Arnat aappaluttunik siggullit qimussinik unammisut: Karla Nielsen ajugaavoq

38-inik ukiulik Karla Nielsen nukkami aappaatalu qimmii atorlugit ajugaavoq.

- Qatanngutigiinni arnat pingasuuvugut, uangalu angajullersaagama unammeqataavunga, qungujulalluni Sermitsiamut oqaluttuarpoq.

Severine Inûgsutok aappaattut inissilluni ajugaavoq, Nivi Jessenilu pingajuattut inissilluni.

Peqataasunik imikkut maluginiagassaavoq: siggutik aappaluttumik qalipassimammatigit.

Karlamut ulloq puigunaavoq, sukkaniuffissammi nalaani illooraa niviarsiaqqamik ernutartaarpoq: 

- Illortaara oqarami aappaluttunik siggoqarlunga unammissasunga.

Karla unammeqataasussaallunga ullormi pissangangaatsiarsimavoq. Soraajaaramilu pissangangaarami majuartarfikkut nakkakattarsimavoq.

- Pissanganermut majuartarfikkut nakkakattarpunga, qujanartumik ajoqusinngilanga.

Unamminissaq qanillisoq sila putserpoq, unamminerulli nalaani nuannaarutaaqisumik seqinnilerpoq.

Unamminerup nalaani qimmit nipitartut

Unammisumi utoqqaanersaat tassaavoq Emilie Olsen, 75-inik ukiulik. Taassuma ernutaa Suluk Berthelsen, arfineq-pingasunik ukiulik meeqqat Avannaata Qimussersuaaraanut unammigamik pissartanngorpoq. Perusillunilu peqataavoq.

Emilie napparsimalluni napparsimavimmi uninngajami aalajangerpoq arnat unammilerpata peqataaniarluni. Unammineratalu nalaani aqqummi qimmii nipitarput:

- Kamaqaanga, nipitarlutik naammassinissaat utaqqisariaqarlugu, illarluni oqaluttuarpoq.

- Qujanartumik kingullinngunngilanga!

Meeqqat apriilip 24-anni sukkaniullutik unammissapput.