Qaqortumi illoqannginnersaq illoqarfiup qeqqaniittoq Igalikumit sillisissamik sanaamik puilasulik, 1932-miilli ilisarnaataavoq. Illoqannginnersaq aammattaaq illoqarfiup innuttaasuinut 3.000-iusunut katersuuffiuvoq: Ukiukkut meeqqat nuannaartut orpiliartarfiattut; aasakkut ilinniarnertuunngortut tulluusimaartut puilasup nalaani kaavittarfiattut.
Assilialiortoq Bolatta Silis-Høegh, 1981-imi Qaqortumi inunngortoq, meeraalluni puilasuliap ernganik pinnguakulasarpoq, naak masalluni atisani panertunik taarseriartorlugit angerlartartariaqaraluarluni.
Qaqortumi illoqannginnersaq illoqarfiup qeqqaniittoq Igalikumit sillisissamik sanaamik puilasulik, 1932-miilli ilisarnaataavoq. Illoqannginnersaq aammattaaq illoqarfiup innuttaasuinut 3.000-iusunut katersuuffiuvoq: Ukiukkut meeqqat nuannaartut orpiliartarfiattut; aasakkut ilinniarnertuunngortut tulluusimaartut puilasup nalaani kaavittarfiattut.
Assilialiortoq Bolatta Silis-Høegh, 1981-imi Qaqortumi inunngortoq, meeraalluni puilasuliap ernganik pinnguakulasarpoq, naak masalluni atisani panertunik taarseriartorlugit angerlartartariaqaraluarluni.
Eqqaamasarlu taanna frimærkimi nutaami Tusass Greenlandip Qaqortup apriilip arfineq-aappaanni ukiunik 250-inngortorsiorneranut atatillugu saqqummersitaani uummarsarneqarpoq. Bolatta Silis-Høeghip puilasuliaq saarlinngorlugu pissusissamisoortumik inissippaa, illut qalipaatigissaartut qaqqap sivingarnani portusooqisumiittut tunuliaqutaasut. Soorunami aamma meeqqat imeq alutornartoq pinnguarfigigaat.
- Immaqalu Bolatta nammineq?
– 1980-ikkunni Qaqortumi meeraaneq qanmoq ippa?
– Uannut toqqissisimanarpoq, amerlasuunillu paarineqarpugut. Ilaqutariit imminnut ilisarisimapput, meeqqallu kikkunniissinnaappulluunniit, Bolatta Silis-Høegh Sermitsiamut oqarpoq.
Bolatta Silis-Høegh 2000-imi 19-inik ukioqarluni Danmarkimut ilinniariarluni nuuppoq. Ullumikkut Københavnimi najugaqarpoq, periarfissaqartillunilu peroriartorfimminut sapinngisamik utertarpoq; ingammik illoqarfiup meeqqaminut takutinnissaa pingaartikkamiuk.
– Qaqortoq pinngitsoorsinnaanngingajappara; ingammik piffissami matumani, qaamanerup uteqqinnerani, nunasunninneranilu.
Aataqqiiata puilasuliaa
Qatanngutit angutit marluk Qaqortumi puilasuliamik sanasuupput. Sanasup Pavia Høeghip (1886-1956) puilasuliaq titartarpaa, taannalu saffiooq John Høegh (1890-1966) suleqatigalugu sanavaa. Kuummiit eqqaartungaaniittumiit imilersorneqarpoq.
Puilasup sinaani 1932-mi ataqqinaaserneqartut atii allassimapput: Illoqarfiup pilersitsisua Anders Olsen, issittumi ilisimatusartoq Knud Rasmussen, taamani ministeriuneq Thorvald Stauning, taalliortoq Henrik Lund kiisalu qatanngutigiit Pavia aamma John Høegh.
Bolatta Silis-Høegh Pavia Høeghip ernutaqqiutigaa.
