Bethelip Oqaluffia 250-inngortorsiortoq

Sisimiuni oqaluffitoqaq tungujortuusoq, qanga pisimasunik ullutsinnilu pisunik oqaluttuarfiuvoq.

Allaat misiginartaraluni oqaluffitoqaq saneqqukkaanni qanga pisimasunik oqaluttuarfigineqarluni - soorlu oqaluffitoqaq isussuttutullusooq illuni.

Maannali isiginnaarutikkut oqaluttuarpoq.

Sermitsiaq oqaluffitoqqamut iserpoq, takusinnaavaalu inuit issiavimmut ingillutik isiginnaarutikkut isiginnaartut.

Oqaluffitoqqami eqqaanilu pisartut filmip oqaluttuarai.

Nalliuttorsiornermut inuiattut ullorsiornermullu atatillugu filmi oqaluttuarisaanermut tunngasuusoq Amerikamiup ilisimasassarsiortup Donald Baxter Macmillanip (1874-1970) 1926-mi immiussaa takutinneqarpoq.

Filmi siullerpaamik pisortatigoortumik takutinneqaqqaarpoq, Sisimiuni ukiut 99-it matuma siorna inuunermik qaqutigoortumik takutitsisuulluni.

Sisimiuni innuttaasut kalaallisoortut, aalisartut arnallu aalisakkanik suliarinnittut, qaannamik parruttut, qittattut, arnallu umiami qisuttarsimallutik tikittut filmimi takuneqarsinnaapput.

Filmimi illoqarfiup immikkoortortaa Narsannguaq – Sisimiuni illoqarfiup immikkoortortaa siulleq – manna tikillugu assiliaannakkut takuneqartareersoq, aalasulianngorlugu takutinneqarpoq.

Katersugaasiviup pisortaanut attortinnartoq

Katersugaasiviup pisortaata, Dorthe Katrine Olsenip filmi takuteqaarnera nuannarutigaa: 

- Siorna filmi tiguarput, siullermik utoqqarnut takuteqqaarparput. Siullermik suleqatigullu takoqqaaratsigu tupigusungaaratta nipaarulluta. Nuannaangaarama pissittaartuinnaallunga. Takunikuunnginnama taama qanitsigisumik sisimiormiut inuunerannut takutitsisumik. 

- Maluginiagassaavoq amerikarmiut isaaninngaanniit immiussaammat. Takuneqarsinnaavoq qanga manna eqqaa ataatsimoorfiusorujussusimasoq - qittattut, tai qiteqatigingajappakka. 

Narsannguaq - assiinnakkut takusarsimasaq maanna aalasulianngorlugu takunera tupinnarpoq.

- Illut pujortut, assut attortinnarpoq. 

Oqaluttuarisaanermi naleqartoq

Dorthe Katrine Olsen isumaqarpoq filmi nunatta oqaluttuarisaanerani assiliartat pisoqaanersaraat. Ulluinnarni inuunermik paasinninnissatsinnut iluaqutaaginnarani aammali inuiaqatigiinni kulturikkut ataatsimoornermik Bethelip oqaluffiata eqqaani ineriartorsimasumik paasinninnissatsinnut iluaqutaavoq.

Ulloq nalliussineqarpoq oqaluffimmi kaffillertoqarluni suaasallertoqarpoq.