Franskip eqqumiitsuliortut nunani allaneersut Akunnaamiisilerai
Suliniaqatigiiffik aningaasannanniarfiunngitsoq (non-profit) Le Manguier tunuliaqutaralugu Philippe Hercher aappassaaneerluni eqqumiitsuliornerup iluani suliaqartunik qaammatini tulliuttuni Akunnaamiisitseqqilerpoq.
Suliniaqatigiiffik aningaasannanniarfiunngitsoq (non-profit) Le Manguier tunuliaqutaralugu Philippe Hercher aappassaaneerluni eqqumiitsuliornerup iluani suliaqartunik qaammatini tulliuttuni Akunnaamiisitseqqilerpoq.
Jens Rafaelsen
Ulluni makkunani Akunnaamut tikilluni maluginiarneqarsinnaassooq nunaqarfimmiuinnaanngitsunit nunaqarfik ’innuttaqalersimasoq’. Tassami Philippe Hercher Le Manguier-imilu suleqatini sisamat ilagalugit majimi junimilu eqqumiitsuliortut tikittussat qaammat ataaseq Akunnaamiisinnissaanni inigisassaannik piareersaaleruttorput.
Philippe Hercher (facebookprofilimini Philippe Olsenimik taasoq), 68-nik ukiulik qisummik umiatsialiornermik ilinniarsimasoq, issittoq angallammik angalassallugu 2009-mili aallartissimavoq, issittumilu nunat tamaasa; Rusland/Sibiria, Alaska, Canadalu aqqusaareerlugit 2014-mi Kalaallit Nunaat tikippoq.
Sooq Akunnaaq?
- 2014-mi Aasiannut tikeqqaarama misigisimavunga sumiiffimmut eqqortumut tikillunga. Eqqumiitsuliornikkut paarlaaqatigiissinnaanneq suliarerusussimavara, 2018-milu Aasianniinninni Jens Peter Olsen, atuakkiortoq Akunnaami najugaqartoq, tusarpara kingornalu Jens Peter attaviginerani eqqumiitsuliorneq aallaavigalugu paarlaaqatigiissinnaanermik isuma tapersersormagu Akunnaami eqqumiitsuliortunik najugaqartitsisinnaanissara piviusunngorpoq, Philippe Hercher, umiatsialiortoq 68-nik ukiulik oqaluttuarpoq.
Suliniaqatigiiffik aningaasannanniarfiunngitsoq
Philipep Corsicamiitilluni 2004-mi suliniaqatigiiffik aningaasannanniarfiunngittoq Le Manguier allat peqatingalugit aallartippaa, oqaluttuarporlu Le Manguier ullumikkut 30-nik ilaasortaaffigineqartoq 2018-mi 2019-milu Aasianni eqqumiitsuliortunik assigiinngitsunik suliaqartunik (atuakkiortoq, assiliisartoq, nipilersortartoq qalipaasartullu) qaammat ataaseq najugaqartitsisarluni Kalaallit Nunaanniisitsisarsimasoq.
– WWOOFing-ernerup assigaa nammattangaliinnarluni nunarsuarmi angalaarneq, taamaasilluni sumiiffimmut tikilluni sulinikkut ’akeqanngitsumik’ najugaqarsinnaalluni. Taamatut angalasartut inuusuttuukkajupput, Le Manguier-imilu eqqumiitsuliorneq kisiat sammillugu angalarusuttunut periarfissiisinnaaneq siunertaavoq, Philippe Hercher nassuiaavoq.
