Filmiliornermi ilitsersuisoq Kalaallit Nunaannut kajungerisoq

Franskit filmiliaat ”L’incroyable femme des neiges” - ”The Incredible Snow Woman” filmertarfimmi takuteqqaarneqassaaq. Filmi Kalaallit Nunaanni aamma immiunneqartoq Kalaallit Nunaannut tunngassuteqarpoq.

Filmi 50-inik ukiulimmit Sébastien Betbederimit, siornatigut Kalaallit Nunaanni filmiliortarsimasumit, ilitsersorneqarpoq. Kalaallit Ole Eliassen aamma Martin Jensen inuttaaqataallutik.

Filmimi naalisarlugu oqalutturissagaanni issittumi ilisimatusartup Coline Morelip 46-nik ukiullip - "Arnaq apummik nuannarisalittut“ ilisimaneqartup - suliffiminit soraarsitaareerluni, aappaminit qimanneqarnini peqqiilliorninilu pissutigalugit meeraanermini najugarisimasaminut Jurap qaqqaaniittumut ilimaginngisaminik uternermini qatanngutini Basile aamma Lolo najoqqilerpai. Asannileqqaarfiginikuusani Christophe attaveqarfigeqqilerpaa.

Inuunini isamittoq annaakkumallugu inuttut unammilligassani sorsuutigai. Taamaaliornermini Kalaallit Nunaata sermersuanukarpoq, tassani nannunik akiugaqarlunilu sermimi sinippoq – Kalaallit Nunaannukarneralu inuttut unammilligassaanut takussutaalluni.

Kalaallisut oqaloqatigiinneq quinartoq

- Ilitsersuisoq Sébastien Betbeder immaqa inuppassuarnit nunami ilisimaneqanngilaq, Kalaallit Nunaanni nangeqattaartunik pingasunik filmiliorsimavoq, cand.mag. Jørgen Jørgensen oqaluttuarpoq, taannalu ukiorpassuarni ilinniarnertuunngorniarfinni franskisut ilinniartitsisuuvoq.

- Filmi “Le voyage au Groenland”, Sébastien Betbederip 2016-imi Cannesimi takutitaa, kalaallit nunaanni filmiliaasa pingasut kingullersaraat. Kulturit assigiinngitsut naapinnerannut tunngassuteqarpoq.

- Filmimi inuttaasut pingaarnerit marluk, Thomas aamma Thomas, ikinngutigiipput isiginnaartitsisartullu silarsuaanni piffissami aalajangersimasumi sulisarlutik. Tassa piffissami suliffiunngitsumi suliffissaaleqisutut ikiorsiissutinik tapisisarput. Piffissami tassani Kalaallit Nunaanni nunaqarfimmut avinngarusimasumut nuunniarlutik aalajangerput, aappaata ataataa ukiuni 20-ni tassani najugaqarsimavoq.

- Isumalluartuupput avatangiisinillu illersuisuullutik, pigissaartuuppulli. Nunaqarfimmut pigamik Parisimiutut inooriaaseqarlutik ingerlaannarput. Assersuutigalugu sikumi arpattarput, nunaqavissut quiagisaqisaannik. Illut qalipaatigissaartut igalaavi assersuuteqannginnerat tupigusuutigaat, seqinerlu kaaviinnarmat kiinarpalerlutik sinittariaqartarlutik. Aamma nunaqarfimmi imigassaq inerteqqutaasoq (ataatap illua kisiat pinnagu) paasigamikku oqaasissaarupput.

Ataqqeqatigiittut

- Franskit taakku marluk nunarsuarmeersuunngitsutut tassanngaannaq Kalaallit Nunaannukariasaartutut pissuseqarput. Kalaallit filmimi inuttaasut namminiuinnarlutik isiginnaartitsipput. Tukkortupilussuupput inussiarnerlutik, ikinngutitaamilu ajutuunnginnissaannik isumagisaralugit. Aamma aalisariaqatigisarpaat puisinniaqatigisarlugillu, soorluttaaq puisit tinguanik ooqanngitsumik neqeroorfigisarlugit. Tassa filmimi illuatungeriit ataqqeqatigiinnerat ersarissumik takuneqarsinnaavoq. Parisimiut taakku marluk aamma pinngortitami alutornartumi inuttut ineriartorlutillu allaanerusumik kulturimik naapitsipput. Filmimi quianartorpassuit pisarput, Jørgen Jørgensen oqaluttuarpoq.

Sébastien Betbederip filmiliai pingasoqiusat ”Inupiluk”-mik 2014-imeersumik aallartipput. Filmimi kalaallit piniartut marluk, Ole aamma Adam, franskit marluk ilagalugit sapaatip-akunnerani ataatsimi Parisimiittut sammineqarput. Ole Eliassenip Adam Eskildsenillu filmiliortartoq issittumillu ilisimatusartoq Nicolas Dubreuil ilisarisimalereerpaat.

- Inupiluk kulturit marluk naapinnerannut tunngavoq, nunamut takornartamut tikeraaqqaarnermi filmiliuut malinnaalluni, Jørgen Jørgensen nassuiaavoq.

Sébastien Betbederip "Le voyage au Groenland" suli suliarinagu filmiliaq naatsoq alla "Le film que nous tournerons au Groenland“ (Filmi Kalaallit Nunaanni immiussaq), suliaraa.