Hans Lange eqqaaniarneqartoq

Nuka Didriksenip, nipilersortartup, nipilersortartuusimasoq inuit nuannarisaat Hans Lange eqqaaniarlugu erinaatai nutaamik tusaqqoornartumillu immiuppai. Tusagassiorfinnut nalunaarummi taama allassimavoq.

Hans Lange eqqaaniarlugu 60-iliinissaraluanut atatillugu erinaatai albuminngorlugit saqqummersinneqarput, albumimilu tassani “Suli akisuavutit”-mik ateqartumi erinnat katersorneqarput tusarnaartartuniit nuannarineqarluartut ilisimaneqarluartullu.

- Saqqummersitamut ataqqiniarneqarpoq ilisarisimaneqarluartoq, nunatsinni nipilersornerup silarsuaani annertuumik sunniuteqarsimasoq – aammalu taallanik erinnanillu tusaqqoornartunik, nipilersukkanillu inuit uummataat eqqorlugit suliaqarsimasoq, tusagassiorfinnut nalunaarummi aamma allassimavoq.

Erinnat maanna saqqummereersimalerput – digitalikkut saqqummersitsivinni pissarsiarineqarsinnaallutik.

- “Suli akisuavutit” tassaaginnanngilaq nipilersornikkut saqqummersitaq, kisianni erinnat aqqutigalugit eqqaaniutitut oqariartorfigineqarpugut – Hans Langep nipaa tusarsaajuartoq. Saqqummersitakkut Hans Lange eqqaaniarneqarpoq nipaa suli akisuasoq, naak akornatsinniikkunnaareeraluarluni suli uagutsinnut pingaarutilimmik oqariartuuteqartoq, tusagassiorfinnut nalunaarummi aamma allassimavoq.