Arnannguaq Gerstrøm nersorneqartoq

Erinniortoq nipilersortartorlu Arnannguaq Gerstrøm nersornaammik Pelle-prisenimik, erinniortumut nipilersortartumullu ukiut tamaasa tunniunneqartartumik, nersornaatiseqqammerpoq.

Nersornaat, erinniortumut Pelle Gudmundsen-Holmgreenimut atsiunneqarsimasoq, 15.000 koruuninik aningaasartaqarpoq. KLANG festival Edition Wilhelm Hansen suleqatigalugu kiisalu siornatigut nersornaatisisimasut Gudmundsen-Holmgreenillu qanimut suleqatigisimasai naliliisoralugit nersornaasiisuusarpoq.

Nersornaatit marluk tunniunneqartarput – erinniortumut nipilersortartumullu nersornaat. Ukioq manna nipilersortartumut nersornaat cellortartumut tulummut Andrew Powerimut tunniunneqarpoq.

Nersornaat akimasoq Det Kongelige Danske Musikkonservatoriumimi juunip aqqarngani tunniunneqarpoq. Jonas Bille Gamkjær naliliisartut sinnerlugit tunngavilersuinermini ima oqarpoq:

Kalaallit Nunaannit kingornussani atorluarai

- Arnannguaq Gerstrømip Kalaallit Nunaannit kingornussani kulturinillu assigiinngitsunik qaatuussaqarnini llu pikkorilluinnarluni ataatsimoortippai. Kalaallit Nunaannit kingornussani kulturinillu assigiinngitsunik tunuliaqutaqarnini atorluallaqqippai. Ataatsimiititaliaq sinnerlugu ullutsinni nipilersuusiornermi suleqataalluarneranut qutsavigiumavarput.

Arnannguaq Gerstrøm nersornaatisinerminut qujalluni ima oqarpoq:

- Nersornaammik uuminnga tunineqarneq soorlu tassa nipilersortartunit, toqqissisimaffigisannit, takuneqarlunilu tusaaneqarneq. Tamannalu pilluaatigalugulu iluunngarlunga qujamasuutigaara.

Erinniuleruttortoq

Arnannguaq maanna angerlarluni erinnioriartussaaq.

- Nersornaatisisimasut nutaamik nipilersuusiornissamut suleqatigiittarnerat ileqquuvoq. Taamaammat aappaagu nersornaasiisoqalerpat Andrew Power tassungarpiaq erinniannik siullermeerluni atuissaaq. Siornatigut naapissimanngilagut, cellortartutulli pikkorilluinnarpoq, nunallu killingi akimorlugit taamatut suleqatigiinnerit nuannarilluinnagaraakka, Arnannguaq Gerstrøm Sermitsiamut oqarpoq.

Arnannguaq Gerstrøm Kalaallit Nunaanni inunngorlunilu peroriartorpoq. Danmarkimi, Sverigemi Tuluillu Nunaanni musikkonservatoriani ilinniarnikuuvoq.

Ilinniareerami Kalaallit Nunaannut uterpoq, tassani ukiorpaalunni orkesterinut erinarsoqatigiinnullu aqutsisuuvoq Kalaallit Nunaannilu nipilersoqatigiissuarnut siullernut pilersitseqataasuuvoq. Kalaallit Nunaanni nunanilu allani nipilersoqatigiissuit, nipilersoqatigiit erinarsoqatigiillu 2009-miilli nipilersugassiortarlugillu eqqumiitsuliortut assigiinngitsut suleqatigisarpai.

Arnannguaq ullumikkut Danmarkimi najugaqarpoq – erinniortuunermilu saniatigut – Inuna Podcastimik pilersitsisuullunilu suliniummi aqutsisuuvoq.