Gazamut tapersersuilluni tusarnaartitsineq
Nipilersortartoq Alfred, Aalifammik ilisimaneqarluartoq, sapaammi aggustip 24-ani, Illorpumi Palestinamut tapersersuilluni tusarnaartitsinissamik aaqqissuussivoq.
Nuussuarmi Illorpumi nipilersorpalaaq tusarsaassaaq. Naak Gaza Nuummiit ungasikkaluaqisoq, nuummi nipilersortartut kalaallit tapersersuillutik tusarnaartitsissapput.
Nipilersortartoq, Alfred, Aalifammik ilisimaneqarluartoq Palestinami Gazami innuttaasunut tapersersuiniarlunik tusarnaartitsinissamik aaqqissuussissaaq.
- Inuppassuit meeqqallu Gazami toqorarput, misiginneqataaqaanga aamma sakkortuvoq. Taamaattumik pingaaruteqarpoq tapersersuinissaq. Ikiuukkutta inuppassuit annaanneqarsinnaapput, Aalifak Sermitsiamut oqarpoq.
Tapersersuilluni tusarnaartitsineq sapaammi, aggustusip 24-anni nal. 16.30-miit 19.00 tungaanut pissaaq. Aningaasat ilanngarneqaratik nakorsanut, Læger uden Grænserinut, Gazami ullut tamaasa sulisartunut nassiunneqassapput.
Nipilersortartut arlaqartut tusarnaartitsinissamut aaqqissuussaq tapersersorpaat, soorlu ilaatigut René Brandt, Nina Kreutzmann Jørgensen, Alfa, Maali Hermansen, Miké Thomsen, Tûtu aamma Pouli Wille. Taakku aamma tusarnaartitseqataassapput.
- Nuanneqaaq assorujussuaq taama amerlatigisut tapersersuillutik peqataarusummata. Uanga aamma aperineqaraluaruma akuersissagaluarpunga. Allaanngilaq tamatta isumaqatigiittugut ikiuunnissaq pingaaruteqartoq, Aalifak oqarpoq.
Nina Kreutzmann Jørgensen naapertorlugu isilernermi aalajangersimasumik akeqartinneqanngitsoq - tusarnaariallit nammineq aalajangissavaat takkukkunik qanoq akiliitigissanerlutik.
