Arnap aalisartunngoriartornera

Qulisimanerani imaq aalasorsuuvoq, mallillu umiatsiap saneraanut qaartarput. 

Silaannaq tarajornillunilu pissanganartorsiorfiuvoq. Umiatsiat tallimat tamarmik tarraq taartoq immap qaavanit takuneqarsinnaasoq — tikaagullik — malillugu ingerlaqatigiipput.

Nammineerluni arfermik pisaqarnikuunngilaq, ataatanili pisaqartoq arlaleriarluni takoreerpaa. Maannali nammineerluni arfermik naalinnissaanut piffissanngorpoq. Arfeq taanna imaani sukkasuumik eqaatsumillu ingerlasinnaasutut ilisimaneqarpoq.

Unaaq tigugamiuk pissangaammernini malugaa. Naaleqqaarnerani uniorpaa, arferullu timaa qaqqorissumik qappiortitsilluni tammarpoq. Nalunaq.

Aappassaanik naalikkamiuk kapputinngitsoorpaa. Mallit qasusuillutik umiatsiaq uaatippaat, soorlulusooq immap nammineq misilittaraa. Iluatsissaaq. Iluatsittariaqarpoq.

Pingajussaanik naalikkami eqqorpaa. Piffissarlu sivikitsumik unippoq.

Iluatsippaa - tikaagullimmik perngarpoq. Aatsaat taama nuannaartigaaq, tulluusimaarnerup pissanganerullu timaa tiguarpaa.

Misigissutsit tamakku imaani aalisaraangami suli eqqaamasarpai. Tassani nuannaarlunilu namminiusinnaavoq. Kiffaanngissuseq, nipaanneq pinngortitarlu alutornartoq tarnikkut naammagisimaartitsilluinnartarput.

Tamanna pissutigalugu sapaatip-akunneri marlussuit matuma siorna saarullinniarneq pillugu inuussutissarsiutigalugu aalisarsinnaanermut allagartamik qinnuteqarsimavoq, iluatsitsinanili. Tamanna 2021-mi pivoq.

Mannannguaq Mathæussenip ukiorpassuarni takorluugarisimasani ullumikkut piviusunngortinnikuuaa. Inuussutissarsiutigalugu aalisartutut akuersissummik juunimi tunineqarpoq. Ukiorpassuarni ilungersorluni uteriisereerluni.

Aalisartutut namminersortutut atugassarititaasut nammineq aqullugit inuussutissarsiuteqarpoq, tamatumalu takorluukkat suulluunniit piviusunngorsinnaasut takutippaa.

Mannannguaq Mathæussen 1990-imi januaarip 21-anni — ukiut 35-t matuma siorna — Nuummi inunngorpoq.

- Meeraallunga inuuissioraangama tamatigut nittaallunilu, perserlunilu anorersuartarpoq, Mannannguaq Mathæussen oqaluttuarpoq.

Eqqaamasat siulliit

Umiartorneq. Pinngortitaq, peqatigiinneq, aalisarneq illuaqqamiinnerlu eqqaamasaani siullersaapput.

- Pinngortitami peroriartorpunga. Umiatsiartuaannarpugut, tassanilu Ilaqutariiulluta pilisarluta, Mannannguaq Mathæussen oqaluttuarpoq.

Nuummi Narsarsuaq blok 9-mi peroriartorpoq.

- Meeqqarpassuulluta inissiarsuarni najugaqarpugut. Aneertaqigatta silami pinnguartarlutalu arpaqattaartarpugut juullikkunnilu illuaqqani matorpassuit silatangiaasarpugut, taanna oqaluttuarpoq.

Mannannguup angajoqqaavi tassaapput Ane Egede Mathæussen aamma Lars Mathæussen. Arnaa kommunimi siunnersortitut sulivoq angutaalu aalisartuullunilu piniartuuvoq. Mannannguakkut qatanngutigiit taliimaapput, taakkunanngalu nukarlersaalluni.

- Angajukka marluk malittuaannarnikuuaakka. Klubbertalernerat eqqaamavara, kisiannili ukiukippallaarama nunarsuarmi kiserngoruppunga. Ajoq, illarpoq.

1996-imi Nuummi meeqqat atuarfianni Ukaliusami, najukkaminiit pisuinnarluni minutsinik marlunnik ungasitsigisumiittumi, atualerpoq.

- Atualeqqaarnera eqqaamavara, tassani kalaallisoorpunga. Nalliuttorsiornerit tamaasa kalaallisoortarpugut. Angajoqqaama tamanna pingaartippaat, Mannannguaq Mathæussen oqaluttuarpoq.

- Angajoqqaakka juullimut kalaallisuutsinnik piareersaasaramik juulli sioqqullugu ulapittarsimaqalutik qanittukkut oqaluttuarput, taanna oqaluttuarpoq.

Mannannguup kisitsisilerineq fysikkilu nuannaralugillu niviarsiaraalluni nukappiaqqanut kammaqartarpoq.

Meeqqat atuarfiat naammassigamiuk Sisimiuni HTX-imi ilinniarnertuunngorpoq.

- Ukioq siulleq oqaatsit pissutigalugit artornartorujussuuvoq, taanna oqarpoq.

Mannannguaq iliuuseqarusuppoq. Taamaammat EF-imi oqaatsinik ilinniarfimmut Manchesterimiittumut aallarluni ilinniariaarpoq. Aalajangigaani pitsaanerpaaq.

- Nuannareqaara. Angalasaqaagut, ilaatigut London Liverpoolilu tikippagut, inuusuttunillu nunanit assigiinngitsorpassuarneersunik avatangiiseqarpugut. Norgemeersumik ikinngutiginerpaasaqalerpunga, taanna eqqaamasarsorpoq.

Issittumut uteqqinneq

Mannannguaq qaammatini arfinilinni Tuluit Nunaata avannaata kitaaneereernermi kingorna HTX-imut uterpoq. Oqaatsinut pikkorinnerulerlunilu misigisarpassuaqareerluni.

- 2. aamma 3.g-mi atuarneq ukiumit siullermit ajornannginnerungaarput, taanna oqarpoq.

Mannannguaq meeraalluni timersuutinik assigiinngitsunik, soorlu arsarnermik assammillu arsaannermik, sammisaqartarsimavoq.

- Pissartanngorniunnerit ilaannut peqataasarnikuullungalu unammiartorlunga sinerissami angalasarnikuuvunga, unammersuarnerilli umiartorfiup nalaani tamatigut ingerlanneqartarput, taamaammat peqataasarnissaq ajornakusoorpoq, taanna oqaluttuarpoq.

Ingeniørinngorniat atuarfianni ilinniarluni 2012-imi aallartikkaluarpoq, imminulli naleqqutinngissorigamiuk ingerlaannaq unitsippaa. Taavami?

Silarsuaq allamik pilersaaruteqarsimavoq. 2013-imi naartulerpoq, ukiullu tulliani 2014-imi Uiloq inunngormat meerartaaqqaarpoq.

Mannannguaq Mathæussen naalungiarsuutiminik neritsillunilu sinnakittareerluni kigutigissaasutut ilinniarami 2017-imi naammassivoq.

- Kigutileriffimmi namminersortumi kigutigissaasutut atorfinippunga, Mannannguaq Mathæussen oqaluttuarpoq.

Sulinngiffeqarnermini ataatanilu aalisartarput.

Ukioq ataaseq kigutilgissaasutut sulereerluni soraarpoq. Arlaannik amigaateqarpoq. Sussanerluni eqqarsaatigeqqippaa. Pinerluuteqarsimasunummi inissiisarfik? Immaqa.

2019-imi pinerluuteqarsimasunut inissiisarfimmi paarsisutut sulivoq ilinniarnertaalu aallartillugu.

- Ilinniarnera naammassivara, sulillunili misiliineq naammassinagu. Soraariarlunga aalisartunngorlungalu piniartunngorpunga, Mannannguaq Mathæussen oqaluttuarpoq.

Iluarneruvoq. Maanna nammineq piffissani aqussinnaalerpaa, kiffaanngissuseqarnini, nipaammiuunini pinngortitarlu alutornartoq nuannaarutigai, taakkulu tarnikkut naammagisimaartitsilluinnartarput.

Nammineq umiatsiartaartoq

Mannannguaq Mathæussen nammineq umiatsiassaminik 2020-mi pisivoq, aappaaguanilu saarullinniarneq inuussutissarsiutiginiarlugu akuersissuteqalernissaminut qinnuteqarpoq. Iluatsinngilaa.

Suliffiit allat misilittaqqittariaqarlugillu soqutigisaminiit allaanerujussuarmik toqqaavoq.

Tamatumuuna immaqa iluatsissaaq.

- Naak immami sulerusunnerugaluarlunga Synoptikimi sulilerpunga, taanna oqaluttuarpoq.

Ajunngilaq, sunngiffimmini aalisarsinnaavoq. Tamannali iluatsinngilaq, ullunimi arlalinni napparsimalluni sulinngiffeqartarpoq. Inalukkani aseruunneqarnermik nappaateqarluni 2015-imi paasivaa.

- Misiliillunga suliffifinikuusanni stressilertarpunga. Taamaammallu inalukkakkut annialertarama ullut arlallit napparsimasarpunga, taanna oqarpoq.

Mannannguaq Mathæussen suliffimminit aasit soraarluni siumiutut aalisaleqqippoq.

- Maanna qaammatini arlalinni aalisartuullungalu piniartuugama inalukkakka anniareqqinnikuunngilakka, taanna oqaluttuarpoq.

- Nuannarisara suliffigigaara timigalu tusarnaarnerusinnaallugu, piffissarlu suliffiga nammineq aalajangersinnaavara. Kiffaanngissuseqarnaqaaq, Mannannguaq Mathæussen, apriilimut qilanaartuaannartoq, oqarpoq. Piffissamimi tassani nipisanniarneq aallartittarpoq.

- Nipisanniarneq aallartikkaangat suli aputeqartarpoq, naammassigaangattalu aasalereertarpoq, taanna oqaluttuarpoq.

Nipisanniareernerup kingorna saarullinniartartoqartarpoq, tuttunniarfiullu tullinnguuttarpoq. Taava saarullinniarfioqqittarpoq. Mannannguarlu – pisassiisoqaraangat – umimmanniartarpoq. Ukioq naallugu taamaappoq, allanngorartuaannarpoq. Taassumunnga tulluarpoq.

Kiisami namminersorluni aalisartunngortoq

- Aalisaraangama timiga malugilluarnerusinnaavara. Aalisarneq soqutigaluglu nuannarilluinnagaraara. Aalisaraangama nipaalluinnartumiittarama eqqissisimanerullunga angerlartarpunga, Mannannguaq Mathæussen, umiatsiami nammineq aserfallatsaaliornissaanik aamma ilinnialeruttortoq, oqaluttuarpoq.

- Umiatsiaqarneq suliassarpassuaqarlunilu akisussaafferujussuuvoq. Motorip uuliaanik taarsiineq qanittukkut ilikkarpara. Uulia ikinngutiga ilagalugu qanittukkunni taarserpara. Aalisartut ilaasa arnaq tamakkuninnga suliaqartoq takorannerisaraat ilaannikkut maugisarpara, taanna oqaluttuarpoq.

Mannannguup inuuneranik allannguisumik ukioq manna juunimi pisoqarpoq.

- Kiisami inuussutissarsiutigalugu aalisartutut akuersissuteqalerpunga! Ulloq taanna paasigakku nuannaangaarama kaffisortitsingajappunga, illarluni oqarpoq.

Ukiut sisamat utaqqereerluni suliffinnillu assigiinngitsunik misileereerluni kiisami namminersortutut aalisartunngorpoq. Suleruloornermigut, uteriinnermigut immamillu nuannarinningaarnermigut uummatimisut iliornissamut sapiissuseqarneq siumukassutigineqarsinnaasoq takutippaa.

- Inuussutissarsiutigalugu aalisartutut saarullinnik tuniseqqaarama tulluusimaarnangaarama oqaatigineqarsinnaanngilaq. Nuan! Mannannguaq Mathæussen oqaluttuarpoq

Maanna ukiornissaa qilanaaraa.

- Ukiuunerani aalisartuuneq aatsaat misigisussanngorpara. Ukiuunerani arlaanni suliinnartaraluarpunga. Ukiuunerani qaleralinniarnissara eqqarsaatigigaluarpara, 29-lli sinnerlugit ukioqarama itigartinneqarpunga, Manannguaq Mathæussen oqaluttuarpoq.

Takujumaarparput. Ajunngilaq, ajorunnanngilaq. Uummatini imarlu malippagit ajortoqarnavianngilaq.