Assinik saqqummersitsineq: Neriuutit sinnattullu

Saqqummersitsinermi kalaallit innuttaasut arfineq-marluk Danmarkimi najugaqalersimasut saqqummersinneqarput. Unammillernartorpassuit aqqutaanilu aporfippassuit aqqusaaraluarlugit taakku arfineq-marluk — Enok, Jørgen, Lene, Ole, Nadia, Patdlok aamma Navarana — pitsaasumik naleqquttumillu inuuneqalersimapput. Saqqummersitsinermi neriuuteqartuarneq takorluugaqartuarnermillu aalajangiusimanninneq pingaarnertut oqariartuutigineqarpoq, naak tamanna piffissap ilaani ajornakusoortaqaraluartoq. Peqataasimasut misigisatik assit apersorneqarnerillu atorlugit oqaluttuaraat.

Sapiitsorujussuusut

Soorunami taakkua arfineq-marluk inuunerminni misigisatik tamatsinnut oqaluttuariniarlugit sapiissuseqartariaqarput. Minnerunngitsumik assiliisoq oqaluttualiortorlu Shazia Kahn tatigilluartariaqarsimavaat.

- Soorunami suliniummut taamaattumut peqataagaanni toqqissisimasariaqarpoq, isumaqarlungalu tamanna iluatsilluarsimasoq, Shazia Khan saqqummersitsinerup ammarneqarnissaa aqaguttoq assit kusanartut Odensemi umiarsualiviup eqqaani Nordatlantisk Husimi nivinngaaassorneqartillugit oqaluttuarpoq.

- Suliniut nutaaq soorunami saqqummersitsininnit kingullermit SIULIT-mit, kulturinit assigiinngitsuneersunik sorlaqarnerup nuannersortaanik unammillernartortaanillu sammisaqarfigisannit, allaaneruvoq, Shazia Khan nangippoq.

Tamanna Shazia Kahnip, Odensemi inunngorsimasup Pakistanimiunillu siuaaqartup, nammineq ilisimavaa.

Assinik saqqummersitsineq SIULIT maanna Uummannami takuniarneqarsinnaavoq kingusinnerusukkullu Nuummi Katuami takuneqarsinnaassaaq.

Isumaginninnikkut politikki pillugu ataatsimeersuarneq

Kalaallit Nunaannit Danmarkimui nuukkaanni qallunaallu kulturiannik inuiaqatigiinnillu naapitsigaanni qanoq unammillernartigisinnaanersoq Ilaatigut 2022-mi Nordatlantisk Husimi isumaginninnikkut politikki pillugu ataatsimeersuarnermi innuttaasullu oqallinneranni arlaleriarluni erserpoq.

Shazia Kahnip assinik saqqummersitsineratigut Kalaallit Nunaannit Danmarkimut nuunnerup ajornakusoorsinnaanera Oak Foundationip aningaasatigut tapersersuineratigut ersersinniarneqarpoq.

Saqqummersitsineq tamatsinnut, minnerunngitsumillu pisortat suliffeqarfiini assigiinngitsuni sulisut, Kalaallit Nunaata Danmarkillu akornanni attaveqarnerup ajornakusoorsinnaaneranik paasinninnerulersitsissasoq Nordatlantisk Hus aamma Kalaallit Illuutaat Odensemiittut neriuutigaat.

Taakku arfineq-marluk

Danmarkimi pissutsit qanoq innerat paasiuminaassinnaasoq taakku arfineq-marluk oqaluttuaanni arlaleriarluni ersersinneqarpoq. Immaqa piffissap ilaani angerlarsimaffeqanngitsuusimapput. Suliffissarsiornerminni ilungersuuteqarsimapput. Soraarnerussutisiaqalerniarlutik ilungersuuteqarsimapput. Meeqqat isumaginiarlugit ilungersuuteqarsimapput. Napparsimallutik ilungersuuteqarsimapput. Misigisat ilungersunartut assigiinngitsut kingunerisaannik misigissutsikkut anniaateqalersimapput, aamma soorlu asanninnermi ajornartorsiuteqartarsimapput.

Taakku arfineq-marluk tamarmik immikkut Kalaallit Nunaanni Danmarkimilu inuunertik pillugu oqaluttuarput.

Oqaluttualiani amerlanertigut pisimasutuulli qujanartumik taakkua arfineq-marluk aamma ajunngitsumik ingerlapput. Taamaammat: Neriuutit takorluukkallu allannguititsisinnaapput.

Inuit kalaallisut tunuliaqutaqartut 17.000-t missaanniittut Danmarkimi najugaqarput.

Saqqummersitat allattorsimaffiat

Saqqummersitsinermi quppersagaq pitsaalluinnartoq takuneqarsinnaavoq, tassani oqaluttuat tamarmiusut atuarneqarsinnaapput.

Saqqummersitsineq, amerlasuunit alakkarneqaqqunaqisoq, aggustip qulingata tungaanut takuneqarsinnaassaaq.