugut, taakkulu Nunarput Nuanimi oqaluttuarerusuppagut, Casper Frank Møller Nuummeersoq oqaluttuarpoq. Taassuma ikinngutini pingasut suleqatigalugit angallassisartoq Raw Arctic aasalernerani pilersippaa.

- Qissattorluni aalisarnermik ingerlataqartuuvugut. Ullormut Nuup eqqaani angalaartarluta sapaatillu-akunneri tamaasa Kangerluarsunnguami tammaarsimaarfitsinnut angalaartarpugut.

- Iluatsissappat nioqqutissat immikkuullarissut nassaarineqartariaqarput. Tamannalu iluatsilluarpoq. Pilersitseqatigiittut sisamat saniatigut angallassisartut marluk aamma sulisoraagut, taakkulu Arctic Adventuretut ilinniagaqarsimapput.

- Ukiumi takornariartitsiviusumi tulliuttumi Arctic Adventuremi takornarianik angallassisut amerlanerusut sulisorisinnaalissavagut - aamma nunaqavissut igasut marluk, unnuiartortarfimmi tikeraat aalisakkanik tisaneranni iganerannilu ikiuussinnaasut pisariaqartissavagut.

- Aamma pingaaruteqarpoq takornarialerisutut mikisutut allanik suleqateqarsinnaanissarput immikkuullarissumik nioqquteqarutta. Nammineq Targa 25-mik angallateqarpugut, tamannali naammanngilluinnarpoq. Taamaattumik sullitarpassuaqaraangatta Nuummi umiatsianik attartortitsisartut allat suleqatigisarpagut.

- Suliffeqarfiit suleqatigiinnerat siunissami Kalaallit Nunaanni takornariaqarnerup iluatsilluarnissaanut aalajangiisuuvoq, Casper Frank Møller oqarpoq.

Siunissami takornarialerinermi kissaatit

Aamma Uummannami Avani Homesimik ingerlataqartup Anton Overballep Kalaallit Nunaanni takornariaqarnermut tunngatillugu misilittakkani kissaatinilu oqaluttuarissallugit qilanaaraa.

- Uummannami takornariartitsisartut annersaasuni kisiartaavugut. Akunnittarfinni inissiat nutaarluinnaat arfineq-pingasut illullu arlallit takornarianut attartortittarpagut. Tikeraartugut amerlanertigut Tuluit Nunaannit USA-millu takornariaasarput, angalatitsiviit suleqatigisagut aqqutigalugit Uummannamut taakku angalasarput, Anton Overballe oqaluttuarpoq.

- Kalaallit Nunaanni takornariartitsinermi immikkuullarissutut ukiukkut aamma sikumi illuaqqani unnuisitsisinnaavugut. Ukiup taarnerani sikumi kilometerimik ataatsimik ititigisumi imaqarfiusumi unnuinissaq misigisaavoq immikkuullarissoq – assiliinermillu soqutigisaqartut takornariat nioqqutitsinnik tamassuminnga soqutiginnilluinnarput. Nunarsuarmi sumiiffinni allani taamaattoqarunanngilaq.

- Uummannami takornariaqarnerup ineriartortinnissaanut iluaqutaasinnaasut tamaasa tapersersorpakka, taamaattumik qilanaaraara Nunarput Nuan Uummannamiinnaanngitsoq aammali Kalaallit Nunaanni takornariaqarnerup ineriartortinnissaanut peqataaqqilertussanngormat, Anton Overballe oqarpoq.

Facebookimi qupperneq malinnaaffigiuk: https://www.facebook.com/VGNunarputNuan